Read Fulfulded Tobit 10 Bible Online

Tobit 10 - Fulfulded bible

Tobit 10

¹Kala nyalaade fuu, Tobit ɗon lima balɗe jahaaŋgal yahgo e loraago Rages waɗata. Wakkati man saali, ammaa ɓiyiiko wartaay.

²O wi'i nder ɓernde maako: “Teema ɓe ɗaggini mo ton. Malla Gabayel maayi e walaa goɗɗo dokkitanɗo mo ceede go.”

³O fuɗɗi saklaago.

⁴Nden debbo maako Anna wi'i: “Ɓiŋngel am maayi! O walaa nder yeeɗɓe!” Nden o fuɗɗi woygo e uumugo, o numi, o wi'i:

⁵“Kayto! Ɓiŋngel am! Mi acci a dilla, an woni annoora gite am!”

⁶Ammaa Tobit jaabi mo: “Taa wolwu bana nii, debbo am giɗaaɗo! Taa hul, o jamo. Teema laruura ɗaggini ɓe ton, ngam ɗoftoowo mo, deerɗiraawo men, o koolaaɗo. Taa sakla ngam ɓiɗɗo maaɗa, deerɗam, o ɓadake wartugo.”

⁷Ammaa daada wi'i: “Taa wolwu fahin! Taa sargam, ɓiŋngel am maayi.” Kala nyalaade fuu, o ɗonno wurto cub, o eewa laawol gal ɓiɗɗo maako dillirino. o yiɗaa nango ko goɗɗo wi'ata mo. Ɓaawo maŋngariba, o ɗonno nasta saare, o woya jemmaare fuu, o ɗaanataako.

⁸Raguyel huni waɗgo balɗe sappo e nayi ngam ɓaŋgal ɓiyum. Nde ɗe timmi, Tobiyas wi'i mo: “Accam, mi dilla. Baaba am e daada am ɗon numa ɓe meetataa yi'ugo yam. Useni, accam mi loro haa baaba am. Mi tinndini ma bana noy jaɓɓitaago mo naawri.”

⁹Ammaa Raguyel wi'i Tobiyas: “Jooɗa haa am, ɓiŋngel am! Mi nelan goɗɗo haa baaba ma ngam anndingo mo habaruuji ma.” Tobiyas jaabi: “Aa'a, useni, accu mi loro haa baaba am.”

¹⁰Nden Raguyel hokki mo Saraatu debbo maako, hokki mo boo reeta jawdi mum: Maccuɓe e horɓe, na'i e baali, bamɗe e geelooɗi, limce e ceede e kuuje feere feere.

¹¹Nden o jaɓɓiti ɓe, o wi'i: “Allah hokke jam, jippora jam, ɓiŋngel am! O acci ɓe ɓe ndilli bee seyo.”

¹²O wi'i ɓiŋngel maako Saraatu: “Yah haa esiraawo maaɗa. Jonta saaro'en gora laatoto saaro'en maaɗa. Allah yahre jam, ɓiŋngel am! Mi ɗon yelo nango booɗɗum dow ma haa mi maaya.” O jaɓɓiti ɓe, o acci ɓe ndilla.

¹³Edna wi'i Tobiyas: “Ɓiŋngel am giɗaaŋgel, Jawmiraawo hoore jam! O sabbinanammi haa mi laara ɓikkoy ma bee Saraatu hidde mi maaya. Allah o ceedoowo yam, mi halfini ma ɓiŋngel am, aynu mo booɗɗum e taa mettin mo ɓernde koo ndey fuu fodde ngeendam ma. Allah yahre jam ɓiŋngel am! Diga jonta, mi daada ma, Saraatu boo deerɗa, Allah hokku en fuu hayru gooto kala nyalaade ngeendam meeɗen fuu!” Edna hebbi ɓe ɗiɗo fuu, o acci ɓe ɓe ndilli bee seyo.

¹⁴Bana nii Tobiyas acciri Raguyel nder seyo maŋngo, o maŋgti Jawmiraawo asama e lesdi, laamiiɗo dow koo ɗume fuu, ngam o hiɓɓini jahaaŋgal maako. Raguyel wi'i fahin: “Jawmiraawo hokke seyo teddingo saaro'en ma ngeendam ma fuu.”