Read Fulfulded 2 Habaruuji Nyalaaɗe 25 Bible Online

2 Habaruuji Nyalaaɗe 25 - Fulfulded bible

2 Habaruuji Nyalaaɗe 25

¹Amasiya woodi duuɓi noogas e jowi, saa'i o laamo. O laami haa Urusaliima duuɓi noogas e joweenayi. Innde daada maako, Yo'addan mo Urusaliima.

²Amasiya waɗi ko fottani Jawmiraawo, ammaa naa bee ɓernde woore.

³Nde Amasiya semmbiɗi nder laamu, o mbari jaggiiɓe mbarnooɓe laamiiɗo Yo'as, baaba maako.

⁴Ammaa o mbaraay ɓiɓɓe maɓɓe. O waɗi fodde ko winnda nder tawreeta, deftere Muusa. Ton Jawmiraawo umri: “Taa baabiraaɓe maaya ngam daliila hakkeeji ɓiɓɓe muuɗum'en. Taa ɓiɓɓe boo maaya ngam daliila hakkeeji baabiraaɓe muuɗum'en. Ammaa koo moy maaya ngam daliila hakke muuɗum tan.”

⁵Amasiya mooɓti worɓe nder laamu muuɗum, yimɓe Yahuuda e Benyamin fodde ci'e muuɗum'en e dow ardaaŋgal ardiiɓe dow honooɓe ujineere e ardiiɓe dow honooɓe teemerre. O limi koo moy mo duuɓi noogas e ko ɓuri. Limgal maɓɓe waɗi waawɓe konu suɓaaɓe ujine teemeɗɗe tato (300.000), jogiiɓe labbe e bawarɗe[27] mawɗe.

⁶O hoo'i boo Isra'iila'en ujine teemerre (100.000), honooɓe semmbiɗɓe. O yoɓi akiri ngam maɓɓe, baakin kilo cardi ujine tati (3.000).

⁷Ammaa goɗɗo Allah wari haa maako, wi'i mo: “Barkaama, taa accu jama'aare Isra'iila'en yahda bee maaɗa, ngam Jawmiraawo wondaay bee danygol Efrayim fuu, waato yimɓe laamu Isra'iila.

⁸To ɓe njahdi bee maaɗa, koo to an a haɓi bee semmbe ma fuu, Jawmiraawo do'ete yeeso konne'en ma. Ngam Allah mari baawɗe wallugo e do'ugo fuu.”

⁹Amasiya ƴami goɗɗo Allah man: “E noy cardi fuu ndi njoɓmi ngam jama'aare Isra'iila'en?” O jaabi: “Jawmiraawo waawan hokkugo ma ɓuranɗum ɗu'um!”

¹⁰Amasiya senndiri jama'aare Isra'iila'en bee yimɓe mum, wi'i Isra'iila'en kuuca. Ngam maajum ɓe tikkani Yahuuda masin, ɓe kooti bee tikkere saatunde.

¹¹Nden Amasiya tiɗɗini ɓernde mum, yahri yimɓe mum haa Waadiwol Mannda. Ton ɓe mbari ɓiɓɓe Se'ir ujine sappo (10.000).

¹²Yimɓe Yahuuda naŋngi woɗɓe ujine sappo (10.000), mba'ini ɓe dow hoore tapaare mawnde, ngubi ɓe les, ɓe fuu ɓe campiti.

¹³Ammaa jama'aare Isra'iila'en ɓe Amasiya wi'i ɓe kuuca ngam taa ɓe mballa mo nder haɓre, jama'aare man hippi gure Yahuuda diga Samariya haa yotti Baytihurun, mbari yimɓe ujine tato (3.000), kooci keɓal konu ɗuuɗŋgal.

¹⁴Nde Amasiya jaali Edoomi'en, o hoori ɗowanteeɓe yimɓe Se'ir, o darni ɓe haa ɓe laato ɗowanteeɓe maako. O sujidani ɓe, o wulani ɓe uurle boo.

¹⁵Jawmiraawo tikkani Amasiya, neli annabiijo haa maako, haa o wi'a mo: “Koni ɗakkotirɗa bee ɗowanteeɓe ɓe mbaawaay hisnugo yimɓe muuɗum'en hokkaaɓe haa juŋngo ma?”

¹⁶Saa'i o ɗon wolwa tawon, Amasiya wi'i mo: “Min mbaɗi ma dawranoowo laamiiɗo na? Accu! Malla a yiɗi mbareego?” Annabiijo acci felugo laamiiɗo, ammaa o wi'i: “Mi anndi Allah anniyi halkugo ma, ngam a waɗi ɗum, a nanaay wasuyeewol am boo.”

¹⁷Amasiya, laamiiɗo Yahuuda sarwotiri bee yimɓe mum. Nden o neli nelaaɓe haa Yo'as ɓii Yo'ahas ɓii Yeehu, laamiiɗo Isra'iila, ɓe mbi'a mo: “War potten, kaɓen!”

¹⁸Yo'as, laamiiɗo Isra'iila neli haa Amasiya laamiiɗo Yahuuda, wi'ugo mo: “Wumre gi'e Libanon neli haa lekki cemmbiɗki Libanon, wi'ugo: Accu ɓiyam gorko te'a ɓiya debbo. Ammaa ndabbaawa ladde ngonŋga haa Libanon saali ton, dammi wumre gi'e.

¹⁹Gooŋga, a jaali Edoom, kanjum ɓernde ma mawniti, a teddini hoore ma! Jonta kam, jooɗa haa saare ma. Koni ngiɗɗa fooɗango hoore ma sarru haa ndo'oɗa, an e Yahuuda fuu?”

²⁰Ammaa Amasiya faalaay bolle ɗe'e ngam ɗum iwi haa Allah mo muuyi hokkugo Yahuudu'en haa juŋngo Yo'as, ngam ɓe ɗakkotiri bee ɗowanteeɓe Edoomi'en.

²¹Nden Yo'as, laamiiɗo Isra'iila wari, fotti bee Amasiya, laamiiɗo Yahuuda, ɓe kaɓi haa Bayti-Semes nder maral Yahuuda.

²²Isra'iila jaali Yahuuda, yimɓe Yahuuda ndoggi, koo moy haa saare mum.

²³Yo'as laamiiɗo Isra'iila naŋngi Amasiya ɓii Yo'as ɓii Yo'ahas haa Bayti-Semes, nden o yahri mo haa Urusaliima. O sumpiti mahol Urusaliima, diga Dammugal Efrayim haa Dammugal Toldu[28], baakin meetir teemeɗɗe ɗiɗi.

²⁴O hooci kaŋŋeeri e cardi e kuuje marɗe saman gonɗe nder haykaliiru Allah les aynol Obet-Edoom, non boo ndesaaje saare laamu fuu. O hooci boo naŋngaaɓe, o lorti haa Samariya.

²⁵Ammaa ɓaawo maayde Yo'as ɓii Yo'ahas, laamiiɗo Isra'iila, Amasiya ɓii Yo'as, laamiiɗo Yahuuda tokki yeeɗugo duuɓi sappo e jowi.

²⁶Luttuɗum haala Amasiya, diga fuɗɗoode haa timmoode, ɗum winndaama nder Deftere Laamiiɓe Yahuuda e Isra'iila.

²⁷Diga Amasiya acci tokkaago Jawmiraawo, ɓe tuurtani mo haa Urusaliima. O doggi haa Lakis. Ammaa ɓe neli ɗaɓɓitoygo mo haa Lakis, ɓe tawi mo, ɓe mbari mo ton.

²⁸Ɓe njahri ɓanndu maako bee pucci, ɓe uwi mo baŋnge kaakiraaɓe maako haa berniwol Yahuuda.