Read Fulfulded Yudit 13 Bible Online

Yudit 13 - Fulfulded bible

Yudit 13

¹Nde jemma jeŋngi, warɓe go fuu kuuci. Bagowas maɓɓi dammugal bukkaaru Olofernes yaasiwal, farti yimɓe fuu. Ɓe fuu maɓɓe ɓe nasti, ɓe comi ngam ɓe njari ɗuuɗɗum.

²Olofernes waali dow leeso mum, o wuyki ndul. Yudit tan luttidi bee maako nder suudu.

³O wi'no korɗo maako daro haa yaasi bukkaaru, o reena mo haa wakkati wurtaago maako diga saŋngeere. ngam waɗgo do'a. Bana non o wi'no boo Bagowas.

⁴Yimɓe fuu kuuci. Walaa koo gooto lutti haa waaleteendu. Yudit dari kommbi Olofernes, waɗi do'a bana nii: “Jawmiraawo, Allah Baawɗo, woonanam haa mi huuwa kuugal nga'al ngam tedduŋgal Urusaliima.

⁵Wakkati waɗi ngam hisnugo jama'aare ma. Waɗ mi hiɓɓina anniya am, waato mi halka konne'en ummaniiɓe min.”

⁶Ɓaawoɗon, o ɓaditi leeso, kommbi hoore Olofernes, o hoo'i kaafahi maako.

⁷O ɓesdi ɓadaago leeso fahin, o naŋngi gaasa Olofernes, o wi'i: “Semmbiɗinam jonta, Jawmiraawo, Allah Isra'iila.”

⁸Bee kaafahi, o soppi Olofernes haa daande bee semmbe maako fuu nde ɗiɗi, o ta'i mo daande.

⁹Nden o talli ɓanndu haa les leeso, o itti sannge, o wurti, o hokki korɗo maako hoore Olofernes.

¹⁰Korɗo oo suuɗi nde nder buhuure haa ɓe cigata nyaamdu. Nden ɓe ngurtidi ɓe ɗiɗo fuu bana ko woowa ngam waɗgo do'a. Ɓe taƴti saŋngeere, ɓe taari luggol e ɓe mba'i hooseere Baytuliya, ɓe njotti haa dammuɗe berniwol.

¹¹Yudit wooki diga daayiiɗum haa aynooɓe: “Maɓɓite! Maɓɓite dammugal law! Allah men ɗon wondi bee men! O waŋgini laamu maako haa Isra'iila'en e baawɗe maako dow konne'en meeɗen. Kanjum o waɗi hannde.”

¹²Nde yimɓe Baytuliya nani sawtu maako, ɓe njaawi mooɓtaago haa dammugal berniwol, ɓe ewni ndotti'en.

¹³Yimɓe fuu, diga famarɓe haa mawɓe ngari haa dammugal, ngam gartuki Yudit hayɗini ɓe. Ɓe maɓɓiti dammugal, ɓe njaɓɓi rewɓe ɗiɗo go. Ɓe kuɓɓi yiite ngam ɓe ngi'a laaɓɗum, ɓe taari ɓe.

¹⁴Yudit wi'i ɓe bee sawtu: “Maŋgte Allah! Maŋgte mo! Maŋgte Allah mo accaay woonango jama'aare Isra'iila. Jemmaare nde'e, o huuwtiniri yam ngam nattingo konne'en meeɗen.”

¹⁵Nden o wurtini hoore go diga buhuure, o holli nde yimɓe bee wi'go: “Ndaa hoore Olofernes, mawɗo mooɓe konu Assiriya'en. Ndaa sannge nga o ɗonno waali les maaga, o guykuɗo ndul. Jawmiraawo huuwtiniri debbo ngam mbarugo mo.

¹⁶Bana Jawmiraawo o geeto, kaŋko ayni yam diga nder anniya am. Ndaa ko saali: Ŋarol am esti Olofernes, halki mo. O meemaay yam, mi hisi semteende e toskaare.”

¹⁷Yimɓe fuu kayɗini. Ɓe cujidani Allah, ɓe mbi'i bee hunnduko wooto: “Min maŋgti ma yaa Allah amin, ngam a halki hannde konne'en jama'aare maaɗa.”

¹⁸Ojiyas wi'i Yudit: “Allah Ɓaŋiiɗo barkiɗini ma ɓiŋngel am, ko ɓuri rewɓe duniyaaru fuu. Tedduŋgal woodani Jawmiraawo tagɗo asama e lesdi! Kaŋko yahri ma ngam a ta'a hoore mawɗo konne'en meeɗen.

¹⁹Haa foroy, yimɓe ngejjitittaa tammunde nde marnoɗa. Tum ɓe ciftoran kuugal maŋngal ngal Allah huuwi.

²⁰Allah teddine haa foroy! Allah woonane ngam a hokki yoŋki ma yaake jama'aare men walaa tammunde! Nde a naŋngi laawol darnuŋgol yeeso Allah, a hisni min halkere!” Yimɓe fuu njaabi: “Aamiina!”