Read Fulfulded Tobit 4 Bible Online

Tobit 4 - Fulfulded bible

Tobit 4

¹Nyalde man Tobit siftori ceede ɗe o accino haa Gabayel nder berniwol Rages nder lesdi Mediya.

²O numi nder maako: “Nde mi tori Allah mi maaya, ndikka mi ewna ɓiɗɗo am Tobiyas, mi wolwana mo haala ceede man hidde mi maaya.”

³O ewni Tobiyas go. Nde Tobiyas yotti, o wi'i mo: “To mi maayi, uwam bana no haani. Neɗɗin daada ma, taa wudin mo koo nyalde woore nder ngeendam maako. Waɗan mo ko fottanta mo fuu, taa mettin mo.

⁴Taa yejjitit, ɓiŋngel am, sababuuji ɗuuɗɗi o yiidi wakkati a ɗonno nder reedu maako. To o maayi, uw mo kommbi am, nder yenaande woore bee am.

⁵Ɓiŋngel am, taa yejjitit Jawmiraawo balɗe ma fuu. Accu waɗgo hakkeeji e luutgo umrooje Allah. Nder ngeendam ma fuu, waɗ ko laati adiliijum, taa tokka laawol kalluŋgol.

⁶Ngam yeeɗanɓe nder gooŋga fuu kumtan nder ko ɓe mbaɗata.

⁷Hoocu yeɓre nder jawdi ma, hokku ɗum huuwanɓe kuuɗe adiliije. Waɗ ɗum bilaa mimsitaare. Taa ɗoyla laafuɗo, Allah boo ɗoylataako ma.

⁸Hokku sadaka fodde mardi ma koo ndi ɗuuɗndi malla ndi famardi. To a mari seɗɗa, taa hul hokkugo nder seɗɗa maajum.

⁹Bana nii, a siganan hoore ma ndesaari ngam nyalɗe ɓillaaje.

¹⁰Ngam dokkoowo sadaka haa laafuɗo hisan maayde. Caahu maako haɗan mo nastugo nder nyiɓre.

¹¹Koo moy hokki sadaka, lii'ani Allah Ɓaŋiiɗo dokkal ngal o yerdoto.

¹²Ɓiŋngel am, aran taa waɗ daakaareeku. Ɓaŋ debbo mo lenyol kaaka maaɗa. Taa ɓaŋ debbo jananno ngam en ɓiɓɓe annabi'en. Ɓiŋngel am, taa yejjitit kaakiraaɓe men Nuuhu, Ibrahiima, Isiyaaku fuu ɓaŋi rewɓe lenyol muuɗum'en. Allah barkiɗini ɓe, hokki ɓe ɓikkoy, o iinani danygol maɓɓe lesdi.

¹³Jonta ɓiŋngel am, yiɗ deerɗiraaɓe ma, taa yaw deerɗiraaɓe ma worɓe e rewɓe ngam haa ɓaŋga debbo caka maɓɓe. Gooŋga, mawnitaare woni daliila halkere e jiiɓotiral maŋngal, mbaateendam woni daliila laafere e ɓillaare naawnde, ɗum daada weelo boo.

¹⁴Taa reen jaŋngo ngam hokkugo ngeenaari kuuwanoowo ma fuu. Yoɓ mo law. To a tokki Allah bana nii o warjoto ma. Hakkil, ɓiŋngel am, nder kuuɗe ma fuu. Sey a laato ne'iiɗo nder kuugal ma fuu.

¹⁵Taa waɗ goɗɗo ko a wanyi. Taa yar mbal haa a wuyka. Taa accu wuykere ardine.

¹⁶Senndu nyaamdu ma bee beelaaɗo, ɓornu temmbuɓe. Diga ɗuuɗeeŋga jawdi ma, hokku sadaka bilaa mimsitaare.

¹⁷Neldu nyaamdu ma haa maayiti adiliijo, ammaa taa neldu to o hakkeejo.

¹⁸Sarwa hikmaajo fuu, taa yeeba sawari booɗɗo.

¹⁹Koo ndeye fuu yettu Allah Jawmiraawo. Tora mo o darna laawol ma e o humtane anniyaaji ma fuu e ko ngiɗɗa waɗgo fuu. Ngam hikma laataaki mardi ummaatoore koo ndeyeere, ammaa sey Allah tan. O dokkoowo jawdi fuu, o leesna mo o yiɗi fuu haa joonde maayɓe. Jonta ɓiŋngel am, siftor wasuyeeji ɗi'i, taa a yejjitaa ɗi sam.

²⁰Ndaa ko mi yiɗi anndingo ma jonta: Mi acci ceede kilo teemeɗɗe tati haa Gabayel ɓii Gabaryaahu haa Rages nder lesdi Mediya.

²¹Taa hul ɓiŋngel am, to en laafi. A maran jawdi ɗuuɗndi to a ɗowtanake Jawmiraawo Allah, to a daayake hakke fuu e to a waɗi ko o yiɗi.”