Read Fulfulded 2 Habaruuji Nyalaaɗe 3 Bible Online

2 Habaruuji Nyalaaɗe 3 - Fulfulded bible

2 Habaruuji Nyalaaɗe 3

¹Suleymaanu fuɗɗi nyiɓugo haykaliiru Jawmiraawo haa Urusaliima, dow hooseere Moriya. Haa ton Jawmiraawo waŋganno Daawuda, baaba maako. Daawuda taaskitinno nokkuure man haa laarre[1] Ornan Yebusiijo.

²Suleymaanu fuɗɗi nyiɓugo nder nduuɓu laamu mum nayaɓu, haa nyalaade ɗiɗawre nder lewru ɗiɗaɓru.

³Ndaa no Suleymaanu saɓɓiri caɓɓawal haykaliiru Jawmiraawo: Njuutirka maaru waɗi meetir cappanɗe tati, njaajirka maaru boo, meetir sappo.

⁴Zawleeru haa dammugal nastugo haykaliiru man, njaajirka maaru waɗi meetir sappo bana haykaliiru, towirka maaru boo, meetir sappo. Nder maaru fuu, o ɓasi ɗum bee kaŋŋeeri laaɓndi.

⁵Nder nokkuure seniinde, o takki leɗɗe booɗɗe haa mahi, haa leɗɗe man boo kaŋŋeeri laaɓndi ceewndi, dow leɗɗe man, o waɗi suuraaji lice dibinooje e suuraaji callalluuji.

⁶O jaagnori suudu man bee kaa'e ɗuuɗa-samanje e kaŋŋeeri diga Parwayim.

⁷O suddi nder suudu fuu, haa leɗɗe kaataakooje, les dammuɗe, haa mahle e pareeje fuu. O waɗi suura keruba'en dow mahol suudu.

⁸O mahi boo suudu ɓurndu senaago: Njaajirka maaru meetir sappo bana haykaliiru, njuutirka maaru meetir sappo. O ɓasi kaŋŋeeri laaɓndi nder maaru fuu, baakin kilo ujine sappo e joweetati (18.000).

⁹Teddeeŋga suufuuje kaŋŋeeri ɗe o huuwtiniri ɗon reeta kilo. O ɓasi boo kaŋŋeeri haa nder cuuɗi dowji.

¹⁰Nden o waɗi suuraaji keruba'en ɗiɗo bee njamndi ɓolinaandi ɓe cuddi ɗi bee kaŋŋeeri, o darni ɗi haa suudu ɓurndu senaago.

¹¹Keruba'en man ɗon ndari, ɓe ngoodi bileeji ɗiɗi ɗiɗi, bileeji man ɗon weeɗi deydey meetir ɗiɗi bee reeta, bileeji nayi fuu mbaɗi meetir sappo, bileeji yaasiiji meemi mahi suudu, haa caka boo ɗi meemmeemtiri, geese maɓɓe tiiti nokkuure seniinde.

¹⁴O sannyi boo wiirndallo bee battaaji carwinaaɗi e boɗeeji e boɗeeji coy e daneeji ɗigguɗi, o waɗi suuraaji keruba'en dow maago.

¹⁵O waɗi daŋraŋge juutɗe ɗiɗi ɗe meetir sappo e joweeɗiɗi ngam darnugo yeeso haykaliiru. Ko'e maaje jaagnaaɗe bee kuuje towɗe deydey meetir ɗiɗi bee reeta.

¹⁶O waɗi callalluhoy bana koy suudu ɓurndu senaago, o ɓili koy dow ko'e maaje. O waɗi boo suuraaji rummaanooje teemerre, o ɓili ɗi dow callalluhoy.

¹⁷O darni daŋraŋge ɗe'e yeeso haykaliiru, gootal haa nyaamo, goɗŋgal boo haa nano. Daŋraŋgal wuttudu nyaamru, Suleymaanu inndi ɗum Yakin[2], ngal wuttudu nanndu boo, o inndi ɗum Bo'es[3].