Read Fulfulded 2 Habaruuji Nyalaaɗe 36 Bible Online

2 Habaruuji Nyalaaɗe 36 - Fulfulded bible

2 Habaruuji Nyalaaɗe 36

¹Ɓaawo man yimɓe lesdi Yahuuda cuɓi Yo'ahas ɓii Yusiya, laamini mo haa pellel baaba maako haa Urusaliima.

²Yo'ahas woodi duuɓi noogas e tati, saa'i o laamo. O laami haa Urusaliima lebbi tati.

³Neko, laamiiɗo Misra ɓorti mo laamu haa Urusaliima, yowani lesdi Yahuuda jomorgol, cardi baakin kilo ujine tati e kaŋŋeeri baakin kilo cappanɗe tati.

⁴Laamiiɗo Misra waɗi Eliyakim deerɗiraawo Yo'ahas laamiiɗo Yahuuda e Urusaliima, sannji innde maako bee Yooyakim. Ammaa deerɗiiko Yo'ahas, Neko naŋngi mo, yahri mo haa Misra.

⁵Yooyakim woodi duuɓi noogas e jowi, saa'i o laamo. O laami haa Urusaliima duuɓi sappo e go'o. O waɗi kalluɗum yeeso Jawmiraawo Allah maako.

⁶Nabukodonosor laamiiɗo Baabila wari hippi mo, haɓɓi mo bee callalluuji ngam yahra mo haa Baabila.

⁷Nabukodonosor hooci kuuje goɗɗe haa haykaliiru Jawmiraawo, yahri ɗe haa Baabila, nastini ɗe nder saare laamu mum.

⁸Luttuɗum haala Yooyakim e kuuɗe mum nyidduɗe e ko heɓi mo fuu, ɗum winndaama nder Deftere Laamiiɓe Isra'iila e Yahuuda. Ɓiyiiko Yooyakin laami haa pellel maako.

⁹Yooyakin woodi duuɓi joweetati, saa'i o laamo. O laami haa Urusaliima lebbi tati bee balɗe sappo. O waɗi kalluɗum yeeso Jawmiraawo.

¹⁰Mawri man, haa fuɗɗoode hitaande, laamiiɗo Nabukodonosor neli ngam naŋngugo mo. Ɓe njahri mo haa Baabila, hawtaade bee kuuje haykaliiru Jawmiraawo ɗuuɗa-samanje. Nabukodonosor waɗi Sedekiya bappaanyo Yooyakin laamiiɗo Yahuuda e Urusaliima.

¹¹Sedekiya woodi duuɓi noogas e go'o, saa'i o laamo. O laami haa Urusaliima duuɓi sappo e go'o.

¹²O waɗi kalluɗum yeeso Jawmiraawo Allah maako. O leestinaay hoore maako yeeso annabi Yeremiya, bolwanɗo mo wolde Jawmiraawo.

¹³Laamiiɗo Nabukodonosor hunni mo bee innde Allah haa o ɗowtano mo. Ammaa o tuurtani mo. O saatini hoore maako, o sali lortaago haa Jawmiraawo Allah Isra'iila.

¹⁴Mawɓe liman'en e yimɓe boo tokki yewugo umroore Allah. Ɓe kuuwi fodde kuuɗe nyidduɗe ɗe ummaatooje goɗɗe kuuwi fuu. Ɓe coɓni haykaliiru Jawmiraawo ndu o senno haa Urusaliima.

¹⁵Nde ɗuuɗɗum Jawmiraawo Allah kaakiraaɓe maɓɓe nelani ɓe nelaaɓe mum, ngam o yurmini yimɓe maako e jooɗorde maako.

¹⁶Ammaa ɓe njanci nelaaɓe Allah, ɓe njawi bolle maako, ɓe njali annabi'en maako haa tikkere Jawmiraawo ummi dow yimɓe mum, haa joonde nde'e wo'tataake.

¹⁷Nden Jawmiraawo yahri laamiiɗo Kaldiya'en dow maɓɓe. O mbardi honooɓe Yahuuda suɓaaɓe bee kaafahi haa haykaliiru maɓɓe seniindu. O enɗaay suka'en e faanyɓe rewɓe, koo ndotti'en e ɗuuɗa-duuɓi'en boo. Allah hokki mo ɓe fuu haa juŋngo maako.

¹⁸Laamiiɗo Kaldiya'en ɓofti kuuje mawɗe e pamare fuu haa haykaliiru Jawmiraawo, non boo ndesaaje gonɗe haa maaru e haa ndesaaje laamiiɗo e mawɓe mum, o yahri ɗum fuu haa Baabila.

¹⁹Honooɓe maako nguli haykaliiru Allah, ngibbini mahol taariiŋgol Urusaliima, nguli cuuɗi cemmbiɗɗi haa laamorde, kalki kuuje marɗe saman fuu.

²⁰O dahi daɗɓe kaafahi fuu haa Baabila. Ton ɓe laati maccuɓe maako e maccuɓe danygol maako haa wargo laamu Perezzi'en.

²¹Bana nii Jawmiraawo hebbitiniri ko o wi'no bee hunnduko Yeremiya: “Lesdi ferwan, siwtoto duuɓi cappanɗe joweeɗiɗi, haa to ndi safti kitaale siwtaare ɗe'e.”

²²Nder nduuɓu Koores, laamiiɗo Persiya aranu, Jawmiraawo anniyi hebbitingo wolde muuɗum nde o wi'no bee hunnduko annabi Yeremiya, o ummini ɓernde Koores haa o neldi wooynaandu nder laamu maako fuu, bee hunnduko e binndol fuu, wi'ugo:

²³“Ndaa nii Koores, laamiiɗo Persiya wi'i: Jawmiraawo Allah mo asama, hokki yam laamuuji duniyaaru fuu. Kaŋko o umri yam mi nyiɓana mo haykaliiru haa Urusaliima nder lesdi Yahuuda. Moy caka mooɗon ɗon nder ummaatoore Allah? Allah wonda bee maako. Sey o yaha ton.”