Read Fulfulded Esira 3 Bible Online

Esira 3 - Fulfulded bible

Esira 3

¹Nde lewru joweeɗiɗaɓru waɗi, Isra'iila'en jooɗiiɓe nder berniiji muuɗum'en mooɓi haa Urusaliima bana goɗɗo gooto.

²Yeesu'a ɓii Yocadak bee deerɗiraaɓe muuɗum liman'en e Zorobaabila ɓii Salatiyel bee deerɗiraaɓe muuɗum nyiɓti hirsirde ngam Allah Isra'iila, ngam haa ɓe lii'ano mo dabbaaji guleteeɗi dow maare, bana ko winnda haa tawreeta Muusa, goɗɗo Allah.

³Ɓe ndarni hirsirde dow caɓɓaaje haa nde darino naane koo to ɓe ɗon kula ummaatooje lesdi man. Dow hirsirde man ɓe lii'ani Jawmiraawo guleteeɗi, fajiri e kiikiiɗe fuu.

⁴Ɓe mbaɗi boo Juulde Bukkaaji bana ko winnda, nyalaade fuu ɓe lii'i guleteeɗi fodde limgal man bana ko umra.

⁵Ɓaawoɗon boo nguleteeŋga nyalaade nyalaade e guleteeɗi e dokke ngam juulde lewru hesru e ngam juulɗe goɗɗe cenaaɗe ngam Jawmiraawo, non boo caahuuji ɗi goɗɗo waddani Jawmiraawo.

⁶Diga nyannde go'oore nder lewru joweeɗiɗaɓru ɓe puɗɗi lii'anaago Jawmiraawo guleteeɗi, saa'i man ɓe caɓɓaayno caɓɓaaje haykaliiru tawon.

⁷Ɓe njoɓi sehooɓe kaa'e e sehooɓe leɗɗe, ɓe ndokki yimɓe Tirus e Sidon nyaamdu e njaram e nebbam, haa ɓe ngadda leɗɗe cemmbiɗɗe diga Libanon dow mbeela haa Yafo, fodde ko Koores, laamiiɗo Persiya duŋani ɓe.

⁸Nder hitaande ɗiɗawre ɓaawo ɓe njotti nokkuure haykaliiru Allah haa Urusaliima, nder lewru ɗiɗaɓru, Zorobaabila ɓii Salatiyel e Yeesu'a ɓii Yocadak e deerɗiraaɓe muuɗum'en liman'en e Lewi'en e wartuɓe haa Urusaliima diga daheeki fuu puɗɗi kuugal. Ɓe njo'ini Lewi'en ɓurɓe duuɓi noogas ngam aynugo nyiɓtol haykaliiru Jawmiraawo.

⁹Yeesu'a bee ɓiɓɓe muuɗum e deerɗiraaɓe muuɗum, Kadmiyel e ɓiɓɓe mum, nder danygol Yahuuda kawti ngam ardaago huuwooɓe haa haykaliiru Allah. Non boo ɓiɓɓe Henadat bee ɓiɓɓe muuɗum'en e deerɗiraaɓe muuɗum'en Lewi'en.

¹⁰Saa'i mahooɓe mballini caɓɓawal haykaliiru Jawmiraawo, ɓe ndarni liman'en ɓorniiɓe limce muuɗum'en e jogiiɓe algaytaaji ton e Lewi'en ɓiɓɓe Asaf bee koŋsiije ngam haa ɓe maŋgta Jawmiraawo, bana Daawuda, laamiiɗo Isra'iila umruno ɓe.

¹¹Ɓe ngetti Jawmiraawo, ɓe maŋgti mo bee yimre: “O booɗɗo, hinnuye maako dow Isra'iila ɗon haa abada.” Yimɓe fuu maŋgti Jawmiraawo bee hoolo seyo, ngam caɓɓawal haykaliiru Jawmiraawo saɓɓaama.

¹²Ɗuuɗɓe nder liman'en e Lewi'en e baaba-ci'e'en, waato ndotti'en yi'nooɓe haykaliiru aartundu, mboyi bee sawtu saa'i ɓe caɓɓa caɓɓawal haykaliiru hesru. Ammaa ɗuuɗɓe boo ngooki bee seyo.

¹³Ummaatoore waawaay senndindirgo hoolo seyo bee hoolo bojji, ngam yimɓe kooli bee semmbe, hoolo maajum yehi daayiiɗum.