Read Fulfulded 2 Habaruuji Nyalaaɗe 26 Bible Online

2 Habaruuji Nyalaaɗe 26 - Fulfulded bible

2 Habaruuji Nyalaaɗe 26

¹Ummaatoore Yahuuda fuu laamini Uzziya haa pellel baaba mum Amasiya. Saa'i man Uzziya woodi duuɓi sappo e joweego.

²O nyiɓti berniwol Elat, o wartiri ngol nder maral Yahuuda ɓaawo maayde laamiiɗo Amasiya.

³Uzziya woodi duuɓi sappo e joweego, saa'i o laamo. O laami haa Urusaliima duuɓi cappanɗe jowi e ɗiɗi. Innde daada maako, Yekoliya mo Urusaliima.

⁴O waɗi ko fottani Jawmiraawo, bana ko baaba maako Amasiya waɗno fuu.

⁵Saa'i Zekariya, ekkitinɗo mo hulugo Allah[29] ɗonno geeto tawon, Uzziya ɗakkotiri bee Allah Jawmiraawo. Ngam maajum Allah hokki mo hayru.

⁶Uzziya yehi, haɓi bee Filisti'en, waɗi ceekgol nder mahi taariiɗi Gaat e Yabne e Asdod. Nden o nyiɓi berniiji nder Asdod, non boo caka Filisti'en.

⁷Allah walli mo haɓugo bee Filisti'en e Arab'en jooɗiiɓe haa Gur-Ba'al e Me'uni'en.

⁸Ammooni'en njoɓi Uzziya jomorgol. Innde maako saŋkiti haa yotti nastirde Misra, ngam baawɗe maako ɓesdi masin.

⁹Uzziya nyiɓi cuuɗi towɗi cemmbiɗɗi haa Urusaliima, dow Dammugal Toldu e Dammugal Waadiwol e talkumoore mahol, semmbiɗini ɗi.

¹⁰O nyiɓi cuuɗi towɗi cemmbiɗɗi nder ladde boo, o wasi gaawi ɗuuɗɗi, ngam o mari dabbaaji ɗuuɗɗi nder lesdi towndiije e dow yayre. O woodi remooɓe gese e hakkilanooɓe inabooje haa kooseeje e jarne, ngam o yiɗi ndemri.

¹¹Uzziya woodi jama'aare honooɓe taaskaniiɓe konu fodde limgal muuɗum'en nde Ye'iyel, binndoowo e Ma'aseya, saraakiijo mooɓti ɓe. Ɓe ɗiɗo fuu ɓe kuuwi dow ardaaŋgal Hananiya, gooto nder mawɓe laamiiɗo.

¹²Limgal baaba-ci'e'en[30], honooɓe semmbiɗɓe fuu waɗi ujine ɗiɗo e teemeɗɗe njoweego (2.600).

¹³Jama'aare konu ɗowtani ɓe. Limgal maare, worɓe ujine teemeɗɗe tato e njoweeɗiɗo e teemeɗɗe njowo (307.500). Baawɗe maɓɓe ke'i wallugo laamiiɗo, to o waɗi haɓre bee konne'en.

¹⁴Uzziya hokki ɓe fuu maɓɓe bawarɗe e labbe e kufneeje njamndi e sulkeeji e lagaaje e kaa'e cakkinteeɗe bee piwlol.

¹⁵Huuwooɓe annduɓe mbaɗani mo piɗirɗe kuri e cakkinirɗe kaa'e mawɗe. O darni ɗe haa Urusaliima dow cuuɗi towɗi cemmbiɗɗi e tolɗi mahol. Habaru maako saŋkiti daayiiɗum, ngam Allah hokki mo ballal kaayeefiiwal, haa o laati baawɗo.

¹⁶Ammaa nde o laati baawɗo, o mawniti haa o waɗi kalluɗum. O yewi umroore Allah Jawmiraawo maako, ngam o nasti nder haykaliiru, haa o wula uurle dow gulduɗum.

¹⁷Azariya limanjo e liman'en Jawmiraawo cappanɗe njoweetato, worɓe suusɓe, tokki laamiiɗo nder suudu.

¹⁸Ɓe ndartani mo, ɓe mbi'i: “Uzziya, haanaay a wula uurle ngam Jawmiraawo, sey liman'en danygol Haruna, senaaɓe ngam kuugal maajum. Wurta nokkuure seniinde ngam a yewi umroore maako. Ɗum heɓantaa ma maŋngu yeeso Jawmiraawo Allah”.

¹⁹Uriya, jogiiɗo uurorgo haa juŋngo mum, tikki. Nde o ɗon tikkana liman'en, saɗawre naŋngi haa tiinde maako, yeeso liman'en dariiɓe nder haykaliiru Jawmiraawo baŋnge gulduɗum.

²⁰Azariya, hooreejo liman'en e liman'en woɗɓe fuu ngayliti haa maako, ngi'i saɗawre haa tiinde maako. Law ɓe ngurtini mo haykaliiru. Kaŋko bee hoore maako boo o yaawɗi wurtaago, ngam Jawmiraawo ukkani mo nyawu maajum.

²¹Saɗawre accaay laamiiɗo Uzziya haa yotti nyalaade maayde muuɗum. O jooɗi nder suudu wiccitiindu, o heɓaay nastugo haykaliiru Jawmiraawo, ngam o kuturuujo. Ɓiyiiko Yotam laati kaliifaajo laamorde, kaŋko waɗanta yimɓe lesdi kiita.

²²Luttuɗum haala Uzziya e kuuɗe mum fuu, diga fuɗɗoode haa timmoode, annabi Esaaya ɓii Amoosa winndi ɗum.

²³Uzziya maayi, ɓe uwi mo baŋnge genaale kaakiraaɓe maako nder hawriire laamiiɓe, ngam ɓe mbi'i: “O kuturuujo.” Ɓiyiiko Yotam laami haa pellel maako.