Read Fulfulded Nehemiya 3 Bible Online

Nehemiya 3 - Fulfulded bible

Nehemiya 3

¹Eliyasib, hooreejo liman'en ummodi bee banndiraaɓe muuɗum liman'en ngam nyiɓtaago Dammugal Baali. Ɓe ceni ngal, ɓe tiggi pareeje maagal. Ɓe nyiɓti mahol haa yotti suudu towndu wi'eteendu Teemerre, ɓe ceni ɗum haa yotti suudu Hananiyel towndu.

²Kommbi maɓɓe, worɓe Yeriko nyiɓti. Kommbi maɓɓe boo, Zakkur ɓii Imiri nyiɓti.

³Yimɓe nder danygol Senaa nyiɓti Dammugal Liɗɗi. Ɓe kippi dow maagal bee leɗɗe, ɓe tiggi pareeje maagal bee jogorɗe e palduɗe maagal.

⁴Kommbi maɓɓe, Meremot ɓii Uriya ɓii Koos wo'itini mahol. Kommbi maɓɓe boo Mesullam ɓii Berekiya ɓii Mesejabeyel. Kommbi maako boo, Cadok ɓii Ba'ana wo'itini ngol.

⁵Kommbi maako boo, yimɓe Teko'a mbo'itini ngol. Ammaa mawɓe maɓɓe cali ɗowtanaago jaagorɓe muuɗum'en.

⁶Yoyada ɓii Paseha e Mesullam ɓii Besodiya mbo'itini Dammugal Berniwol Kiiɗŋgol. Ɓe kippi dow maagal bee leɗɗe, ɓe tiggi pareeje maagal bee jogorɗe e palduɗe maagal.

⁷Kommbi maɓɓe, Melatiya mo Gibiyon e Yadon mo Meronot e worɓe Gibiyon e Mispa mbo'itini mahol baŋnge jooɗorde ngomna lesdi hiirnaaŋge maayo Efratis.

⁸Kommbi maɓɓe, Uzziyel ɓii Harhaya, tappoowo kaŋŋeeri wo'itini ngol. Kommbi maako boo, Hananiya, jilloowo uurle wo'itini ngol. Ɓe nyiɓti[3] Urusaliima haa yotti mahol jaasŋgol.

⁹Kommbi maɓɓe, Refaya ɓii Huuru, ardiiɗo dow reeta taƴre Urusaliima wo'itini mahol.

¹⁰Kommbi maako boo, Yedaya ɓii Harumaf wo'itini wakeere tiitotirŋgol saare muuɗum. Kommbi maako, Hattus ɓii Hasabeniya wo'itini ngol.

¹¹Malkiya ɓii Harim e Hassuba ɓii Pahat-Mo'ab mbo'itini yeɓre mahol feere e suudu towndu wi'eteendu Defrudu.

¹²Kommbi maɓɓe, Sallum ɓii Hallohes, ardiiɗo dow reeta taƴre Urusaliima feere e ɓikkoy mum rewɓe mbo'itini mahol.

¹³Hanun e jooɗiiɓe haa Sanoha mbo'itini Dammugal Waadiwol. Ɓe nyiɓti ngal, ɓe tiggi pareeje maagal bee jogorɗe e palduɗe maagal. Ɓe mbo'itini boo mahol reeta kilomeetir haa yotti Dammugal Jiddere.

¹⁴Malkiya ɓii Rekab, ardiiɗo taƴre Bayti-Kerem wo'itini Dammugal Jiddere. O nyiɓti ngal, o tiggi pareeje maagal bee jogorɗe e palduɗe maagal.

¹⁵Sallum ɓii Kol-Hooze, ardiiɗo taƴre Mispa wo'itini Dammugal Seeɓoore. O nyiɓti ngal, o hippi dow maagal, o tiggi pareeje maagal bee jogorɗe e palduɗe maagal. O nyiɓti boo mahol haa Weendu Selaha baŋnge surande laamiiɗo, haa yotti ba'orɗe jahranɗe Berniwol Daawuda.

¹⁶Kommbi maako, Nehemiya ɓii Asbuk, ardiiɗo dow reeta taƴre Bayti-Cura wo'itini mahol haa yotti yeeso Genaale Daawuda e weendu wasaandu e Saare Honooɓe.

¹⁷Kommbi maako, Lewi'en mbo'itini mahol: Rehum ɓii Baani, kommbi maako boo Hasabiya, ardiiɗo dow reeta taarde Ke'ila wo'itini mahol ngam yimɓe taƴre muuɗum.

¹⁸Kommbi maako banndiraaɓe maɓɓe mbo'itini ngol: Baway ɓii Henadat, ardiiɗo dow reeta taƴre Ke'ila feere.

¹⁹Kommbi maako boo, Ezer ɓii Yeesu'a, ardiiɗo Mispa wo'itini yeɓre mahol feere wonnde yeeso wa'orde suudu balmi haa talkumoore mahol.

²⁰Kommbi maako, Baruku ɓii Zabbay wo'itini bee tiinaare yeɓre feere diga talkumoore haa yotti nastirde saare Eliyasib, hooreejo liman'en.

²¹Kommbi maako boo, Meremot ɓii Uriya ɓii Koos wo'itini yeɓre feere diga nastirde saare Eliyasib haa yotti keerol saare man.

²²Kommbi maako boo, liman'en jooɗiiɓe haa taarde Urusaliima mbo'itini mahol.

²³Kommbi maɓɓe, Benyamin e Hassuba mbo'itini ngol baŋnge ci'e[4] muuɗum'en. Kommbi maɓɓe boo, Azariya ɓii Ma'aseya ɓii Ananiya wo'itini ngol baŋnge saare muuɗum.

²⁴Kommbi maako boo, Binnuy ɓii Henadat wo'itini yeɓre feere, diga saare Azariya haa yotti talkumoore e toldu mahol.

²⁵Kommbi maako, Palal ɓii Uzay wo'itini mahol gonŋgol yeeso talkumoore suudu towndu ɓaŋgiindu wurtiindu saare laamiiɗo, baŋnge daldal aynooɓe. Kommbi maako, Pedaya ɓii Par'os wo'itini ngol

²⁶haa yotti yeeso Dammugal Ndiyam haa fuunaaŋge e suudu towndu wurtiindu mahol. Huuwooɓe kuuɗe pamare nder haykaliiru ɗonno njooɗi haa towndiire Ofel.

²⁷Kommbi maako boo, yimɓe Teko'a mbo'itini yeɓre feere, diga yeeso suudu towndu mawndu wurtiindu mahol haa yotti towndiire Ofel.

²⁸Diga Dammugal Pucci, liman'en mbo'itini mahol, koo moy yeeso saare muuɗum.

²⁹Kommbi maɓɓe boo, Cadok ɓii Immer wo'itini ngol yeeso saare muuɗum. Kommbi maako boo, Sema'ya ɓii Sekaniya, aynoowo Dammugal Fuunaaŋge wo'itini ngol.

³⁰Kommbi maako boo, Hananiya ɓii Selemiya e Hanun ɓiɗɗo Calaf njoweegoojo mbo'itini yeɓre feere. Kommbi maɓɓe boo, Mesullam ɓii Berekiya wo'itini mahol yeeso suudu muuɗum.

³¹Kommbi maako boo, Malkiya, tappoowo kaŋŋeeri wo'itini ngol haa yotti saare huuwooɓe kuuɗe pamare nder haykaliiru e filooɓe yeeso Dammugal Mifkad haa yotti suudu ɓaŋgiindu haa toldu mahol.

³²Hakkunde suudu maajum e Dammugal Baali, tappooɓe kaŋŋeeri e filooɓe mbo'itini mahol.

³³Nde Samballat nani min ɗon nyiɓto mahol, o tikki, o ɓerni masin. O janci Yahuudu'en,

³⁴o wi'i yeeso banndiraaɓe maako e honooɓe Samariya: “Ɗume Yahuudu'en tampuɓe ɓe'e mbaɗata? Ɓe tammi nyiɓtaago e lii'aago kirseteeɗi e timmingo kuugal maɓɓe nder nyalaade woore na[5]? Ɓe tammi yeeɗitingo kaa'e bille, gulaaɗe ɗe na?”

³⁵Tobiya Ammooniijo ɗon kommbi maako, o wi'i: “Sey ɓe nyiɓto kadi. To doldolnde diwi dow mahol kaa'e maɓɓe, ngol yibban!”

³⁶Yaa Allah amin, nan! Ɓe ɗon njawo min. Lortin toskaare maɓɓe dow ko'e maɓɓe! Laatin ɓe keɓal konu nder lesdi ndi konne'en ndahata ɓe.

³⁷Taa yaafa aybe[6] maɓɓe, taa yejjitit hakkeeji maɓɓe, ngam ɓe kuɗi nyiɓtooɓe mahol.

³⁸Min nyiɓti mahol fuu haa yotti reeta towirka maagol. Koo moy nder ummaatoore huuwi bee ɓernde muuɗum fuu.