Read Fulfulded Yudit 12 Bible Online

Yudit 12 - Fulfulded bible

Yudit 12

¹Olofernes yahri Yudit haa taabal nyaamgo muuɗum marŋgal nyaamruɗe cardi. O umri ɓe ndokka mo nyaamdu e njaram inaboojam maako boo.

²Ammaa Yudit wi'i mo: “Mi fotaay nyaamgo ngam taa mi luuta Tawreeta Allah am. Mi nyaaman ko mi waddi tan.”

³Nden Olofernes wi'i mo: “Ammaa to siga ma timmi, noy min keɓrante irin nyaamdu man? Walaa boo Isra'iilaajo haa saŋngeere amin.”

⁴Yudit jaabi mo: “Bana a geeto, jaagorɗo am, hiddeko siga am timma, Jawmiraawo hiɓɓanan ko o annini bee juŋngo am.”

⁵Ardiiɓe sooje'en Olofernes njahri mo haa bukkaaru feere. O ɗaani haa caka jemma. Hiddeko subaha, o ummi,

⁶o neli dow Olofernes haa o umra aynooɓe acca korɗo ma wurto saŋngeere ngam toraago.

⁷Olofernes umri aynooɓe ɓe acca mo o saalo. Yudit waɗi balɗe tati haa saŋngeere. To jemma waɗi, o ɗonno yaha haa luggol hooseere Baytuliya ngam o yiiwo haa seeɓoore ndiyam.

⁸Nde o ɗonno warta, o ɗonno toro Jawmiraawo, Allah Isra'iila, o ɗowa mo ngam haa o hisna jama'aare maako.

⁹Nde o seni hoore maako, o warti haa bukkaaru maako. O ɗon jooɗi ton haa asiri haa saa'i waddango mo nyaamdu.

¹⁰Nyalaade nayaɓre, Olofernes taaskitini nyaamdu ngam huuwooɓe muuɗum ɓurɓe ɓadaago mo, o ewnaaki koo gooto caka mawɓe sooje'en maako.

¹¹O wi'i Bagowas, cortaaɗo aynanɗo kuuje maako fuu: “Yah, tawoy debbo Isra'iilaajo mo aynata. Waawtu mo o wara, o nyaamda e o yarda bee amin.

¹²Ngam ɗum cemtuɗum haa amin, to min ɗali irin debbo oo dilli bilaa waaldugo bee maako. To min ewnaaki mo, o jalan dow amin.”

¹³Bagowas acci Olofernes, yehi haa Yudit, wi'i mo: “Debbo ŋarniiɗo, taa miija yahgo haa jaagorɗo am. O teddini ma nde o ewni ma. A yaran inaboojam bee amin e hannde a seyoto bana budurwa'en jooɗiiɓe nder laamorde Nabukodonosor.”

¹⁴Yudit jaabi mo: “Min mi moy haa mi waabo jaagorɗo am? Mi waɗan ko o mari haaje fuu bee seyo ngo mi siftorta haa foroy.”

¹⁵O yehi ɓornaago limce ɗe ɓuri wooɗgo, o fawni bee pawne maako fuu. Korɗo maako yehi haa bukkaaru Olofernes e o we'iti lare baali haa yeeso mawɗo sooje'en go. Kanje Bagowas hokkino Yudit ngam o forto yaake o ɗonno nyaama.

¹⁶Yudit nasti bukkaaru, waali dow lare. Olofernes seyi, sakli. Yoomre ummi nder ɓernde maako bee semmbe. O yiɗno estugo mo diga nyannde nde o laari mo.

¹⁷Olofernes wi'i Yudit: “Yar e seyoda bee amin!”

¹⁸Yudit jaabi: “Ooho Jaagorɗo, mi yaran, ngam mi meeɗaay darjiɗineego bana hannde nde.”

¹⁹Yeeso Olofernes, o nyaami, o yari ko korɗo maako defani mo.

²⁰Olofernes seyi daliila maako, o yari inaboojam ɗuuɗɗam, bana o meeɗaay yargo diga ɓe ndanyi mo.