Read Fulfulded Yudit 15 Bible Online

Yudit 15 - Fulfulded bible

Yudit 15

¹Nde sooje'en Assiriya'en jooɗiiɓe haa bukkaaji muuɗum'en nani ko saali, ɓe kultori masin.

²Kultoreeŋgol wurtini ɓe diga saŋngeere maɓɓe, saŋkiti ɓe gooto gooto dow laabi luggol e hooseere fuu.

³Saŋnginɓe dow yeereere hooseere taariinde Baytuliya ndoggi. Nden Isra'iila'en fuu waawɓe jogaago balmi taasni Assiriya'en.

⁴Ojiyas neli nelaaɓe haa Baytomestayin, Bebay, Hoba, Kola e haa lesdi Isra'iila fuu ngam anndingo ko saali. Ɓe ɗon ewno yimɓe fuu haa ɓe taasna konne'en, ɓe mbara ɓe.

⁵Nde Isra'iila'en nani ko waɗi, ɓe taasni dogguɓe, ɓe nattini ɓe haa Hoba. Yimɓe Urusaliima e yimɓe hooseere man porti ngam ɓe nanino ko saali haa saŋngeere Assiriya'en. Yimɓe lesdi Galaad e Galiili ukkani konne'en gal sera, ɓe mbari ɗuuɗɓe haa yotti Damas e gure taariiɗe Damas.

⁶Yimɓe luttuɓe haa Baytuliya njippi haa saŋngeere Assiriya'en. Ɓe ɓofti ko woni nder saŋngeere nde e ɓe keɓi ndahalaagu maŋngu.

⁷Nde Isra'iila'en ngarti konu, ɓe kooci ko lutti. Yimɓe gure pamare, hooseere e harde fuu keɓi ndahalaagu maŋngu kamɓe boo, ngam ɗum ɗuuɗi jamum.

⁸Yowakim limanjo mawɗo e dawrooɓe Isra'iila wonɓe haa Urusaliima ngari Baytuliya. Ɓe ngiɗno laargo bee gite maɓɓe kaayeefiiji ɗi Jawmiraawo waɗani Isra'iila. Ɓe ngiɗno boo laargo Yudit ngam ɓe ngaɗana mo barka.

⁹Nde ɓe nasti saare maako, hawtaade ɓe ngaɗani mo barka, ɓe mbi'i mo: “An woni tedduŋgal Urusaliima, an woni neɗɗaaku Isra'iila e daraja asŋgol meeɗen!

¹⁰An waɗi ɗum fuu! An woni daliila mo'ere Isra'iila e Allah seyori kuugal maaɗa. Jawmiraawo Baawɗo barkiɗine haa foroy!” E yimɓe fuu njaabi: “Aamiina!”

¹¹Ɓoftugo kuuje gonɗe nder saŋngeere Assiriya'en hooci balɗe cappanɗe tati. Ɓe ndokki Yudit bukkaaru Olofernes, cardi maako, leese maako, payanɗe maako e ko woni nder bukkaaru maako fuu. O hooci ɗum fuu, o roondi ɗum dow wamnde maako, o mooɓti luttuɗum dow saret.

¹²Rewɓe Isra'iila'en fuu ngari waɗango mo barka. Woɗɓe caka maɓɓe ngimi e ngami ngam maako. Yudit hoo'i haakooji, o hokki rewɓe go.

¹³Yudit e rewɓe man njo'ini dow ko'e muuɗum'en haakooji jaytunhi ɗi ɓe mbami. Yudit ardani yimɓe fuu, o ardani boo gamarle rewɓe man. Worɓe Isra'iila bee balmi muuɗum'en fuu tokki rewɓe go, ɓe meeti meetaleewol haakooji, ɓe ngimi bee sawtu.

¹⁴Caka yimɓe Isra'iila fuu, Yudit yimi yimre yettoore e ummaatoore fuu yimdi bee maako.