Read Fulfulded Tobit 13 Bible Online

Tobit 13 - Fulfulded bible

Tobit 13

¹Ndaa no Tobit yimri:

²“Maŋngu laatano Allah geeto laamiiɗo duumiiɗo. O hiitan e o yaafoto boo. O jippinan nder lugguɗum joonde maayɓe e o hisnan boo diga halkere mawnde. Walaa ko hisata baawɗe maako.

³Isra'iila'en, maŋgte mo yeeso ummaatooje haa o saŋkiti on caka maaje.

⁴Ton o waŋginani on maŋngu maako. Ngooyne tedduŋgal maako yeeso yeeɗɓe fuu, ngam o Jawmiraawo meeɗen, o Allah meeɗen, o baaba meeɗen, o Allah haa foroy.

⁵O hiitoto on ngam hakkeeji mooɗon, ammaa o yurminan on boo. O wartiran diga ummaatooje haa o saŋkiti on caka maaje.

⁶To on ngarti haa maako bee ɓernde woore e yoŋki mon fuu ngam yeeɗugo nder gooŋga yeeso maako, nden o wartanan on, o meetataa nyukkango on yeeso maako.

⁷Ndaare noy o huuwri bee meeɗen, ngette mo bee sawtu.

⁸Min kam, mi ɗon maŋgta mo nder lesdi daheeki ndi'i. Mi wooyna semmbe e maŋngu maako haa ummaatoore aybinannde mo: Tuube, onon waɗooɓe kalluɗum, ngaɗe adilaaku yeeso maako, teema o jaɓan on, o woonanan on.

⁹Mi ɗon teddina Allah am, mi ɗon maŋgta laamiiɗo asama e mi ɗon yima maŋngu maako.

¹⁰Sey yimɓe fuu maŋgta mo haa Urusaliima. Urusaliima ɗum berniwol ceniiŋgol, Allah hiitoto ma daliila kuuɗe ɓikkoy ma, ammaa o yurminan ɓikkoy adili'en.

¹¹Maŋgtu Jawmiraawo bana no haani, teddin laamiiɗo duumiiɗo ngam ɓe mahita haykaliiru maako bee seyo.

¹²Jawmiraawo seyna dahaaɓe fuu! O waŋgina yiide maako dow yarɓe bone nder maaɗa ngam gide garanɗe fuu.

¹³Annoora jalbitan diga maaɗa haa keeri duniyaaru fuu. Ummaatooje ɗuuɗɗe ngaran diga daayiiɗum haa maaɗa. Jooɗiiɓe lesɗe daayiiɗe njottoto nder mahi maaɗa, an berniwol ceniiŋgol, ɓe ngaddanan laamiiɗo asama dokke. Gide garanɗe fuu ceyoto ngam maaɗa. Zamanuuji fuu, ɓe ewnete Berniwol cuɓaaŋgol.

¹⁴Bone laatanto huɗanɓe ma. Bone laatanto nattinanɓe ma, kippanɓe mahi ma, yibbinanɓe cuuɗi ma towɗi! Ammaa barka laatanto neɗɗinanɓe ma haa foroy.

¹⁵Nden Urusaliima seyan ngam hooliiɓe Allah, ngam ɓe kawtan, ɓe maŋgtan Jawmiraawo duumiiɗo. Barka laatanto yiɗɓe ma! Barka laatanto boo seyortooɓe salaaman ma.

¹⁶Barka laatanto sunotooɓe ngam sarru ma! Fakat, ɓe ceyoto ngam maaɗa, ɓe mbelmbeltan haa foroy bee maaɗa. Mi maŋgtan Jawmiraawo, laamiiɗo mawɗo.

¹⁷Ɓe nyiɓtoto Urusaliima, suudu Allah daroto nder maagol haa foroy. Urusaliima, mi seyoto masin nde luttuɗum ummaatoore laaran tedduŋgal maaɗa, maŋgtan Laamiiɗo asama! Ɓe mbaɗan dammuɗe maaɗa bee kaa'e safira e kaa'e haako-haakooje. Ɓe mahan mahi fuu bee kaa'e marɗe saman. Cuuɗi ma towɗi bee kaŋŋeeri e mahi maaji bee kaŋŋeeri laaɓndi. Laabi maaɗa huuɓidinaaɗi bee sardiyus e kaa'e booɗɗe ɗe lesdi Ofir.

¹⁸Dammuɗe berniwol Urusaliima ngiman gimi seyo e cuuɗi maagol fuu ngookan: Halleluya! Tedduŋgal laatano Allah Isra'iila! Suɓaaɓe maŋgtan innde maako seniinde haa foroy.”