Read Fulfulded 2 Habaruuji Nyalaaɗe 4 Bible Online

2 Habaruuji Nyalaaɗe 4 - Fulfulded bible

2 Habaruuji Nyalaaɗe 4

¹Suleymaanu waɗi hirsirde njamndi mboɗeeri, njuutirka maare meetir sappo, njaajirka meetir sappo, towirka boo meetir jowi.

²O waɗi loonde njamndi ɓolinaandi. Cakaare maare ɗon meetir jowi, towirka maare boo meetir ɗiɗi bee reeta, ɓoggol meetir sappo e jowi taaroto haa filtina nde.

³Haa les sera loonde, o taarni hunnduko man bee suuraaji ga'i[4], meetir gootel fuu, ga'i noogas. Ɗi ɗon taari nde ɗiɗi, ɓolinaaɗum gootum bee maare.

⁴O jo'ini loonde man dow suuraaji ga'i njamndi sappo e ɗiɗi. Ga'i tati tiiti woyla, tati tiiti fombina, tati tiiti hiirnaaŋge, tati tiiti fuunaaŋge. Dubbe maaji fuu ɗon kawti haa caka.

⁵Tekkirka loonde ɗon bana njaajirka newre. O waɗi sera maare bana sera jardugel, bana pinndi gurguli[5]. Loonde nde'e hoosan baakin liitir ujine cappanɗe joweego e joweego (66.000).

⁶O waɗi daarooje sappo, o jo'ini jowi haa juŋngo nyaamo, jowi boo haa nano. Nder maaje yimɓe lalli kuuwruɗe ngam guleteeɗi. Ammaa bee ndiyam loonde go liman'en looti ko'e muuɗum'en.

⁷O waɗi jo'inirɗe pittirlaaji sappo ɗi kaŋŋeeri, bana ko haani. O darni ɗi nder nokkuure seniinde, jowi haa nyaamo, jowi boo haa nano.

⁸O waɗi boo taabe sappo, o jo'ini ɗi nder nokkuure seniinde, jowi haa nyaamo, jowi boo haa nano. O waɗi boo taasahoy kaŋŋeeri teemerre.

⁹O waɗi babal liman'en e babal maŋngal bee dammuɗe maagal. O suddi pareeje bee njamndi mboɗeeri.

¹⁰O jo'ini loonde go haa wakeere haykaliiru nyaamre, haa fuunaaŋge walaadu fombina.

¹¹Hiram waɗi payanɗe ngam ndoondi e pelji e pehe biccirɗe ƴiiƴam. Bana non o timminiri kuugal ngal laamiiɗo Suleymaanu umri mo huuwugo ngam haykaliiru Allah:

¹²Daŋraŋge ɗiɗi bee ko'e jooɗotooɗe dow daŋraŋge man e irin bamaaɗi bana zubaaji ngam suddugo ko'e gonɗe dow daŋraŋge go

¹³e suuraaji rummaanooje teemeɗɗe nayi (400) ngam bamaaɗi ɗiɗi go, waato teemeɗɗe ɗiɗi ngam taarnugo kala hoore fuu nde ɗiɗi, ngam suddugo ko'e ɗiɗi gonɗe dow daŋraŋge go.

¹⁴O waɗi boo jo'inirɗe e daarooje dow maaje

¹⁵e loonde go bee ga'i sappo e ɗiɗi ɗi loonde jooɗi les maare

¹⁶e payanɗe ngam ndoondi e pelji e tufirɗe[6]. Kuuje ɗe Hiram-Abi waɗani laamiiɗo Suleymaanu ngam haykaliiru Jawmiraawo fuu, ɗe mbaɗaama bee njamndi mboɗeeri ɗelkanndi.

¹⁷Laamiiɗo umri ɓolingo ɗe haa waadiwol Urdun, hakkunde Sukkot bee Seredata nder lesdi loope.

¹⁸Suleymaanu waɗi ɗe ɗuuɗɗe masin, ngam man walaa annduɗo teddeeŋga njamndi mboɗeeri ndi ɓe kuuwtiniri.

¹⁹Suleymaanu waɗi boo kuuje gonɗe nder haykaliiru Allah fuu: Gulduɗum uurle bee kaŋŋeeri e taabe ngam tamseeje jo'inteeɗe

²⁰e jo'inirɗe pittirlaaji e pittirlaaji maaji kuɓɓeteeɗi fodde umroore yeeso suudu ɓurndu senaago, ɗum fuu ɗum kaŋŋeeri laaɓndi

²¹e pinndi maaji e pittirlaaji e mekefje maaji, ɗum kaŋŋeeri ɓurndi laaɓugo

²²non boo laɓe e taasahoy e taasaaje e pehe uurorɗe, ɗum fuu ɗum kaŋŋeeri laaɓndi. Pareeje haa dammugal suudu sakkitiindu e pareeje haa dammugal haykaliiru, kanje boo ɗe kaŋŋeeri.