Read Fulfulded Nehemiya 1 Bible Online

Nehemiya 1 - Fulfulded bible

Nehemiya 1

¹Ndaa haala Nehemiya ɓii Hakaliya: Nder lewru Kislew, nduuɓu laamiiɗo Artahasta noogaswu, mi ɗonno haa Suuza, laamorde Suuza.

²Saa'i man Hanani, gooto caka deerɗiraaɓe am wardi bee woɗɓe diga Yahuuda. Mi ƴami ɓe haala Yahuudu'en hisɓe, luttuɓe dahaaɓeno[1] e haala Urusaliima.

³Ɓe njaabi yam: “Luttuɓe ton nder lesdi, hisɓe daheeki ɗon bee boneeji naawɗi e toskaare. Gibbe ngaɗaama haa mahol taariiŋgol Urusaliima[2], dammuɗe maagol ngulaama bee yiite.”

⁴Nde mi nani haala ka mi jooɗi, mi woyi, mi cuniiɗo nyalɗe ɗuuɗɗe, mi suumi, mi tori Allah mo asama,

⁵mi wi'i: “Yaa Allah Jawmiraawo mo asama, Allah mawɗo kulniiɗo! A ɗon hakkilana alkawal ma e a ɗon waɗana yiɗɓe ma e ɗowtaniiɓe umrooje ma mbooɗeeŋga.

⁶Useni, laar, heɗita, jaɓ tornde maccuɗo ma nde mi toroto ma hannde jemma e naaŋge ngam Isra'iila'en maccuɓe ma. Mi ɗon waŋgina hakkeeji Isra'iila'en yeeso ma. Min mbaɗi hakke dow maaɗa, min bee hoore am e yimɓe saare baaba am boo.

⁷Min mbaɗi kalluɗum masin dow maaɗa, min ɗowtanaaki farillaaji e umrooje e kiitaaji ɗi umruɗa jaggiiɗo ma Muusa.

⁸Useni, siftor wolde nde umruɗa jaggiiɗo ma Muusa. A wi'i mo: To on zammbake yam, mi saŋkitan on nder ummaatooje.

⁹Ammaa to on lortake haa am, to on ɗowtanake umrooje am, nden kam mi mooɓtan saŋkitaaɓe mooɗon koo haa keeri duniyaaru fuu, mi hooran ɓe haa nokkuure nde cuɓmi ngam tabitingo innde am ton. —

¹⁰Ɓe maccuɓe ma e ummaatoore ma. A sootti ɓe bee baawɗe ma mawɗe e juŋngo ma semmbiɗŋgo.

¹¹Yaa Jawmiraawo, heɗita tornde maccuɗo ma e torɗe maccuɓe ma, yiɗɓe hulugo innde ma fuu. Useni, maccuɗo ma heɓa saa'a hannde, waɗ haa mi heɓa mo'ere haa gorko oo.” Ngam min mi dokkoowo laamiiɗo njaramji.