Read Fulfulded 2 Habaruuji Nyalaaɗe 22 Bible Online

2 Habaruuji Nyalaaɗe 22 - Fulfulded bible

2 Habaruuji Nyalaaɗe 22

¹Yimɓe Urusaliima laamini Ahaziya ɓii Yehoram gaajiijo haa pellel baaba mum. Mawniiraaɓe maako fuu, mooɓre hippooɓe warnoonde nder saŋngeere Yahuudu'en hawtaade bee Arab'en go mbarno ɓe. Ngam maajum Ahaziya heɓi laamu dow Yahuuda.

²Ahaziya woodi duuɓi cappanɗe nayi e ɗiɗi, saa'i o laamo. O laami haa Urusaliima nduuɓu. Innde daada maako, Ataliya ɓiɗɗo debbo nder danygol Omiri.

³O tokki laawol saare Akab boo, ngam daada maako sarwi mo halleende.

⁴O waɗi kalluɗum yeeso Jawmiraawo, bana yimɓe saare Akab, ngam kamɓe laati dawranooɓe mo ɓaawo maayde baaba maako ngam asar maako.

⁵O tokki sawari maɓɓe, o yahdi bee Yoram ɓii Akab, laamiiɗo Isra'iila. Ɓe kaɓi bee Hazayel, laamiiɗo Siriya haa Ramot nder Gile'at. Siriya'en naawni Yoram.

⁶Kaŋko o lorti haa Yisre'el ngam hurgugo kuuduuje ɗe Siriya'en naawnino mo haa Rama saa'i o haɓi bee Hazayel laamiiɗo Siriya. Ahaziya ɓii Yehoram, laamiiɗo Yahuuda yehi Yisre'el ngam laarugo mo, ngam o nyawɗo.

⁷Allah muuyi Ahaziya yaha ton, ngam haa o halka mo. Nde Ahaziya yotti Yisre'el, o yahdi bee Yoram ngam fottugo bee Yeehu ɓii Nimsi mo Jawmiraawo moyti haa o nattina saare Akab.

⁸Saa'i Yeehu ɗonno hebbitina kiita Allah dow saare Akab, o fotti bee mawɓe Yahuuda e ɓiɓɓe deerɗiraaɓe Ahaziya jagganiiɓe mo, o mbari ɓe.

⁹Nden o ɗaɓɓiti Ahaziya. Yimɓe maako naŋngi Ahaziya haa Samariya haa o nyukkino, njahri mo yeeso Yeehu. Kaŋko o mbari Ahaziya. Ammaa ɓe uwi mo, ngam ɓe mbi'i: “O goɗɗo danygol Yusafat mo ɗowtani Jawmiraawo bee ɓernde mum fuu.” Ɓaawoɗon walaa ke'uɗo laamaago haa saare Ahaziya.

¹⁰Nde Ataliya daada Ahaziya nani ɓiyum maayi, o ummi, o mbari danygol laamu Yahuuda fuu.

¹¹Ammaa Yosebat, ɓii laamiiɗo Yoram debbo, deerɗiraawo Ahaziya hoo'i Yo'as ɓii Ahaziya caka ɓiɓɓe laamiiɗo mbareteeɓe, o nyukkini ɓiŋngel e debbo kakkilanoowo ngel nder suudu sigordu be'itte. Bana nii Yosebat, ɓii laamiiɗo Yehoram, debbo limanjo Yehoyada, deerɗiraawo Ahaziya debbo, nyukkini ngel ngam taa Ataliya yi'a ngel. Ngam maajum, o mbaraay ngel.

¹²Duuɓi joweego Yo'as nyukkidi bee maɓɓe nder haykaliiru Allah. Ammaa saa'i man fuu Ataliya ɗon laamano lesdi.