Read Fulfulded Tobit 11 Bible Online

Tobit 11 - Fulfulded bible

Tobit 11

¹Nde ɓe ɓadake Kajerin berniwol haa sera Niniwe, Rafayel wi'i:

²“A anndi nder joonde ndeye accirɗen baaba ma.

³Aarten debbo ma yottaago ngam mbo'itinen saare hiddeko o yotto bee yimɓe feere.”

⁴Ɓe ndillidi ɓe ɗiɗo fuu. Rafayel wi'i Tobiyas o joga haahaande liiŋgu. Rawaandu Tobiyas ɗon tokko ɓe.

⁵Anna ɗon jooɗino sera laawol ngol ɓiŋngel mum lortorto, ɗonno eewa.

⁶Ɗon nii, o eewi ngel, ndaa ngel ɗonno wara, o maatini goriiko: “Ndaa ɓiɗɗo ma ɗon wara bee ɗoftuɗo ɗum.”

⁷Hiddeko Tobiyas yotto kommbi baaba mum, Rafayel wi'i mo: “Mi anndi gite baaba ma mbumtan.

⁸A takka haahaande liiŋgu haa gite maako: Lekki ittan toɓɓere raneere, wirgidan nde fuu. Nden baaba ma wumtan, o yi'an laaɓɗum tal.”

⁹Wakkati man, Anna doggi hebbi ɓiɗɗo mum, wi'i mo: “Mi laarti ma, jonta koo to mi maayi kal.” Nden o woyi.

¹⁰Tobit ummi, wurti haa yolnde bee fannyaago.

¹¹Ɓiɗɗo maako ɓaditi mo, jogi haahaande liiŋgu. O fuufi nder gite baaba maako, o wi'i mo: “Tiɗɗin ɓernde ma, baaba am!” O takkani mo lekki dow gite, ɗum neeɓi seɗɗa.

¹²Nden bee kooli o itti larel daneeyel sera yiitere koo ndeyeere fuu.

¹³Baaba hebbi ɓiyum Tobiyas, woyi, wi'i: “Mi laarti ma, ɓiŋngel am, an woni annoora gite am.”

¹⁴Nden o wi'i: “Maŋgtoore woodani Allah! Maŋgtoore woodani innde maako teddunde, non boo haa malaa'ika'en maako seniiɓe! Allah mo innde muuɗum teddunde ayna en haa foroy! Maŋgtoore woodani malaa'ika'en seniiɓe maako haa foroy! Jawmiraawo neldi yam jarriboore saatunde, ammaa jonta mi ɗon laara fahin, ɓiyam Tobiyas.”

¹⁵Tobi nasti saare, ɓernde maako seyi masin, maŋgti Allah bee sawtu. O limtani baaba maako jahaaŋgal maako: “Haajeeji fuu kiɓɓi, o wartiri ceede go, o ɓaŋi Saraatu, ɓiɗɗo Raguyel, o ɗon dow laawol, o ɓadake yottaago dammugal Niniwe.”

¹⁶Ɓernde Tobit seyi masin, o maŋgti Allah, nden o dilli fottoygo bee esiiko, debbo ɓiyiiko haa dammugal Niniwe. Yimɓe Niniwe kayɗini masin ngam ɓe ndaari mo o ɗon yaha feere maako. Tobit wooyni haala ka'a haa yimɓe. Allah yurmini mo, wumtini mo.

¹⁷Nde o yotti haa Saraatu, debbo Tobiyas ɓiyiiko, o barkiɗini mo, o wi'i: “Jaɓɓaama ɓiŋngel am! Barka laatanto Allah maaɗa mo waddi ma haa amin! Barka laatano baaba ma, barka laatano ɓiŋngel am Tobiyas, barka laatano an boo ɓiŋngel am debbo! Nastu saare ma, a jaɓɓaama. Allah hokke barka e hayru! Nastu ɓiŋngel am!”

¹⁸Nyannde man seyo maŋngo waɗi haa Isra'iila'en wonɓe haa Niniwe.

¹⁹Ahikar e Nadab, denɗiraaɓe Tobit, ngari boo seyodaago bee maako.