Read Fulfulded Nehemiya 13 Bible Online

Nehemiya 13 - Fulfulded bible

Nehemiya 13

¹Nyannde nde ɓe njaŋngani ummaatoore deftere Muusa, nder maare ɓe tawi ko winnda bana ni'i: “Ammooniijo koo Mo'abiijo meetataa nastugo jama'aare Allah sam,

²ngam yaake ɓe potti bee Isra'iila'en, ɓe ngaddanaay ɓe nyaamdu e ndiyam, ammaa ɓe ndokki Balaama ceede ngam haa o naala ɓe. Ammaa Allah men laatini naaloore man barka.”

³Nde yimɓe nani umroore tawreeta nde'e, ɓe ngurtini jilligara'en fuu nder jama'aare Isra'iila.

⁴Hiddeko kuuje ɗe'e laato, Eliyasib, limanjo kalfitinaaɗo sigordu haa haykaliiru Allah men, hokkuno banndum Tobiya sigordu wooru mawndu. Naane ɓe cigino ton dokke nyaamdu e uurle guleteeɗe e kuuwruɗe e zakka alkamaari e inaboojam kesam e nebbam, waato ko umra ngam Lewi'en e yimooɓe e aynooɓe dammuɗe e dokke ngam liman'en.

⁶Saa'i maajum mi walaaɗonno haa Urusaliima, ngam nder nduuɓu Artahasta, laamiiɗo Baabila, cappanɗe tati e ɗiɗaɓu, mi lortino haa maako. Ɓaawo wakkati seɗɗa mi tori mo duŋayeere dillugo fahin.

⁷Nde mi warti Urusaliima, mi yi'i halleende nde Eliyasib waɗi, waato o hokki Tobiya suudu haa dalde haykaliiru Allah.

⁸Haala man fottanaay yam sam. Ngam maajum mi wurtini kuuje saare Tobiya fuu, mi rufi ɗe haa yaasi.

⁹Nden mi umri ɓe ɓe laɓɓini cigorɗi e mi nastini kuuje haykaliiru Allah e dokke e uurle bana naane.

¹⁰Mi nani boo yimɓe ngaddaay geɗe Lewi'en. Ngam maajum Lewi'en e yimooɓe acci kuugal muuɗum'en, ndilli haa gese muuɗum'en.

¹¹Mi feli kaliifa'en mi ƴami ɓe: “Koni haykaliiru Allah ferwi?” Nden mi mooɓti ɓe, mi darni koo moy dow kuugal muuɗum.

¹²Ɓaawo maajum yimɓe Yahuuda fuu ngaddi zakka alkamaari e inaboojam kesam e nebbam, nastini ɗum nder cigorɗi.

¹³Mi halfitini cigorɗi man haa Selemiya, limanjo e Cadok, binndoowo e Pedaya, ɓe Lewi'en. Hanan ɓii Zakkur ɓii Mattaniya woni balloowo maɓɓe. Ngam koo moy laari, ɓe hoolaaɓe. Ɓe yowaaɓe kuugal senndango deerɗiraaɓe maɓɓe zakkaaji.

¹⁴Yaa Allah am, siftoram ngam kuuje ɗe'e, taa yejjitit kuuɗe booɗɗe ɗe kuuwmi ngam haykaliiru ma e ngam kuugal nder maaru.

¹⁵Saa'i man ngi'mi Yahuudu'en woɗɓe ɗon njaaɓa inabooje nder ɓiɗɗirɗe maaje nyalaade siwtorde, ɓe ɗon mooɓta alkamaari, ɓe ɗon ndimnda ndi bamɗe maɓɓe, non boo inaboojam e inabooje e ibbe e dimle goɗɗe boo, ɓe ɗon ngadda ɗum haa Urusaliima nyalaade siwtorde. Mi barri ɓe, taa ɓe coorra kuuje maɓɓe nyalaade man.

¹⁶Woodi boo yimɓe Tirus jooɗiiɓe haa Urusaliima. Ɓe ɗon ngadda liɗɗi e kuuje filu feere feere, ɓe ɗon coorra ɗum ummaatoore haa Urusaliima nyalaade siwtorde boo.

¹⁷Mi feli mawɓe Yahuuda, mi wi'i ɓe: “Koni on mbaɗata halleende nde'e, on coɓnata nyannde siwtorde?

¹⁸Naa bana nii kaakiraaɓe mon boo mbaari na? Ngam man Allah men ukki sarru ngu'u fuu dow meeɗen e dow berniwol ngo'ol. Onon boo on ɗon tullitina ɓernuki Allah dow Isra'iila bee soɓnugo nyalaade siwtorde!”

¹⁹Hiddeko nyalaade siwtorde fuɗɗa, nde ɗowdiiji njuuti haa dammuɗe Urusaliima, mi umri maɓɓugo dammuɗe, taa ɗe maɓɓite, sonaa to nyalaade siwtorde saalake. Mi darni sukaaɓe am woɗɓe haa dammuɗe, ngam taa goɗɗo nastina doŋngal koo ngale nyalaade siwtorde.

²⁰Nden filooɓe e soorrooɓe kuuje feere feere mbaali yaasi Urusaliima, nde woore koo nde ɗiɗi.

²¹Mi feli ɓe, mi wi'i: “Koni mbaaloton gaɗa mahol? To ɗum meeti, mi naŋngan on!” Diga saa'i man ɓe acci wargo nyannde siwtorde.

²²Nden mi umri Lewi'en ɓe cena ko'e maɓɓe, ɓe ngara, ɓe ayna dammuɗe, ngam taa goɗɗo luuta senaare nyannde siwtorde. Ngam maajum boo siftoram, yaa Allah am, enɗam fodde mbooɗeeŋga ma ɗuuɗŋga.

²³Saa'i man ngi'mi boo Yahuudu'en te'ɓe rewɓe iwɓe Asdod e Ammoon e Mo'ab.

²⁴Reeta ɓikkoy maɓɓe ɗon mbolwa Asdodre koo bolle ummaatoore feere, ammaa koy mbaawaay wolwugo wolde Yahuudu'en.

²⁵Mi feli ɓe, mi naali ɓe, mi fiyi woɗɓe maɓɓe, mi ɗoofi gaasa ko'e maɓɓe, mi hunni ɓe bee innde Allah, taa ɓe ndokka jananɓe ɓiɓɓe maɓɓe rewɓe, taa ɓe koo'a ɓiɓɓe jananɓe rewɓe ngam ko'e maɓɓe, koo ngam ɓiɓɓe maɓɓe worɓe.

²⁶Mi wi'i ɓe: “Naa ngam rewɓe bana ɓe'e Suleymaanu, laamiiɗo Isra'iila waɗi hakke na? Caka ummaatooje ɗuuɗɗe walaa laamiiɗo bana maako, o giɗaaɗo Allah. Allah laamini mo dow Isra'iila fuu. Ammaa rewɓe jananɓe nastini mo nder hakke.

²⁷Kadi onon on poti waɗugo aybewol maŋngol ngo'ol, on ngewa umroore Allah meeɗen bee te'ugo rewɓe jananɓe na?”

²⁸Gooto nder ɓiɓɓe Yoyada ɓii Eliyasib, hooreejo liman'en mo te'i ɓii Samballat Horoniijo. Mi riiwi mo.

²⁹Siftor ɓe, yaa Allah am, ngam ɓe coɓni limanku e alkawal liman'en e Lewi'en.

³⁰Mi seni ɓe diga kuuje jananne fuu, mi darni liman'en e Lewi'en, koo moy nder kuugal muuɗum,

³¹non boo ngam dokke leɗɗe bee saa'iije ta'aaɗe e dokkuki aartuɗum ɓenndugo. Yaa Allah am, siftoram, woonanam.