Read Fulfulded Esira 6 Bible Online

Esira 6 - Fulfulded bible

Esira 6

¹Nden laamiiɗo Dariyus umri linyugo sigordu defte haa ndesaaji Baabila ngoni.

²Haa Ahemeta, berniwol cemmbiɗŋgol nder lesdi Mediya, ɓe tawi deftere taggaande. Ndaa ko winnda nder maare:

³“Nder nduuɓu laamiiɗo Koores aranu, o umri nyiɓtaago haykaliiru Allah haa Urusaliima, ndu laato nokkuure ngam lii'anaago Allah kirseteeɗi, ndu mara caɓɓawal cemmbiɗŋgal. Towirka maaru wona meetir cappanɗe tati, njaajirka maaru boo meetir cappanɗe tati.

⁴Ɓe nyiɓta ndu bee kaa'e cehaaɗe ɓale tati, dow maaje boo leɗɗe ɓalal gootal. Kuugal man yoɓe bee jawdi saare laamu.

⁵Kuuwruɗe kaŋŋeeri e cardi iwɗe haa haykaliiru Allah, ɗe Nabukodonosor hoocuno nder haykaliiru haa Urusaliima, ɗe o yahruno haa Baabila, ɗe ndokkite. Ɓe nastina ɗe nder haykaliiru haa Urusaliima, ɓe jo'ina ɗe haa nokkuure maaje nder haykaliiru Allah.”

⁶Nden laamiiɗo Dariyus umri ni'i: “Jonta, Tattanay, ngomnaajo haa lesdi hiirnaaŋge maayo Efratis e Setar-Bosnay e onon, huuwdiɗɗiraaɓe maɓɓe Afarsaki'en nder lesdi hiirnaaŋge maayo Efratis, ndaaye nokkuure maɓɓe.

⁷Taa kaɗe kuuɗe haykaliiru Allah. Acce ngomnaajo Yahuudu'en e ndotti'en muuɗum'en nyiɓto ndu haa nokkuure maaru.

⁸Ndaa ko mi umrata on ngam haa on mballa ndotti'en Yahuudu'en ɓe'e nyiɓtaago haykaliiru Allah ndu'u: Njoɓe kuugal maɓɓe fuu bee tokkindirki, bilaa faasititgo. Koo'e ceede man nder jawdi saare laamu, waato haa jomorli haa lesdi hiirnaaŋge maayo Efratis.

⁹Non boo ga'i kalhali e jawɗi baali e njawkoy, waato haaje maɓɓe ngam haa ɓe lii'ano Allah mo asama guleteeɗi e alkamaari e mannda e inaboojam e nebbam, fodde ko liman'en haa Urusaliima mbi'ata. Ndokke ɓe ɗum kala nyalaade fuu, bilaa yeebaare,

¹⁰ngam haa ɓe lii'ano Allah mo asama dokke pottuɗe, ɓe toro mo ngam ngeendam laamiiɗo e ɓiɓɓe mum.

¹¹Ndaa ko mi umri boo: To goɗɗo luuti umroore nde'e, ɓe ngurtina leggal nder saare maako, ɓe ndarna ngal, ɓe tigga mo haa maagal, ɓe ngartira saare maako winnde.

¹²Mo luuti umroore nde'e, yibbini haykaliiru Allah haa Urusaliima, koo ɗum laamiiɗo, koo ɗum ummaatoore, Allah mo tabitinta innde muuɗum ton, halka ɗum. Min Dariyus mi waɗi umroore nde'e. Ɗowtane nde bee tiɗɗinaare.”

¹³Tattanay, ngomnaajo lesdi hiirnaaŋge Efratis e Setar-Bosnay e huuwdiɗɗiraaɓe muuɗum'en kuuwi bee tiɗɗinaare fodde umroore nde laamiiɗo Dariyus nelduno ɓe.

¹⁴Ndotti'en Yahuudu'en boo tokki nyiɓtaago. Kuugal maɓɓe yehi yeeso yeeso ngam annabaaku Haggay e Zekariya ɓii Iddo suusɗini ɓe. Ɓe nyiɓti, ɓe timmini haykaliiru fodde umroore Allah Isra'iila e umrooje Koores e Dariyus e Artahasta, laamiiɗo Persiya boo.

¹⁵Haykaliiru timmi nyannde tataɓre nder lewru wi'eteendu Adar, nder nduuɓu laamiiɗo Dariyus njoweego'oowu.

¹⁶Isra'iila'en, liman'en, Lewi'en e wartuɓe luttuɓe diga daheeki mbaɗi juulde cenki haykaliiru Allah bee seyo.

¹⁷Ngam juulde nde ɓe ngaddi kirseteeɗi: Ga'i kalhali teemerre (100) e jawɗi baali teemeɗɗe ɗiɗi (200) e njawkoy teemeɗɗe nayo (400). Ngam ittugo hakkeeji Isra'iila fuu boo ɓe lii'ani Allah jawɗi be'i sappo e ɗiɗi, fodde limgal le'i Isra'iila.

¹⁸Ɓe ndarni liman'en e Lewi'en fodde geɓe muuɗum'en ngam kuugal Allah haa Urusaliima, bana ko umra nder deftere Muusa.

¹⁹Nyannde sappo e nayaɓre nder lewru aranndu, wartuɓe daheeki mbaɗi juulde Paska.

²⁰Ngam liman'en e Lewi'en cenno ko'e muuɗum'en gooto gooto fuu, ɓe fuu ɓe laati senaaɓe. Ɓe kirsi jawgel Paska ngam jama'aare wartuɓe fuu, ngam banndiraaɓe maɓɓe liman'en e ngam ko'e maɓɓe.

²¹Isra'iila'en wartuɓe daheeki nyaami jawgel Paska, kamɓe e seeduɓe bee coɓki yimɓe jananɓe nder lesdi fuu ngam ɗowtanaago Jawmiraawo Allah Isra'iila.

²²Nyalɗe joweeɗiɗi ɓe mbaɗi juulde tamseeje ɗe ufnaaka bee seyo, ngam Jawmiraawo seyni ɓe bee waylitango ɓe ɓernde laamiiɗo Assuura[4], haa o semmbiɗina juuɗe maɓɓe ngam nyiɓtaago haykaliiru Allah Isra'iila.