Read Fulfulded Yudit 2 Bible Online

Yudit 2 - Fulfulded bible

Yudit 2

¹Nder nduuɓu laamu Nabukodonosor, laamiiɗo Assiriya, sappo e joweetataɓu, nyalaade noogas e ɗiɗaɓre lewru aranndu, yimɓe carwootiri haa saare laamu dow baatol ngol laamiiɗo huni bee wi'ugo o nattinan jama'aaje tuurtaniiɗe mo.

²Nabukodonosor ewni wakiili'en mum e tedduɓe lesdi mum fuu. O waŋginani ɓe sirri anniya maako ngam ukkango jama'aaje man masiibooji.

³Dawrooɓe maako ɗon ngondi bee maako, ɓe fuu ɓe ndawri sey ɓe nattina salnooɓe nootaago ewnaandu laamiiɗo.

⁴Ɓaawo sawari oo, Nabukodonosor ewni Olofernes, mawɗo mooɓre konu, na'ibiijo maako, o wi'i mo:

⁵“Ɗo ɗum umroore laamiiɗo mawɗo, jawmu duniyaaru fuu: Mooɓtu yimɓe men waawɓe konu. Hawtu sooje'en baakin ujine teemerre e noogas yahooɓe bee kosɗe, wa'iiɓe pucci ujine sappo e ɗiɗo.

⁶Nden hippoya lesɗe gonɗe hiirnaaŋge, lesɗe salnooɓe ɗowtanaago umrooje am,

⁷doolu yimɓe jama'aaje maɓɓe, ɓe ndokkammi gese e ndiyam ngam hollugo ɓe leestani yam. Faamtin ɓe, nder tikkere am, mi ɗon nela dow maɓɓe mooɓre konu am. Sooje'en man ɗigginan lesdi maɓɓe fuu, ɓe njaɓtan ɓe kuuje boo.

⁸Naawnaaɓe keewoyan ilaali, maaje paccoyan maayɓe.

⁹Mi yahran naŋngaaɓe haa keeri duniyaaru.

¹⁰Yah, nyaam lesdi maɓɓe dow innde am. To ɓe njaalaama, a sigoto ɓe haa nyalaade nde mi hiitoto ɓe.

¹¹Saliiɓe ɗowtanaago ma fuu, mbar ɓe bilaa enɗam e jaɓtu ko woni nder lesdi maɓɓe fuu.

¹²Mi hunori innde am e laamu am mi waatoto e jonta boo wakkati waataago man waɗi.

¹³An boo Olofernes, hakkilan hoore ma, taa yew koo umroore woore caka umrooje ɗe'e, waɗ ko mbi'mi ɗo bee ko yaawi, ngam min woni laamiiɗo ma.”

¹⁴Nde Olofernes wurti saare laamiiɗo, o mooɓti yerima'en, mawɓe ardiiɓe sooje'en e mawɓe sooje'en lesdi Assiriya fuu.

¹⁵Bana no laamiiɗo umri, o mooɓti waawɓe konu fuu: Sooje'en yahooɓe bee kosɗe ujine teemerre e noogas e wa'iiɓe pucci e fiɗooɓe kuri boo ujine sappo e ɗiɗi.

¹⁶O darni ɓe geɓe geɓe ngam konu.

¹⁷O hoo'i geelooɗi e bamɗe e alfadariije ɗuuɗɗum ngam roondaago doŋgle, o hoo'i boo baali e na'i e be'i ɗi limataake ngam nyaamnugo honooɓe maako.

¹⁸Ɓe taaski njooɓaaje ɗuuɗɗe ngam honooɓe. Ndesaari laamiiɗo wurtini cardi e kaŋŋeeri ɗuuɗɗum ngam yoɓugo ɓe.

¹⁹Olofernes naŋngi laawol bee mooɓre konu man, ngam taaskugo garki Nabukodonosor bee hoore mum e ngam hippaago gure gonɗe hiirnaaŋge bee mootaaji pucci, pucci e yahooɓe bee kosɗe.

²⁰Yimɓe ɗuuɗɓe ɗonno tokki ɓe, ɓe limataake sam bana baɓɓatti malla bana njaareendi.

²¹Ɓe ummi Niniwe, ɓe njehi balɗe tati, ɓe njotti haa yayre Bektilet, nden ɓe njehi ɓe caŋngini les kooseeje gonɗe haa woyla Siliisiya-Dow.

²²Olofernes hippoyi lesɗe kooseeje bee mooɓre konu: Yahooɓe bee kosɗe, wa'iiɓe pucci e mootaaji pucci.

²³O hippoyi Pud e Lud, o jabti kuuje le'i Rasis e Isma'iilu'en wonɓe dow harde hamaadaare, fombina Keleyon.

²⁴Nde o saali dow fomoonde Efratis, o taƴti lesdi Mesopotamiya, o wili berniiji cemmbiɗɗi gonɗi dow fomoonde maayo Aborona, haa o yotti maayo maŋngo.

²⁵O nyaami Siliisiya, o nattini yimɓe haɓtotooɓe mo fuu. Nden o dilli haa fombina haa o yotti lesdi Yafet tiitotirndi bee Arabiya.

²⁶O tufni Madiyan'en, o wuli caŋngeeje maɓɓe, o jabti dabbaaji maɓɓe fuu.

²⁷O taƴti harde Damas wakkati codol alkamaari. O wuli ƴaamle maɓɓe, o nattini dabbaaji maɓɓe e dammooji maɓɓe, o jabti ko woni nder berniiji, wirgi kayweeji, o mbardi sukaaɓe fuu bee kaafahi.

²⁸Nden yimɓe wonɓe dow pomoole Mediteraane ndiwni ngam kulol: Ɗum yimɓe Sur, Okina, Jamniya, Asdod e Askalon.