Read Fulfulded 2 Habaruuji Nyalaaɗe 19 Bible Online

2 Habaruuji Nyalaaɗe 19 - Fulfulded bible

2 Habaruuji Nyalaaɗe 19

¹Laamiiɗo Yusafat hooti jam haa saare mum haa Urusaliima.

²Yeehu ɓii Hanani gi'oowo yehi, fotti bee maako, wi'i mo: “Haanino a walla kalluɗo, a yiɗa wanyɓe Jawmiraawo na? Ngam man tikkere Jawmiraawo wari dow hoore ma.

³Ammaa o tawi kuuɗe booɗɗe haa maaɗa, ngam a itti suuraaji Asera nder lesdi, a ɗakkotiri bee Allah bee ɓernde ma fuu.”

⁴Yusafat jooɗi haa Urusaliima. Ammaa o fuɗɗiti laaroygo yimɓe, diga Biirsaba haa yotti kooseeje Efrayim. O lortini ɓe haa Jawmiraawo Allah kaakiraaɓe maɓɓe.

⁵Nden o jo'ini hiitooɓe nder lesdi, nder berniiji Yahuuda cemmbiɗɗi gootol gootol fuu.

⁶O wi'i ɓe: “Kakkilane ko mbaɗoton. On hiitooɓe, naa fodde yimɓe ammaa fodde Jawmiraawo. Kaŋko o ɗon wondi bee mooɗon, koo ndey mbaɗoton kiita.

⁷Kadi kule Jawmiraawo! Kakkilane ko mbaɗoton ngam Jawmiraawo Allah men jaɓataa to on kiitake bilaa adilaaku malla to on cenndindiri yimɓe bee yimɓe malla to on mbaɗi rusiya.”

⁸Haa Urusaliima boo, Yusafat darni woɗɓe nder Lewi'en e liman'en e baaba-ci'e'en[22] Isra'iila'en, haa ɓe mbaɗa kiita bee innde Jawmiraawo, ɓe ta'a haala jokkirli yimɓe. Ɓe njooɗi haa Urusaliima.

⁹Yusafat umri ɓe: “Ko mbaɗoton fuu, mbaɗe ɗum bee kulol Jawmiraawo e gooŋgaaku e ɓernde woore.

¹⁰To banndiraaɓe mon jooɗiiɓe nder gure muuɗum'en ngaddi haala kiita koo kaye yeeso mooɗon, koo haala mbar-hoore, koo haala umrooje malla farillaaji malla kiitaaji, sey on ndeentina[23] ɓe, ngam taa ɓe keɓa aybeeji yeeso Jawmiraawo, taa tikkere maako wara dow mooɗon e banndiraaɓe mon. To on mbaɗi bana nii, nden kam on ngalaa aybe.

¹¹Ndaa, Amariya, hooreejo liman'en woni mawɗo mon nder haala umrooje Jawmiraawo fuu, Sebadiya ɓii Isma'iilu, ardiiɗo lenyol Yahuuda woni mawɗo mon nder haala umrooje laamiiɗo fuu. Lewi'en boo laato saraaki'en mon. Cemmbiɗe, kuuwe. Jawmiraawo wondu bee waɗanɓe ko fotti.”