Read Fulfulded Esira 4 Bible Online

Esira 4 - Fulfulded bible

Esira 4

¹Konne'en yimɓe Yahuuda e Benyamin nani wartuɓe daheeki ɗon nyiɓto haykaliiru Jawmiraawo Allah Isra'iila.

²Ɓe ngari haa Zorobaabila e Yeesu'a e baaba-ci'e'en, ɓe mbi'i: “Min mballan on nyiɓtugo, ngam minin boo min ɗowtaniiɓe Allah mooɗon bana mooɗon. Min ɗon lii'ano mo kirseteeɗi diga wakkati Esarhaddon, laamiiɗo Assuura mo waddi min haa ɗo.”

³Ammaa Zorobaabila e Yeesu'a e baaba-ci'e'en Isra'iila luttuɓe njaabi ɓe: “Haanaay en kawta ngam nyiɓtanaago Allah amin haykaliiru. Minin feere amin min nyiɓtoto ndu ngam Jawmiraawo, Allah Isra'iila, bana Koores, laamiiɗo Persiya umri min.”

⁴Ngam maajum yimɓe lesdi man puɗɗi tampingo e hulnugo yimɓe Yahuuda haa ɓe acca nyiɓtaago haykaliiru.

⁵Ɓe njoɓi sarwooɓe ngam haɗugo anniya maɓɓe, diga zamanu Koores laamani Persiya fuu, haa wargo balɗe Dariyus, laamiiɗo Persiya.

⁶Haa fuɗɗam laamu Ahasuwerus[3], ɓe ngulli yimɓe Yahuuda e Urusaliima.

⁷Nder zamanu laamiiɗo Artahasta boo, Bislam e Mitiridat e Tabeyel e huuwdiɗɗiraaɓe muuɗum'en woɗɓe neldi bataakewol haa Artahasta, laamiiɗo Persiya. Bataakewol man winndaama bee karfeeje e bolle aramiyaaje.

⁸Rehum, ngomnaajo e Simsay, binndoowo neldi laamiiɗo Artahasta bataakewol ngam haala Urusaliima, wi'ugo ni'i:

⁹“Bataakewol iwŋgol haa Rehum, ngomnaajo e Simsay, binndoowo e huuwdiɗɗiraaɓe muuɗum'en luttuɓe, yimɓe Din e Afarsatak e Tarpel e Afaras e Erek e Baabila e Suuza e Deha e Elam

¹⁰e ummaatooje luttuɗe ɗe Asnapar, laamiiɗo mawɗo tedduɗo, dahi e jo'ini nder berniwol Samariya e lesdi hiirnaaŋge maayo Efratis fuu.

¹¹Ndaa no bataakewol man winndira: Yahugo haa laamiiɗo Artahasta barkaama, diga maccuɓe ma haa lesdi hiirnaaŋge maayo Efratis.

¹²Barkaama, anndu Yahuudu'en ummiiɓe diga maaɗa, ngari haa amin haa Urusaliima. Ɓe ɗon nyiɓto berniwol tuurtoowol kalluŋgol, ɓe mbo'itini caɓɓaaje, ɓe ngiɗi mahitaago mahol taariiŋgol berniwol.

¹³Anndu barkaama, to ɓe nyiɓtake berniwol ngo'ol, to ɓe lamsini mahi maagol boo, nden kam ɓe accan yoɓugo jomorli dow yimɓe e kuuje coggu e jahaale, haa ragare boo laamu waɗan asar.

¹⁴Minin min jeyaaɓe ma. Haanaay min munyana asar maaɗa, barkaama. Ngam man min neldi ma habaru

¹⁵haa a linya defte habaruuji kaakiraaɓe ma. Nden a heɓtan nder defte man, foroy berniwol ngol tuurtani laamiiɓe e lesɗe muuɗum'en. Diga ɓooyma yimɓe maagol mboowi ummingo tuurtol. Ngam daliila man ngol wilaama.

¹⁶Min ɗon anndine, barkaama: To ɓe nyiɓtake berniwol ngo'ol, to ɓe lamsini mahi maagol, nden kam a waawataa marugo lesdi haa hiirnaaŋge maayo Efratis.”

¹⁷Laamiiɗo neldi jaawaabu ni'i: “Bataakewol yahugo haa Rehum, ngomnaajo e Simsay, binndoowo e huuwdiɗɗiraaɓe muuɗum'en luttuɓe wonɓe nder Samariya e lesɗe luttuɗe haa hiirnaaŋge maayo Efratis, mi hoofni on.

¹⁸Bataakewol ngol nelduɗon min, mi jaŋnganaama ngol bee laaɓɗum.

¹⁹Nden umrumi linyugo haala berniwol ngo'ol. Min tawi: Diga ɓooyma ngol tuurtani laamiiɓe, yimɓe tokki ummingo tuurtol e fitina nder maagol.

²⁰Laamiiɓe marɓe baawɗe laami haa Urusaliima naane, mari lesdi hiirnaaŋge maayo Efratis fuu. Ɓe njaɓi jomorli dow yimɓe e kuuje coggu e jahaale.

²¹Ngam maajum umre haɗugo yimɓe ɓe'e, ngam taa ɓe nyiɓto berniwol ngo'ol, sonaa to min mi umri ɗum.

²²Ndeente, taa ngooyte koo ɗume nder haala ka, ngam taa laamu waɗa asar.”

²³Nde bataakewol iwŋgol haa laamiiɗo Artahasta go jaŋnganaama Rehum e Simsay, binndoowo e huuwdiɗɗiraaɓe muuɗum'en njaawɗi, njehi Urusaliima, caatani Yahuudu'en, kaɗi ɓe.

²⁴Nden ɓe acci kuugal haa haykaliiru Allah nder Urusaliima boo, haa wargo nduuɓu Dariyus, laamiiɗo Persiya, ɗiɗaɓu.