Read Fulfulded Tobit 12 Bible Online

Tobit 12 - Fulfulded bible

Tobit 12

¹Nde seyo ɓaŋgal timmi, Tobit ewni ɓiɗɗo mum, wi'i: “Ɓiŋngel am, sey a hokka ɗoftoowo ma ngeenaari maako, a ɓesdana mo huunde boo seɗɗa.”

²Tobiyas jaabi baaba mum: “Ceede noy mi hokkata mo? Koo to mi hokki mo reeta jawdi ndi min ngartiri, walaa asar.

³Gooŋga, o wartiri yam jam koo ɗume, o hisni debbo am diga ginnawol, o walli yam heɓtugo ceede e o yamɗitini ma. Ceede noy mi hokkata mo ngam man?”

⁴Baaba wi'i: “O foti hoocugo reeta ko o wartiri fuu.”

⁵Nden o ewni Rafayel, o wi'i mo: “Hoocu ngam ngeenaari ma, reeta ko a wartiri fuu. Jonta jippa jam.”

⁶Nden Rafayel wiccitini Tobit e Tobiyas, o wi'i ɓe: “Ngette Allah, ngooyne yeeso tagle fuu mo'e ɗe o waɗani on, haa ɗe mana mo, ɗe ngimana mo. Anndine yimɓe fuu kuuɗe Allah bana ɗe poti. Taa acce yettugo mo.

⁷Haani suuɗgo sirri laamiiɗo, ammaa kuuɗe Allah haani waŋgineego e maneego. Mbaɗe ko wooɗi, nden masiibo jokkataako on.

⁸Torugo, suumaago e hokkugo sadaka bee gooŋga ɓuran jawdi mooɓtaandi bee faasikaare. Ndikka waɗgo sadaka dow sigaago kaŋŋeeri.

⁹Sadaka hisnan diga maayde e laɓɓinan hakkeeji fuu. Waɗɓe sadaka njuutinan balɗe muuɗum'en,

¹⁰ammaa hakke'en e faasiki'en naawnan ko'e muuɗum'en.

¹¹Jonta mi wi'an on gooŋga fuu, mi suuɗataa on koo ɗume. Naane mi anndini on, haani suuɗgo sirri laamiiɗo, ammaa sey en anndina kuuɗe Allah bana ɗe poti.

¹²Nde on ɗonno ngaɗa do'a, an Tobiyas bee Saraatu, mi lii'ani Jawmiraawo tedduɗo do'a mon. Mi lii'ani mo boo kuuɗe ma saa'i a ɗonno uwa maayɓe.

¹³Nde a miijaaki, a ummi, a acci nyaamdu ma, a yehi a uwi maayɗo, Allah neli yam ngam foondugo ma nder wakkati maajum.

¹⁴O neli yam boo ngam yamɗitingo ma, an e Saraatu esiraawo ma debbo.

¹⁵Min woni Rafayel, gooto nder malaa'ika'en njoweeɗiɗo wonɓe yeeso Jawmiraawo tedduɗo, huuwanooɓe mo.”

¹⁶Tobit e ɓiɗɗo mum cujidi ngam kulol naŋngi ɓe.

¹⁷Malaa'ikaajo wi'i ɓe: “Taa kultore, Allah hokka on jam, maŋgte mo foroy.

¹⁸Mi ɗonno bee mooɗon naa ngam fodde ngiɗa am, ammaa fodde muuyo Allah. Maŋgte mo kaŋko feere maako tan, mane mo balɗe ngeendam mooɗon fuu.

¹⁹Nde on ngi'i yam mi ɗon nyaama fuu, mi waɗi non asee boo naa non.

²⁰Mane Jawmiraawo dow lesdi ndi'i, ngaazine maŋngu maako. Min kam, mi loroto jonta haa nelɗo yam. Onon boo mbinnde ko laati fuu.” Nden o lori haa asama.

²¹Tobit e ɓiɗɗo mum ummi ammaa ɓe ngi'aay mo fahin.

²²Ɓe maŋgti Allah, ɓe ngetti mo ngam o waɗi kaayeefiiji mawɗi ngam malaa'ikaajo waŋgani ɓe!