Read Fulfulded 2 Habaruuji Nyalaaɗe 35 Bible Online

2 Habaruuji Nyalaaɗe 35 - Fulfulded bible

2 Habaruuji Nyalaaɗe 35

¹Yusiya waɗani Jawmiraawo juulde Paska haa Urusaliima. Nyannde sappo e nayaɓre nder lewru aranndu, ɓe kirsi njawkoy Paska.

²O darni liman'en ngam huuwugo kuuɗe muuɗum'en, o tiɗɗini ɓe nder kuugal maɓɓe haa haykaliiru Jawmiraawo.

³O wolwani Lewi'en, anndinooɓe yimɓe Isra'iila fuu, senaaɓe ngam Jawmiraawo. O wi'i ɓe: “Njo'ine sundukru seniindu nder haykaliiru ndu Suleymaanu ɓii Daawuda, laamiiɗo Isra'iila nyiɓi. On meetataa roondaago sundukru ndu dow balbe mon. Jonta kam, kuuwane Jawmiraawo Allah mon e yimɓe Isra'iila.

⁴Taaske fodde ci'e mon e geɓe kuugal mon, fodde ko Daawuda, laamiiɗo Isra'iila e ɓiyum Suleymaanu mbinndani on.

⁵Ndare nder haykaliiru seniindu bana ni'i: Mooɓgal ci'e Lewi'en gootal fuu ngam mooɓgal ci'e Isra'iila'en banndiraaɓe mon gootal.

⁶On kirsan njawkoy Paska. Cene ko'e mon jonta, taaskitine kirseteeɗi, ngam banndiraaɓe mon haa on ɗowtano umroore Jawmiraawo bee juŋngo Muusa.”

⁷Yusiya hokki yimɓe waɗɓe juulde Paska fuu njawkoy baali e be'i ujine cappanɗe tatoy (30.000), non boo ga'i ujine tati (3.000), o hoo'i ɗi fuu haa jawdi maako.

⁸Saraaki'en maako boo ndokki yimɓe e liman'en e Lewi'en caahu. Hilkiyya e Zekariya e Yehiyel, kaliifa'en haykaliiru Allah ndokki liman'en njawkoy kirseteekoy ngam Paska ujine ɗiɗi e teemeɗɗe njoweego (2.600) e ga'i teemeɗɗe tati (300).

⁹Konaniya e Sema'ya e Netaneyel, deerɗiraaɓe mum e Hasabiya e Ye'iyel e Yozabat, hoore'en Lewi'en ndokki Lewi'en njawkoy kirseteekoy ngam Paska ujine njowi (5.000) e ga'i teemeɗɗe jowi (500).

¹⁰Nde ɓe taaskitini juulde Paska bana non, liman'en ndari haa nokkuure muuɗum'en, Lewi'en boo fodde geɓe muuɗum'en, bana laamiiɗo umruno ɓe.

¹¹Lewi'en kirsi njawkoy, ɓoli koy. Liman'en njaɓi ƴiiƴam maakoy haa juuɗe Lewi'en, mbicci ɗam.

¹²Lewi'en itti guleteeɗum maakoy, njo'ini ɗum sera ngam hokkugo yimɓe ummaatoore fodde mooɓe ci'e maɓɓe, haa ɓe lii'ano ɗum Jawmiraawo fodde ko winnda haa deftere Muusa. Bana non ɓe mbaɗi bee ga'i boo.

¹³Lewi'en ca'i[35] njawkoy Paska dow yiite fodde umroore. Ammaa ɓe ndefi geɓe cenaaɗe nder payanɗe e taasaaje e defruɗe goɗɗe. Nden ɓe njaawi, ɓe cenndani ɗe yimɓe.

¹⁴Ɓaawo man ɓe taaskitini nyaamdu Paska ngam ko'e maɓɓe e liman'en, ngam liman'en nder danygol Haruna ɗonno cukli bee lii'aago guleteeɗi e ɓellere kirsaaɗi haa jemma jeŋngi.

¹⁵Yimooɓe nder danygol Asaf boo ndari haa nokkuuje kuugal muuɗum'en fodde umroore Daawuda e Asaf e Heman e Yedutuun, gi'oowo mo laamiiɗo Daawuda. Aynooɓe dammuɗe haykaliiru fuu accaay kuuɗe muuɗum'en, ngam Lewi'en taaskitinani ɓe nyaamdu Paska.

¹⁶Bana non ɓe kuuwrani Jawmiraawo kuugal fuu nder nyalaade man, fodde ko laamiiɗo Yusiya umruno ɓe. Ɓe mbaɗi juulde Paska, ɓe lii'i guleteeɗi e ɓellere dow hirsirde Jawmiraawo.

¹⁷Saa'i man, Isra'iila'en wonɓe ton mbaɗi juulde Paska e juulde tamseeje ɗe ufnaaka, nyalɗe joweeɗiɗi.

¹⁸Juulde Paska bana nde'e meeɗaay waɗeego nder Isra'iila diga zamanu annabi Samuyila. Walaa laamiiɗo Isra'iila meeɗi waɗugo juulde Paska bana laamiiɗo Yusiya waari nde, bee liman'en e Lewi'en e yimɓe Yahuuda e yimɓe Isra'iila wonɓe ton e jooɗiiɓe haa Urusaliima fuu.

¹⁹Nder nduuɓu laamu Yusiya sappo e njoweetataɓu ɓe mbaɗi juulde Paska nde'e.

²⁰Ɓaawo Yusiya wo'itini haykaliiru, Neko, laamiiɗo Misra wari haɓugo haa Karkemis, haa maayo Efratis. Yusiya yehi fottugo bee maako.

²¹Ammaa Neko neldi mo habaru, wi'i: “Ko yaali yam bee maaɗa, laamiiɗo Yahuuda? Mi waraay haɓugo bee maaɗa jonta, ammaa bee konneejo feere. Allah umri yam mi yaawa. Allah ɗon wondi bee am, taa toonya mo, ngam taa o halke.”

²²Ammaa Yusiya accaay Neko, annini haɓugo bee maako. O nanaay bolle Neko iwɗe haa hunnduko Allah. O wayli yeeso maako, nasti haɓre nder yayre Megiddo.

²³Fiɗooɓe bee kuri piɗi laamiiɗo Yusiya. O wi'i sukaaɓe maako: “Ngurtineeɗam haɓre, mi naawnaaɗo masin!”

²⁴Sukaaɓe maako koo'i mo nder moota pucci maako, ɓe njo'ini mo nder moota feere, ɓe koori mo haa Urusaliima. Ton o maayi. Ɓe uwi mo nder genaale kaakiraaɓe maako. Yimɓe Yahuuda e Urusaliima fuu mboyi mo.

²⁵Annabi Yeremiya waɗi gimol boyki dow Yusiya. Yimooɓe worɓe e rewɓe fuu ɗon ngima gimi boyki dow Yusiya nder gimi muuɗum'en, haa wargo hannde. Ɗum laati al'aada nder Isra'iila, gimi ɗi'i mbinndaama caka gimi boyki.

²⁶Luttuɗum haala Yusiya e kuuɗe mum koolaaɗe fodde ko winnda nder tawreeta Jawmiraawo,

²⁷haala maako diga fuɗɗoode haa timmoode winndaama nder Deftere Laamiiɓe Isra'iila e Yahuuda.