Read Fulfulded Yudit 16 Bible Online

Yudit 16 - Fulfulded bible

Yudit 16

¹Ndaa yimre nde Yudit yimi: “Ngimane Allah am bee hoolo bawɗi! Ngimane Jawmiraawo bee leŋngi! Maŋgte mo bee jabuura maŋgtoore, teddine mo, ɗaɓɓite ballal haa maako!

²Ngam Jawmiraawo woni Allah baawanɗo darnugo konu. O teetini yam diga juŋngo konne'en am, o wartiri yam jam haa saŋngeere maako, caka jama'aare maako.

³Mooɓre konu Assiriya'en wari diga kooseeje woyla bee sooje'en ɗuuɗɓe, ɓe limataake. Sooje'en ɗuuɗɓe go naŋngi ceeɓooje ndiyam e sooje'en wa'iiɓe pucci boo keewi haa kooseehon.

⁴Konne'en ngiɗno wulgo lesdi amin, nattingo sukaaɓe amin bee kaafahi, wudingo ɓikkoy amin keccoy haa lesdi, naŋngugo ɓikkoy amin, wartirgo koy maccuɓe e hoocugo budurwa'en amin.

⁵Jawmiraawo Baawɗo huuwtiniri debbo ngam haɗugo ɓe.

⁶Mawɗo maɓɓe do'aaki yeeso sukaaɓe marɓe semmbe, naa ɗum worɓe semmbiɗɓe mbari mo malla yimɓe maapinndi'en kippi mo. Ammaa ɗum Yudit ɓii Meraari jaali mo bee ŋarol mum tan.

⁷Ngam hisnugo Isra'iila diga ɓillaare, o itti suddaare maako, o waɗi uurdi.

⁸O haɓɓi gaasa maako bee leppel. Ngam estugo konneejo, o ɓorni limce booɗɗe.

⁹Paɗe maako mufi gite mawɗo ardiiɓe sooje'en, ŋarol maako hayɗini mo. Bee kaafahi, o ta'i mo hoore.

¹⁰Persiya'en ndiwni yeeso cuusal maako, Mediya'en boo kultori tiiɗal maako.

¹¹Nden jama'aare amin yawiinde wooki gookaali konu, kultoreeŋgol naŋngi Assiriya'en. Yimɓe jama'aare amin tampunde ilini, ɓe kultori, nde wooki, ɓe cakli.

¹²Yimɓe ɓe ɓe ndaari bana maccuɓe njuwi ɓe, ɓe naawnaama naawnere naawnde, ɓe ndoggi bana hulɓe. Ɓe mbaraama ngam Jawmiraawo nasti konu.

¹³Mi yimanan Allah am yimre hesre. Jawmiraawo, a baawɗo, a tedduɗo, baawɗe ma ɗe mawɗe masin, walaa baawanɗo jaalaago ma.

¹⁴Ko tagɗa fuu ɗon huuwane! Ngam a umri e koo ɗume fuu waŋgi, a neli Ruuhu ma e a tafi ɗum fuu. Walaa baawanɗo haɓtaago wolde ma.

¹⁵To a ɓaditake, kooseeje ɗon ɗoofe diga caɓɓaaje muuɗum'en, ɗe cakkine nder maaje, tapaaje njoosa bana taari yeeso ma. Ammaa horminanɓe ma ɗon tammoro yiide ma.

¹⁶Ngam nguleteeŋga he'ataa seynugo Jawmiraawo, kusel guleteeŋgel dow hirsirde, daraja mum famɗi masin haa gite maako. Ammaa kulɗo Jawmiraawo, o teddinteeɗo haa foroy.

¹⁷Bone laatanto ummaatooje gaɗanɗe haɓre bee ummaatoore amin! Jawmiraawo Baawɗo torran ɓe nyalaade darŋgal, yiite e gilɗi nyaaman ɓe, gookaali torra maɓɓe tabitan haa foroy.”

¹⁸Nde Isra'iila'en njotti Urusaliima, ɓe fuu ɓe ndilli haa haykaliiru, ɓe cujidani Allah. Ɓe ceni ko'e maɓɓe, nden ɓe lii'i guleteeɗi, ɓe ngaɗi dokke caahiiɗe e dokke goɗɗe.

¹⁹Yudit yahri kuuje Olofernes ɗe jama'aare hokkino mo fuu haa haykaliiru. Sannge nga o hooci haa suudu waaleteendu mawɗo ardiiɓe sooje'en go, o hokki ɗum Jawmiraawo, ɗum geɗal maako haa kuuje ɗe ɓe njaɓti.

²⁰Lebbi tati, yimɓe mbaɗi juulde yeeso haykaliiru Urusaliima jaalorgal ngal ɓe keɓi, Yudit boo wondi bee maɓɓe.

²¹Ɓaawoɗon koo moy huuci. Yudit lorti haa Baytuliya haa saare muuɗum. O laati tedduɗo nder lesdi man fodde balɗe maako.

²²Worɓe ɗuuɗɓe ngiɗi te'ugo mo. Ammaa diga maayde e uweeki Manasse goriiko, o sali te'eego.

²³Yudit naywi, haari duuɓi. O jooɗi haa saare goriiko haa o ciki duuɓi teemerre e jowi. Hiddeko o maaya, o rimɗini korɗo maako. O senndi jawdi maako hakkunde deerɗiraaɓe Manasse goriiko e deerɗiiko'en. O maayi haa Baytuliya, ɓe uwi mo nder yenaande goriiko. Jama'aare jo'ini maayiti balɗe joweeɗiɗi.

²⁵Walaa mo meeti toonyaago Isra'iila'en yaake o geeti, non boo duuɓi ɗuuɗɗi ɓaawo maayde maako.