Read Fulfulded Tobit 1 Bible Online

Tobit 1 - Fulfulded bible

Tobit 1

¹Deftere Tobit ɓii Tobiyel taaniraawo Ananiyel. Ananiyel, o ɓii Aduyel, o taaniraawo Gabayel. Ɓe fuu maɓɓe ɓe yimɓe asŋgol Asiyel, goɗɗo lenyol Neftali.

²O ɗonno jooɗi lesdi Neftali haa dow towndiije Galiili nder berniwol Tisbe hakkunde Kades gal woyla, Haser haa hiirnaaŋge e Fogor gal fombina. Diga ton o dahaama haa lesdi Assiriya yaake Salmanasar laamani lesdi maajum.

³Min Tobit, mi tokki laabi gooŋga e mi huuwi kuuɗe booɗɗe kala nyalaade fuu ngeendam am. Mi hokki sadaka haa banndiraaɓe e yimɓe dahaaɓe bee am haa Niniwe nder lesdi Assiriya nde ɗuuɗɗum.

⁴Wakkati nderkaaku am, yaake mi ɗonno haa lesdi am Isra'iila tawon, lenyol kaaka am Neftali fuu wurti diga saare Daawuda e diga Urusaliima. Alhaali boo Allah suɓi berniwol ngo'ol nder Isra'iila ngam haa le'i fuu ngara lii'a kirseteeɗi. Haa ton, haykaliiru, jooɗorde Allah, nyiɓaama e senaama ngam zamanuuji garanɗi fuu.

⁵Dow kooseeje Galiili, saare am bee lenyol kaaka am Neftali fuu ɗonno lii'ana gaggel kaŋŋeeri kirseteeɗi, ngel Yerobo'am, laamiiɗo Isra'iila, jo'inno haa nokkuure seniinde haa Dan.

⁶Mi ɗonno yaha Urusaliima nyalɗe juulɗe, ndego feere am bana Tawreeta umri Isra'iila haa foroy. Mi ɗonno yahra ɓenndalooje aartuɗe, afi dabbaaji, zakka dabbaaji am fuu e gaasa baali am arana.

⁷Mi ɗonno hokka ɗum liman'en, yimɓe asŋgol Haruna ngam ɓe lii'o ɗum. Mi ɗonno hokka zakka alkamaari am, inaboojam, jaytunje, ibbe e ɓenndalooje feere haa ɓiɓɓe Lewi huuwanɓe haa Urusaliima. Mi ɗonno hooca yeɓre woore nder sappo nder ceede am fahin, mi yahri ɗum Urusaliima, mi ɗonno majjina ɗum ton.

⁸Yeɓre woore nder sappo feere boo mi ɗonno hokka ɗum atiime'en, rewɓe yurumɓe e jananɓe nastuɓe nder diina Isra'iila'en. Duuɓi tati fuu mi ɗonno yahra e hokka ɓe ɗum haa min nyaamda ɗum fodde umroore Tawreeta Muusa e bana Deboora, maama debbo danyɗo Ananiyel, baaba am umri yam ngam baaba am maayi, acci yam mi atiimeejo.

⁹Nde mi laati suka, mi te'i debbo nder lenyol am, o danyani yam ɓiɗɗo, mi inndi mo Tobiyas.

¹⁰Ɓaawoɗon, mi dahaama haa Assiriya, mi jooɗi haa Niniwe. Nder berniwol ngo'ol, saaro'en am e yimɓe lesdi am ɗonno nyaama nyaamdu ndu heefeerɓe nyaamata.

¹¹Ammaa min kam, mi naŋgti hoore am ngam taa mi nyaama nyaamdu heefeerɓe man.

¹²Nde nii mi ɗonno siftora umroore Allah am bee nafsu am fuu,

¹³Allah Ɓaŋiiɗo heɓnani yam mo'ere yeeso Salmanasar. O halfini yam soodgo ɗum ko o mari haaje fuu.

¹⁴Haa nyalaade maayde maako, mi ɗonno yaha Mediya soodoygo kuuje. Bana nii nyalde feere, mi halfini Gabayel deerɗiraawo Gabaryaahu, ceede baakin kilo teemeɗɗe tati nder boorooji.

¹⁵Nde Salmanasar maayi, ɓiɗɗo maako laami haa pellel maako.

¹⁶Nder zamanu Salmanasar, mi ɗonno hokka sadaka ɗuuɗka haa yimɓe lenyol am.

¹⁷Mi ɗonno hokka dolɓe nyaamdu, mi ɗonno ɓorna temmbuɓe. To mi laari goɗɗo lesdi am maayɗo, cakkinaaɗo gaɗa mahol Niniwe, mi ɗonno uwa mo.

¹⁸Mi uwi boo mbaraaɓe Sennakerib. kaŋko huɗino Allah, laamiiɗo asama, haa Yahudiya. Ngam hiitaago mo, Allah dooli mo o sotta, o dogga lesdi man bee law. Bee wartugo Niniwe, Sennakerib ɓerni, mbari Isra'iila'en ɗuuɗɓe, mi uwi ɓe nder cuuɗiiɗum. Laamiiɗo ɗaɓɓiti ɓalli maɓɓe, ammaa o tawaay ɗi.

¹⁹Goɗɗo Niniwe yehi haa maako, wi'i mo min ɗonno uwa ɗi, ngam maajum mi nyukki. Nde mi nani laamiiɗo ɗonno ɗaɓɓitammi haa mbarammi, kulol naŋngi yam, mi doggi.

²⁰Ɓe njaɓti maral am fuu, ɓe ndokki ɗum laamiiɗo. Luttani yam sey debbo am Anna e ɓiŋngel am Tobiyas tan.

²¹Koo balɗe cappanɗe nayi ngaɗaay, ɗiɗoy nder ɓikkoy maako mbari mo, koy ndoggi dow kooseeje Araraada. Asarhaddon, ɓiɗɗo maako feere laami haa pellel maako. O halfini Ahikar ɓii deerɗiraawo am Anayel, kaliifaaku kuuɗe laamu e ceede fuu.

²²Ahikar torani yam, nden mi wari haa Niniwe. kaŋko wonno jarnoowo laamiiɗo e yerima'en, cigoowo haatummeere laamu, ardiiɗo kuuɗe laamu e lisaafi ceede yaake Sennakerib wonno laamiiɗo Assiriya. Asarhaddon jo'itini mo nder kuuɗe maako. Ahikar o banndiraawo am, o ɓii deerɗiraawo am gorko.