Read Fulfulded 2 Habaruuji Nyalaaɗe 21 Bible Online

2 Habaruuji Nyalaaɗe 21 - Fulfulded bible

2 Habaruuji Nyalaaɗe 21

¹Nde Yusafat maayi, ɓe uwi mo kommbi kaakiraaɓe maako nder Berniwol Daawuda. Yehoram, ɓiyiiko laami haa pellel maako.

²Yehoram woodi deerɗiraaɓe: Azariya e Yehiyel e Zekariya e Azariyahu e Mika'iilu e Sefatiya, ɓiɓɓe Yusafat, laamiiɗo Yahuuda[25].

³Baaba maɓɓe hokkuno ɓe dokke ɗuuɗɗe, cardi e kaŋŋeeri e kuuje goɗɗe marɗe saman, non boo berniiji cemmbiɗɗi nder Yahuuda. O hokki Yehoram laamu, ngam kaŋko woni ɓiyiiko afo.

⁴Yehoram jooɗi dow leeso laamu baaba mum. Nde laamu maako tabiti, o mbari deerɗiiko'en fuu bee kaafahi, non boo woɗɓe mawɓe Isra'iila'en.

⁵Yehoram woodi duuɓi cappanɗe tati e ɗiɗi, saa'i o laamo. O laami haa Urusaliima duuɓi joweetati.

⁶O tokki laawol laamiiɓe Isra'iila, bana saare Akab tokkori, ngam o ɓaŋuno ɓii Akab debbo. O waɗi kalluɗum yeeso Jawmiraawo.

⁷Ammaa Jawmiraawo yiɗaano nattingo danygol Daawuda, ngam daliila alkawal ngal o haɓɓuno bee Daawuda. Ngam o iinanino mo haa foroy goɗɗo danygol maako jooɗoto yeeso Jawmiraawo dow leeso laamu.

⁸Nder zamanu Yehoram, Edoomi'en tuurtani laamu Yahuuda. Ɓe laamini laamiiɗo maɓɓe.

⁹Yehoram yahdi bee mawɓe mum e mootaaji pucci mum fuu. Jemma, o ummodi bee hoore'en mootaaji pucci, mbari Edoomi'en taariiɓe ɓe.

¹⁰Diga saa'i man, Yahuuda walaa baawɗe dow Edoomi'en fahin. Wakkati man berniwol Libna boo tuurtani Yehoram, ngam o acci Jawmiraawo Allah kaakiraaɓe maako.

¹¹Yehoram nyiɓi nokkuuje towɗe dow kooseeje Yahuuda boo, bana non o estiri yimɓe jooɗiiɓe haa Urusaliima haa ɓe ndewi labbi, yimɓe Yahuuda boo o selni ɗum.

¹²Bataakewol iwŋgol haa annabi Eliya yottani Yehoram. Ndaa ko winnda nder maagol: “Jawmiraawo Allah kaaka ma Daawuda wi'i: A tokkaaki laabi baaba ma Yusafat e laabi Asa, laamiiɗo Yahuuda.

¹³Ammaa a tokki laawol laamiiɓe Isra'iila, a esti yimɓe Yahuuda e jooɗiiɓe haa Urusaliima ndewi labbi bana saare Akab waaruno boo. A mbari ma deerɗiraaɓe ma sakiike ɓurduɓe ma saman.

¹⁴Ngam maajum Jawmiraawo torran yimɓe ma e ɓiɓɓe ma e rewɓe ma e ko marɗa fuu bee masiibo naawŋgo.

¹⁵An boo, teteki ma nyawan. Nyawu man tullitan kala nyalaade fuu haa to teteki ma ndufi yaasi.”

¹⁶Jawmiraawo ummini ɓerɗe Filisti'en e Arab'en heeddiɗɗiraaɓe Etiyopiya'en, haa ɓe kona Yehoram.

¹⁷Ɓe kippi lesdi Yahuuda, ɓe nasti ndi, ɓe kooci jawdi ndi ɓe tawi nder saare laamiiɗo fuu. Ɓe ndahi ɓikkoy maako e rewɓe maako. Walaa ɓiɗɗo gorko luttani mo, sey Ahaziya, gaajiijo maako tan.

¹⁸Ɓaawo kuuje ɗe'e, Jawmiraawo nyawni mo nyawu teteki ngu hurgataake.

¹⁹Ngu torri mo nyalɗe ɗuuɗɗe. Haa timmoode duuɓi ɗiɗi, teteki maako puɗɗi rufugo, o maayi maayde naawnde. Yimɓe maako ngulanaay mo uureteeɗum bana ko ɓe mbaɗanino kaakiraaɓe maako.

²⁰O woodino duuɓi cappanɗe tati e ɗiɗi, saa'i o laamo. O laami haa Urusaliima duuɓi joweetati. Nde o maayi, walaa boyɗo mo. Ɓe uwi mo nder Berniwol Daawuda, ammaa naa nder genaale laamiiɓe.