Read Fulfulded 2 Habaruuji Nyalaaɗe 34 Bible Online

2 Habaruuji Nyalaaɗe 34 - Fulfulded bible

2 Habaruuji Nyalaaɗe 34

¹Yusiya woodi duuɓi joweetati, saa'i o laamo. O laami haa Urusaliima duuɓi cappanɗe tati e go'o.

²O waɗi ko fottani Jawmiraawo, o tokki laabi kaaka maako Daawuda, o selaay ɗi sam.

³Nder nduuɓu laamu Yusiya njoweetataɓu, saa'i o derkeejo tawon, o fuɗɗi tefugo muuyo Allah mo kaaka maako Daawuda jaggani. Nder nduuɓu sappo e ɗiɗaɓu, o fuɗɗi ittugo nokkuuje towɗe e daŋraŋge Asera e suuraaji labbi ɓolinaaɗi e cehaaɗi nder lesdi Yahuuda e berniwol Urusaliima.

⁴Ɓe ngibbini haa yeeso maako kirsirɗe Ba'alji, ɓe itti gulduɗe uureteeɗum dow kirsirɗe man, ɓe ngibbini daŋraŋge Asera e labbi ɓolinaaɗi e cehaaɗi go, ɓe campiti ɗum, ɓe ɗiggini ɗum, ɓe caŋkiti mbulwuldi maajum dow genaale lii'aniiɓe ɗi kirsaaɗi.

⁵Yusiya wuli i'e liman'en labbi dow kirsirɗe maaji. Bana non o seniri lesdi Yahuuda e Urusaliima.

⁶Koo haa berniiji Manassa e Efrayim e Simeyon haa yotti Neftali boo e nder bille taariiɗe, o waɗi bana non.

⁷Nder lesdi Isra'iila fuu o yibbini kirsirɗe e daŋraŋge Asera, o fusi suuraaji labbi cehaaɗi, o nami ɗi. O sampiti gulduɗe uureteeɗum fuu. Nden o hooti Urusaliima.

⁸Nder nduuɓu laamu Yusiya sappo e njoweetataɓu, nde o ɗon sena lesdi e haykaliiru Allah, o neli Safan ɓii Asaliya e Ma'aseya, hooreejo Urusaliima e Yo'as ɓii Yo'ahas, hunndukoojo laamiiɗo, haa ɓe mbo'itina haykaliiru Allah Jawmiraawo.

⁹Ɓe njehi haa Hilkiyya, hooreejo liman'en, ɓe njahrani mo ceede ɗe Lewi'en aynooɓe dammuɗe njaɓno haa juuɗe yimɓe Manassa e Efrayim e luttuɓe Isra'iila fuu e yimɓe Yahuuda e Benyamin e Urusaliima, warɓe haa haykaliiru Allah fuu.

¹⁰Ɓe ndokki ceede man haa aynooɓe kuugal haa haykaliiru Jawmiraawo. Kamɓe ɓe ndokki ɗe haa huuwooɓe nder haykaliiru Jawmiraawo, waato wo'itinooɓe kuuje nder maaru.

¹¹Kamɓe boo, ɓe ndokki ɗe haa sehooɓe e nyiɓooɓe, haa ɓe cooda kaa'e cehaaɗe e leɗɗe ngam waɗugo jokke e kaataakooje, ngam wo'itingo cuuɗi ɗi laamiiɓe Yahuuda ngeebino.

¹²Huuwooɓe man ɗon kuuwa bee hoolaare. Ɓe kuuwi dow ardaaŋgal Yahat e Obadiya, Lewi'en nder danygol Meraari e Zekariya e Mesullam nder danygol Kahat, ɓe ɗon kakkilana ɓe. Lewi'en fuu ɓe waawɓe fiyugo kuuje gimruɗe.

¹³Lewi'en woɗɓe laati hakkilanooɓe kuugal dow roondooɓe kuuje nyiɓugo e huuwooɓe kuuɗe feere feereeje. Woɗɓe boo laati winndooɓe e saraaki'en e aynooɓe dammuɗe.

¹⁴Saa'i ɓe ɗon koo'a ceede cigaaɗe nder haykaliiru Jawmiraawo, Hilkiyya limanjo tawi deftere tawreeta ka Jawmiraawo hokkuno bee juŋngo Muusa.

¹⁵O wi'i Safan, binndoowo: “Mi heɓti deftere tawreeta nder haykaliiru Jawmiraawo.” Nden o hokki nde Safan.

¹⁶Safan yahrani nde laamiiɗo, waddani mo habaru, wi'i mo: “Jaggiiɓe ma mbaɗi ko umruɗa min fuu.

¹⁷Ɓe njuppi ceede gonɗe nder sundukru haykaliiru, ɓe ndokki ɗe haa juuɗe hakkilanooɓe kuugal e haa juuɗe huuwooɓe boo.”

¹⁸Nden Safan wi'i laamiiɗo: “Hilkiyya hokki yam deftere nde'e.” O jaŋngani nde laamiiɗo.

¹⁹Nde laamiiɗo nani ko winnda nder tawreeta, o seeki limce mum.

²⁰Nden o umri Hilkiyya e Ahikam ɓii Safan e Abdon ɓii Mika e Safan binndoowo e Asaya, suka laamiiɗo, o wi'i:

²¹“Njehe, ƴame Jawmiraawo ngam am e ngam luttuɓe nder Isra'iila e Yahuuda fuu dow bolle binndaaɗe nder deftere heɓtaande nde'e. Ngam kaakiraaɓe meeɗen kakkilanaay wolde Jawmiraawo haa ɓe mbaɗa fodde ko winnda nder deftere nde'e dow meeɗen fuu. Ngam maajum, Jawmiraawo ukkani en tikkere maako saatunde.”

²²Hilkiyya e nelaaɓe laamiiɗo njehi haa annabi Hulda, debbo Sallum ɓii Takahat taaniraawo Hasra, aynoowo limce cenaaɗe nder haykaliiru. Annabiijo debbo oo ɗonno jooɗi haa fattude hesre nder Urusaliima. Ɓe ngecci mo haala man.

²³O jaabi ɓe: “Ndaa nii Jawmiraawo Allah Isra'iila wi'i: Mbi'e gorko nelɗo on:

²⁴Min Jawmiraawo mi ukkan sarru dow nokkuure nde'e e jooɗiiɓe haa maare, fodde naalooje binndaaɗe nder deftere nde ɓe njaŋngani laamiiɗo Yahuuda.

²⁵Mi waɗan ɗum, ngam ɓe acci yam, ɓe nguli uurle ngam ɗowanteeɓe woɗɓe, haa ɓe tikkinammi bee kuuɗe maɓɓe fuu. Ngam man ukkanmi tikkere am dow nokkuure nde'e, nde feewtataako.

²⁶Laamiiɗo Yahuuda nelɗo on ƴamgo Jawmiraawo, mbi'e mo: Ndaa nii Jawmiraawo Allah Isra'iila wi'i: A nani bolle deftere nde'e.

²⁷Ɗum meemi ɓernde ma, a leestini hoore ma yeeso am nde nanɗa bolle am dow Urusaliima e jooɗiiɓe ton. A seeki limce ma, a woyi yeeso am, min boo, mi jaɓi tornde ma, non Jawmiraawo wi'i.

²⁸Mi accete a maaya nder hayru. Ɓe mballinte nder yenaande ma bilaa yi'ugo sarru ngu ukkanmi Urusaliima e jooɗiiɓe ton.” Nelaaɓe ngartirani laamiiɗo jaawaabu man.

²⁹Laamiiɗo ewni ndotti'en Urusaliima e Yahuuda fuu.

³⁰Nden o yahdi bee ummaatoore Urusaliima e Yahuuda e liman'en e Lewi'en e yimɓe fuu, diga mawɗo haa leesɗo fuu haa haykaliiru Jawmiraawo. Nden o jaŋngani ɓe deftere alkawal heɓtaande nder haykaliiru Jawmiraawo go fuu.

³¹Nden laamiiɗo dari haa nokkuure muuɗum, hesɗitini alkawal bee hoo'ugo anniya tokkaago Jawmiraawo e ɗowtanaago umrooje e seedamkuuji e farillaaji maako bee ɓernde e yoŋki maako fuu, o ɗowtano bolle binndaaɗe nder deftere alkawal nde'e.

³²Nden o nastini yimɓe Benyamin e wonɓe nder Urusaliima fuu nder alkawal man. Jooɗiiɓe haa Urusaliima mbaɗi fodde alkawal ngal ɓe kaɓɓi bee Allah kaakiraaɓe maɓɓe.

³³Koo toy nder lesdi maral yimɓe Isra'iila, Yusiya itti kuuje nyidduɗe fuu. O umri yimɓe wonɓe nder Isra'iila fuu ɓe njaggano Jawmiraawo Allah maɓɓe. Balɗe maako fuu, ɓe accaay Jawmiraawo Allah kaakiraaɓe maɓɓe sam.