Read Fulfulded Yudit 1 Bible Online

Yudit 1 - Fulfulded bible

Yudit 1

¹Nder nduuɓu sappo e ɗiɗaɓu ndu Nabukodonosor, laamiiɗo Assiriya, laamani berniwol maŋngol bi'eteeŋgol Niniwe, Arpasad ɗonno laami dow Mediya'en haa Ekbatan laamorde muuɗum.

²Arpasad taarni berniwol man bee mahol kaa'e. Hayre fuu woodi njaajirka meetir gootel bee reeta e njuutirka boo meetir tati. Mahol man ɗon towi deydey meetir cappanɗe tati e jowi, njaajirka maagol boo noogas e jowi.

³Haa dammuɗe berniwol man, laamiiɗo nyiɓi cuuɗi aynorɗi. Towirka maaji meetir cappanɗe jowi, caɓɓaaje maaji boo njaaji deydey meetir cappanɗe tati.

⁴Dammuɗe man boo ɗon towi deydey meetir cappanɗe jowi e njaajirka maaje boo meetir noogas haa mooɓe konu e balmi muuɗum'en e sooje'en yahooɓe bee kosɗe calo gal ton.

⁵Nder nduuɓu laamu maako sappo e ɗiɗaɓu, Nabukodonosor hippoyi laamiiɗo Arpasad haa yayre Ragaw.

⁶Yimɓe wonɓe dow kooseeje e haa poomole maaje Efratis, Tigiris e Hidaspu fuu kawtani mo bee wonɓe haa yayre Ariyok, laamiiɗo Elimayis'en. Nii non, mooɓe konu lesɗe ɗuuɗɗe mooɓti ngam honoygo Kaldiya'en.

⁷Nabukodonosor, laamiiɗo Assiriya, neli nelaaɓe mum gal alkibilaaji fuu: Haa fuunaaŋge haa lesdi Persiya, haa hiirnaaŋge haa Siliisiya, Damas e Liban, haa Antiliban e haa fomoonde Mbeela.

⁸O neli haa yimɓe hooseere Karmel, haa Galaad, haa Galiili e haa yayre Yisre'el mawnde,

⁹haa gure Samariya e nder taƴre wonnde gaɗa maayo Urdun haa yotti Urusaliima, Batane, Kelus, Kades, haa yotti maayo wonŋgo dow keerol bee Misra e ko ɓuri daayaago fahin haa gure Tapanes e Ramses e nder taƴre lesdi Gosen

¹⁰O neli boo haa gure Tanis e Memfis e gure luttuɗe haa Misra, haa yotti keerol Etiyopiya.

¹¹Ammaa yimɓe gure limtaaɗe ɗe'e fuu camɗinaay nelal man, ɓe cali hawtanaago mo haa konu man. Ɓe kulaay laamiiɗo man ngam ɓe koociri mo bana goɗɗo meereejo. Nelaaɓe maako kuuci juuɗe cooke, ɓe toskaaɓe.

¹²Nabukodonosor faami o semtinaama. O heewi mone, o hunori koromwal laamu maako, o waatoto yimɓe man. O nattinan yimɓe Siliisiya, Damas e lesdi Siriya fuu, non boo Mo'ab, Ammon, Yahudiya fuu e koo Misra, diga fomoonde Mbeela haa maayo Maaliya.

¹³Nder nduuɓu laamu Nabukodonosor sappo e joweeɗiɗaɓu, o hippoyi Arpasad, o jaali ɗum. O farti sooje'en maako e wa'iiɓe pucci e mootaaji pucci maako.

¹⁴O nyaami gure konneejo maako haa o yotti Ekbatan. Ton o jabti cuuɗi aynorɗi, o sampiti babe booɗɗe fuu, o ɗiggini wuro wooɗŋgo ngo'o, o wartiri ngo winnde.

¹⁵Nabukodonosor taasni Arpasad dow hooseere Ragaw, o mbari mo bee jaaral, o nattini mo haa foroy.

¹⁶Nden o warti Niniwe bee sooje'en maako ɗuuɗɓe, o waɗi juulde hawtaade bee maɓɓe balɗe teemerre e noogas.