Read Fulfulded Yudit 10 Bible Online

Yudit 10 - Fulfulded bible

Yudit 10

¹Nde Yudit timmini toraago e wolwango Allah Isra'iila bolle ɗe'e,

²o ummi o ewni korɗo maako. Nden o jippi haa suudu maako, haa o woowi jooɗaago nyalɗe ciwtorɗe e nyalɗe juulɗe boo.

³O ɓorti limce buhuuje e suddaare maako, o yiiwi, o waɗi uurdi. Ɓaawoɗon, o mo'itini gaasa maako, o haɓɓi ka bee leppel feere, o ɓorni limce booɗɗe ɗe o ɓornanno yaake Manasse, goriiko, ɗonno bee yoŋki.

⁴O faɗɗi paɗe, o waɗi pawne maako: Koɗoy, jawe, kalagaaje e yerihon. O laati ŋarniiɗo masin deydey ngam estugo worɓe yi'anɓe mo.

⁵O hokki korɗo maako kanyakanyaawu inaboojam e mbulku nebbam. O hebbini buhuure bee tamseeje sa'iiruuri e tamseere ɓenndalooje jorɗe e tamseeje e tamre kosam. O saawi kuuje ɗe'e, o hokki ɗe korɗo maako.

⁶Nde ɓe ɗon ngurto gal dammugal Baytuliya, ɓe tawi Ojiyas bee ndotti'en berniwol ɗiɗo, Kabiris e Karmi, ɓe ɗon haa aynirde.

⁷Nde ɓe ndaari no yeeso maako sannjiri e limce maako boo kese, ɓe kayɗini daliila ŋarol maako. Ɓe mbi'i mo:

⁸“Allah kaakiraaɓe men woonane, o yerdo anniyaaji ma kiɓɓa ngam tedduŋgal jama'aare Isra'iila e Urusaliima fuu!”

⁹Yudit sujidi yeeso Allah, wi'i ɓe: “Umre ɓe maɓɓitana yam dammugal berniwol, ngam mi yaha mi waɗa ko en mbolwidi.” Ɓe umri aynooɓe maɓɓitana mo bana o ƴami fuu.

¹⁰Kamɓe boo ɓe mbaɗi bana non. Nden o wurtodi bee korɗo maako. Yimɓe berniwol ɗonno ndaara mo yaake o ɗonno jippo hooseere e o ɗonno taƴta waadiwol. Ɓaawoɗon ɓe acci laargo mo.

¹¹Rewɓe ɗiɗo go njehi cir nder waadiwol. Sooje'en Assiriya'en aynooɓe ngari fottugo bee maɓɓe.

¹²Ɓe ndarni Yudit, ɓe ƴami mo: “Jama'aare ndeye iwɗaa? Toy iftuɗaa? Toy njahataa?” O jaabi: “Mi Ibraniŋkeejo. Mi doggi ɓe ngam ɓe ɓadake nastugo juuɗe mon.

¹³Mi yiɗi laargo Olofernes, mawɗo ardiiɓe sooje'en mon ngam mi hokka mo habaruuji laaɓɗi. Mi wi'an mo toy o saalorto ngam taƴtugo kooseeje ɗe'e bilaa halkugo koo gooto caka sooje'en maako.”

¹⁴Wakkati sooje'en ɗon nana mo, ɓe ɗonno ndaara yeeso maako. Ɓe tawi o ŋarniiɗo masin. Ɓe mbi'i mo:

¹⁵“A hisni hoore ma nde a yaawi wargo haa mawɗo amin. Jonta, yah haa bukkaaru maako. Woɗɓe caka amin ɗoftete haa maako.

¹⁶To a ɗon yeeso Olofernes, taa hultor. Wi' mo ko a wi'i min, o woonante.”

¹⁷Nden, ɓe cuɓi sooje'en teemerre ngam ɗoftugo Yudit e korɗo maako. Ɓe njahri ɓe haa bukkaaru Olofernes.

¹⁸Nde ɓe anndini Yudit yotti haa saŋngeere, sooje'en fuu ɗonno ndogga ngam laargo mo. Ɓe ɗonno taaro mo yaake o ɗonno reena haa yaasi bukkaaru Olofernes, ɓe maatini ɗum garki maako.

¹⁹Ɓe kayɗini ngam ŋarol maako e daliila maako ɓe ƴamƴamtiri dow jama'aare Isra'iila, ɓe mbi'mbi'tiri: “En potaay yawaago jama'aare marnde irin rewɓe bana nii. Taa accen bee yoŋki koo gorko gooto caka Isra'iila'en: Luttanɓe bee yoŋki mbaawan sargugo yimɓe fuu!”

²⁰Sooje'en aynooɓe Olofernes e mawɓe sooje'en maako ngurti, nastini Yudit haa nder bukkaaru.

²¹Olofernes ɗonno siwto dow leeso mum, les sannge ngaɗaaŋga bee batta mboɗeeha bee pawne kaŋŋeeri e luuluuje marɗe saman.

²²Nde ɓe anndini mo Yudit yottake, o ɓaditi dammugal bukkaaru. Huuwanooɓe maako jogiiɓe pittirlaaji kuuwraaɗi bee cardi ardi mo.

²³Nde Yudit yotti yeeso Olofernes e mawɓe sooje'en maako, ɓe fuu maɓɓe ɓe kayɗini daliila ŋarol maako. Yudit turi yeeso maako, sujidi, ammaa huuwanooɓe Olofernes ɓaŋgti mo.