Read Fulfulded 2 Habaruuji Nyalaaɗe 28 Bible Online

2 Habaruuji Nyalaaɗe 28 - Fulfulded bible

2 Habaruuji Nyalaaɗe 28

¹Akas woodi duuɓi noogas, saa'i o laamo. O laami haa Urusaliima duuɓi sappo e joweego. O waɗaay ko fottani Jawmiraawo bana kaaka maako Daawuda waɗno.

²Ammaa o tokki laabi laamiiɓe Isra'iila. O waɗi suuraaji ɓolinaaɗi ngam labbi Ba'alji.

³O wuli uurle nder Waadiwol Ɓii-Hinnom, o lii'i koo ɓiɓɓe maako, o wulani labbi fodde al'aadaaji nyidduɗi nder ummaatooje ɗe Jawmiraawo riiwno yeeso Isra'iila'en.

⁴O wuli kirsaaɗi e uureteeɗum haa nokkuuje towɗe e kooseehon e les leɗɗe bilititɗe fuu.

⁵Jawmiraawo Allah maako yoofi mo nder juŋngo laamiiɗo Siriya'en. Laamiiɗo Siriya'en jaali mo, dahi yimɓe maako ɗuuɗɓe naŋngaaɓe haa Damas. Allah hokki mo haa juŋngo Peka ɓii Remaliya, laamiiɗo Isra'iila boo, kaŋko o jaali mo jaalorgal maŋngal.

⁶Nder nyalaade woore o mbari Yahuudu'en semmbiɗɓe ujine teemerre e noogas (120.000). Ɗum laati non ngam ɓe acci Jawmiraawo Allah kaakiraaɓe maɓɓe.

⁷Zikiri Efrayimiijo, konoowo cemmbiɗɗo mbari yerima Ma'aseya e Azrikam, kaliifaajo laamorde e Elkaana, ɗiɗaɓo laamiiɗo.

⁸Nden honooɓe Isra'iila naŋngi rewɓe e ɓikkoy ujine teemeɗɗe ɗiɗo (200.000) caka yimɓe Yahuuda, ɓe njaɓti kuuje ɗuuɗɗe, ɓe koori ɗe haa Samariya.

⁹Woodi ton annabiijo Jawmiraawo, innde maako Odet. Kaŋko o yehi, o fotti bee jama'aare konu wartunde haa Samariya. O wi'i ɓe “Jawmiraawo Allah kaakiraaɓe mon tikkani yimɓe Yahuuda. Ngam maajum o hokki on ɓe haa juuɗe mon. Ammaa on mbari ɓe bee toonyaare naawnde, haa habaru maare yotti asama.

¹⁰Jonta on ngiɗi doolugo yimɓe Yahuuda e Urusaliima, ɓe laato maccuɓe mon e horɓe mon. Naa onon boo on mbaɗi aybe dow Allah Jawmiraawo mon na?

¹¹Naneeɗam kadi! Njoofte naŋngaaɓe ɓe koocuɗon haa banndiraaɓe mon, ngam Jawmiraawo ɗon tikkana on.”

¹²Nden woɗɓe hoore'en lenyol Efrayim, waato Azariya ɓii Yehohanan e Berekiya ɓii Mesillemot e Hezekiya ɓii Sallum e Amasa ɓii Hadalay ngari. Ɓe potti bee wartuɓe konu,

¹³ɓe mbi'i: “Taa ngadde naŋngaaɓe ɓe'e haa meeɗen. Ko tammiiɗon huuwugo, Jawmiraawo limanan en ɗum aybe. Hakkeeji men e aybeeji men ke'i, taa ɓesdane ɗi aybewol goɗŋgol, ngam aybe amin mawni e tikkere Jawmiraawo saatunde ɗon dow Isra'iila.”

¹⁴Honooɓe njoofti naŋngaaɓe e keɓal konu yeeso hoore'en e jama'aare fuu.

¹⁵Worɓe suɓaaɓe innde innde puɗɗi wallugo naŋngaaɓe. Ɓe ɓorni temmbuɓe bee kuuje keɓal konu, ɓe ndokki ɓe limce e paɗe e nyaamdu e njaram, ɓe kaɓɓi kuuduuje maɓɓe, ɓe mba'ini tampuɓe dow bamɗe, ɓe lorni naŋngaaɓe fuu haa banndiraaɓe maɓɓe haa Yeriko, Berniwol Dibinooje. Nden ɓe kooti Samariya.

¹⁶Saa'i man laamiiɗo Akas neli haa laamiiɗo Assuura, ngam haa o wara, o walla mo.

¹⁷Ngam Edoomi'en ngari fahin, njaali Yahuuda, dahi naŋngaaɓe.

¹⁸Filisti'en boo kippi lesdi towndiije e Lesdi Fombina, nyaami Bayti-Semes e Ayyalon e Gederot, non boo berniiji Soko e Timna e Gimjo bee gure maaji, ɓe njooɗi ton.

¹⁹Jawmiraawo leesni Yahuuda ngam daliila laamiiɗo Akas mo ɗuɗɗini ƴaggaare yimɓe Yahuuda, mo tokki yewugo umroore Jawmiraawo boo.

²⁰Tigilat-Pileser, laamiiɗo Assuura hippi Akas, honi mo, o wallaay mo.

²¹Akas hoocino ndesaaje gonɗe nder haykaliiru Jawmiraawo e haa saare laamu e cuuɗi mawɓe fuu, hokki ɗum laamiiɗo Assuura. Bee non fuu, o heɓaay ballal haa maako.

²²Koo nder wakkati ɓillaare boo, laamiiɗo Akas tokki yewugo umroore Jawmiraawo.

²³O lii'i kirseteeɗi ngam ɗowanteeɓe Damas, jaaliiɓe mo, ngam o wi'i: “Ɗowanteeɓe laamiiɓe Siriya mballi ɓe. Sey mi lii'ano ɓe kirseteeɗi haa ɓe mballammi boo.” Ammaa ɗum laati daliila do'ere maako e do'ere ummaatoore maako fuu.

²⁴Akas mooɓti kuuje suudu Allah fuu, sampiti ɗe, maɓɓi dammuɗe haykaliiru Jawmiraawo, jo'ini kirsirɗe haa kawtirɗe laabi nder Urusaliima fuu.

²⁵Nder gure Yahuuda koo ɗeye o waɗi nokkuuje towɗe ngam o wulani ɗowanteeɓe jananɓe uurle. Bana nii o tikkiniri Jawmiraawo Allah kaakiraaɓe maako.

²⁶Luttuɗum haala Akas e kuuɗe mum fuu, diga fuɗɗoode haa timmoode, ɗum winndaama nder Deftere Laamiiɓe Yahuuda e Isra'iila.

²⁷Akas maayi, ɓe uwi mo nder berniwol Urusaliima, ammaa naa nder genaale laamiiɓe Isra'iila. Ɓiyiiko Hezekiya laami haa pellel maako.