Read Fulfulded Yudit 11 Bible Online

Yudit 11 - Fulfulded bible

Yudit 11

¹Olofernes wi'i mo: “Taa hultor debbo. Mi meeɗaay yarnugo bone haa goɗɗo giɗɗo huuwango Nabukodonosor, laamiiɗo duniyaaru fuu.

²To yimɓe jama'aare ma jooɗiinde dow hooseere nde'e yawaaki yam, mi honataano ɓe. Kamɓe ɓen tefi ɗum.

³Jonta, wi' am: Ngam ɗume a doggi ɓe e a wari haa amin? A wari ngam hisnugo yoŋki ma na? Taa hultor! Jemmaare nde'e a hisni hoore ma hannde e koo yeeso boo.

⁴Walaa mo ɓillata. Ammaa ɓe njogete booɗɗum bana ɓe njogoto huuwanooɓe jaagorɗo am, laamiiɗo Nabukodonosor”.

⁵Yudit jaabi mo: “Duŋan korɗo ma wolwa yeeso ma, jaɓ bolle maako. Nanam jaagorɗo, jemmaare nde'e mi fewataa ma sam.

⁶To a jaɓi sawari am, Allah bee hoore mum hiɓɓinan anniyaaji ma. A jaaloto nder ko kuuwata.

⁷Nde nii Nabukodonosor, laamiiɗo duniyaaru fuu o geeto e baawɗe maako mawɗe, mi huni o neli ma ngam a jo'itina geeto fuu dow laawol darnuŋgol. Barka ma, yimɓe ɗowtanto laamiiɗo. Ko ɓuri, barka baawɗe ma, dabbaaji ladde, dabbaaji saare e colli ngeeɗan ngam Nabukodonosor e saare mum.

⁸Min nani ɓe ɗon mbolwa dow hikma ma e baawal ma boo. Duniyaaru fuu anndi, walaa gorɗuɗo bana ma haa laamu man fuu, marɗo kirseeku ɗuuɗŋgu e annduɗo jahargal konu.

⁹Min anndi bolle ɗe Akiyor wolwi yeeso dawrooɓe ma: Yimɓe Baytuliya njaɓɓi Akiyor, nden o lornani ɓe ko o wi'i yeeso ma.

¹⁰Jawmu am e jaagorɗo am, hakkilan bolle maako booɗɗum, numtu ɗe, ngam ko o wi'i ɗum gooŋga: Jama'aare amin yarataa bone, koo ko kaafahi waɗata nde sonaa to jama'aare man waɗi aybe dow Allah maare.

¹¹Kanjum waɗi jonta. Ngam maajum a huucataa sonaa to a jaali ɓe: Waade waran Isra'iila'en ngam aybe maɓɓe lori dow maɓɓe, ɓe ummini tikkere Allah bana foroy nde ɓe mbaɗi aybe fuu.

¹²Ɓe ngalaa nyaamdu e ndiyam boo saɗi. Ngam maajum ɓe tammi hirsugo dabbaaji maɓɓe e nyaamgo ko Tawreeta Allah haɗi ɓe.

¹³Ɓe nyaaman alkamaari ndi ɓe aarti sodgo, ɓe ndokkataa zakka inaboojam e nebbam, ɗum ɓe njo'ini sera. Kuuje ceniiɗe ɗe'e, sonaa liman'en huuwooɓe yeeso Allah nder haykaliiru Urusaliima meemata ɗe. Walaa goɗɗo feere nder jama'aare amin foti meemgo ɗe.

¹⁴Ammaa yimɓe Urusaliima ɗowtanaaki umroore nde'e. Ngam maajum yimɓe Baytuliya boo neli nelaaɓe haa yeeso dawrooɓe Urusaliima ngam ƴamgo duŋayeere nde'e kamɓe boo.

¹⁵Nyalaade nde ɓe keɓata duŋayeere man, ɓe nyaaman irin nyaamduuji man. Nden Allah hokkete yimɓe ɓe'e, a halkan ɓe.

¹⁶Nde mi nani haala ka'a, min, korɗo ma, mi doggi wuro maɓɓe. Allah neli yam haa ɗo ngam mi huuwa bee maaɗa kuuɗe ɗe kayɗinta yimɓe duniyaaru nanɓe ɗum fuu.

¹⁷Fakat, mi dewoowo Allah mo asama, mi ɗon toro fajiri e jemma. Jonta jaagorɗo, mi yeli jooɗaago kommbi ma. Ammaa jemma fuu, mi wurtoto saŋngeere ngam mi yaha mi toroya nder luggol. Allah anndintam to yimɓe Baytuliya mbaɗi aybe man.

¹⁸Mi waran mi maatine. Nden a honan ɓe bee mooɓre konu ma fuu, walaa ko gooto caka maɓɓe haɓtata ma.

¹⁹Mi ɗoftete haa lesdi Yahudiya e haa Urusaliima, mi jo'inan koromwal laamu ma caka berniwol. A yahran yimɓe maagol bana tokkere baali ɗi ngalaa gaynaako, koo rawaandu wohataa ma. Allah wolwani yam, aarti anndingo yam kuuje ɗe'e fuu hiddeko ɗe laato. mi nelaama haa mi yecce ɗum.”

²⁰Bolle Yudit fottani Olofernes e mawɓe sooje'en maako fuu. Ɓe mani hikma maako, ɓe mbi'mbi'tiri:

²¹“Haa duniyaaru fuu, en tawataa debbo ŋarniiɗo, bolwanɗo bolle kakkilɗe bana nii.”

²²Ɓaawoɗon Olofernes wi'i Yudit: “Allah waɗi booɗɗum nde o neli ma haa ɗo daayiiɗum bee jama'aare ma, ngam hokkugo min jaalorgal e halkugo yawiiɓe jaagorɗo am Nabukodonosor.

²³Naa a ŋarniiɗo tan, ammaa a baawɗo wolde boo. To a waɗi bana mbi'ɗa, Allah ma laatoto Allah am boo. A jooɗoto haa laamorde Nabukodonosor, a laatoto tedduɗo nder duniyaaru fuu.”