Read Fulfulded Tobit 14 Bible Online

Tobit 14 - Fulfulded bible

Tobit 14

¹Bana nii Tobit timminiri maŋgtoore mum.

²Tobit maayi nder de'ere, duuɓi mum teemerre e sappo e ɗiɗi. Ɓe uwi mo bee neɗɗaaku haa Niniwe. O woodino duuɓi cappanɗe joweego e ɗiɗi saa'i o wumi. Nde o wumti, o yeeɗi nder feecaare, o hokki talaka'en sadaka ɗuuɗka. Tum o ɗon maŋgta Allah, o ɗon teddina mo.

³Hiddeko o maaya, o ewni ɓiyiiko Tobiyas, o sarwi mo nii: “Ɓiŋngel am, yahru ɓikkoy maaɗa,

⁴ndille law haa lesdi Mediya. Mi tammi kiita Allah ka annabi Nahum wolwi dow Niniwe hiɓɓoto. Ko annabi'en Isra'iila'en mbi'i fuu hiɓɓoto. Bolle maɓɓe fuu kiɓɓoto to saa'i man yottake. A jooɗoto jam haa lesdi Mediya, joonde ma haa ton ɓuran nde lesdi Assiriya malla Baabila. Ngam fakat ko Allah wi'i fuu hiɓɓoto. O miccitittaako bolle maako. Deerɗiraaɓe meeɗen jooɗiiɓe lesdi Isra'iila, ɓe caŋkititteeɓe, ɓe daheteeɓe daayiiɗum e lesdi mboondi ndi'i. Lesdi ndi'i laatoto ladde, Samariya bee Urusaliima perwan. Ɓe ngulan haykaliiru Allah, ndu laatoto winnde wakkati seɗɗa.

⁵Ammaa Allah yurminan ɓe fahin, o wartiran ɓe nder lesdi Isra'iila. Ɓe nyiɓtoto haykaliiru, ammaa nde wooɗataa bana aartunde, sey to wakkati mo Allah tabiti yottake. Nden Isra'iila'en ngartan daheeki, ɓe nyiɓtoto Urusaliima, nyiɓaalo man wooɗan masin. Ɓe nyiɓtoto haykaliiru bana annabi'en mbi'no ɓooyma.

⁶Ummaatooje duniyaaru loroto haa Allah, ɓe kulan mo nder gooŋgaaku. Ɓe ngudinan labbi faasikiiji njahruɗi ɓe nder majjere, ɓe maŋgtan Allah duumiiɗo, ɓe ngaɗan gooŋgaaku.

⁷Wakkati man, Allah hisnan Isra'iila'en tokkiiɓe mo. O hawtan ɓe, o wartiran ɓe haa Urusaliima. O yerdoto ɓe njooɗo haa lesdi Ibrahiima, ɓe njooɗoto ton jam haa foroy. Yiɗɓe Allah bee gooŋga ceyoto, ammaa hakke'en, accuɓe tokkaago mo majjan diga duniyaaru.

⁸Jonta ɓikkoy am, ndaa ko mi umrata on: Ndewe Allah bee gooŋga, ngaɗe ko o yiɗi. Ekkitine ɓikkoy mon ɓe ngeeɗa nder adilaaku e ɓe mbaɗa sadaka haa laafuɓe. Sey ɓe ciftora Allah, ɓe maŋgta mo bee gooŋga tum tum e bee semmbe maɓɓe fuu. An kam, Tobiyas ɓiŋngel am, sey a wurto Niniwe, taa a jooɗa haa ɗo. To a uwi daada ma sera am, taa faɓɓu haa nokkuure nde'e. Fakat aybe ɗon laya jamum, yimɓe ɗon ɗuuɗɗina faasikaare, semteende walaa.

¹⁰Ɓiŋngel am, siftor noy Nadab waɗani Ahikar baaba mum daddiya: O uwi mo o geeto. Ammaa Allah lorni halleende nde'e dow maako yeeso baaba maako. Ahikar wa'iti haa jayŋgol, ammaa Nadan, Allah jippini mo nder nyiɓre haa foroy, kaŋko giɗnooɗo mbargo Ahikar. Fakat Ahikar mo wallino laafuɓe, hisi tuufnorgol waade ngol Nadab waɗani mo. Ammaa Nadab do'i nder tuufnorgol mum, maayi.

¹¹Nii ɓikkoy am, ndaare toy sadaka yahrata e ndaare noy waade reenirta faasiki'en. Ndaa jonta, mi ɗon maata yoŋki am ɗon wurto.” Ɓe mballini mo dow be'itte, o maayi. Ɓe uwi mo bee neɗɗaaku.

¹²Nde daada Tobiyas maayi, o uwi mo kommbi baaba maako. Nden, o dilli lesdi Mediya bee debbo maako, o jooɗi nder Ekbatan haa esiiko Raguyel.

¹³O suklani esiraaɓe maako wakkati ndottaaku maɓɓe. Nde ɓe maayi, o uwi ɓe haa Ekbatan. O roni jawdi Raguyel bana o ronno ndi Tobit, baaba maako.

¹⁴O yeeɗi duuɓi teemerre e sappo e joweeɗiɗi nder neɗɗaaku, nden o maayi.

¹⁵Hidde o maaya, o nani halkere Niniwe, o laari yimɓe Niniwe ɓe Siyajar, laamiiɗo Mediya, dahi. O maŋgti Allah ngam sarru ngu o ukkani yimɓe Niniwe e yimɓe Assiriya. O seyori halkere Niniwe, o maŋgti Jawmiraawo Allah maŋgteteeɗo haa abada abadin.