Read Fulfulded Yudit 4 Bible Online

Yudit 4 - Fulfulded bible

Yudit 4

¹Isra'iila'en wonɓe Yahudiya keɓi habaru no Olofernes, mawɗo ardiiɓe sooje'en laamiiɗo Nabukodonosor mo lesdi Assiriya, waɗi bee lesɗe ɗe o honi, no o jaɓtiri ɗe kuuje, no o sampitiri babe maɓɓe ceniiɗe.

²Ɓe kultori kultoreeŋgol caatuŋgol, ɓe kulani Urusaliima e haykaliiru Jawmiraawo Allah maɓɓe.

³Ko ɓe ngarti daheeki maɓɓe neeɓaay. Neeɓaay ko ɓe kawti haa Yahudiya ngam ɓe cena haykaliiru, kuuwreteeɗe e hirsirde ko konne'en coɓni.

⁴Ɓe neli nelaaɓe haa lesdi Samariya fuu, haa Kona e Bayti-Horon, haa Abel-Mayim e Yeriko, nden haa Koba, Assor haa waadiwol Salem.

⁵Ɓe nyaami kooseeje towɗe, ɓe cemmbiɗini gure lesdi man fuu. Ɓe mooɓti nyaamduuji ngam taaskitinango honooɓe njooɓaari, ngam neeɓaay ɓe ƴaamni ƴaamle maɓɓe.

⁶Wakkati man, Yowakim wonno limanjo mawɗo haa Urusaliima. O winndani yimɓe wuro Baytuliya e Baytomestayim, wuro tiitootirngo bee Esderlon yeeso luggol Dotan.

⁷O umri ɓe njooɗo dow laabi kooseeje jahranɗi haa Yahudiya. Laabi man koyɗi ayneego ngam ɗi paaɗɗi, ɗum ɓurata saalingo yimɓe ɗiɗo.

⁸Isra'iila'en ngaɗi bana no Yowakim limanjo mawɗo e dawrooɓe ndotti'en ummaatoore Isra'iila wonɓe haa Urusaliima umri ɓe.

⁹Koo moy nder lesdi man tori walliinde Allah e suumi bee tiinaare.

¹⁰Worɓe e rewɓe e ɓikkoy e dabbaaji muuɗum'en, hoɗɓe jooɗiiɓe caka maɓɓe, huuwooɓe e maccuɓe, ɓorni limce buhuuje.

¹¹Yimɓe Urusaliima, worɓe, rewɓe e ɓikkoy cujidi yeeso haykaliiru haa tiiɗe maɓɓe meemi lesdi. Ɓe fuu ɓe ndufi ndoondi dow ko'e, ɓe ɓorni limce buhuuje ngam haa Jawmiraawo enɗa ɓe.

¹²Ɓe taarni hirsirde bee suddaare waɗaande bee buhuuje. Ɓe tori Allah Isra'iila ngam taa konne'en kooca ɓikkoy e rewɓe maɓɓe, mbirga gure maɓɓe ɗe Allah hokki ɓe. Ɓe tori Allah fahin ngam taa o acca heefeerɓe coɓna haykaliiru, njanca ndu.

¹³Jawmiraawo nani do'a maɓɓe, laari ɓillaare nde ɓe ngontiri. Yimɓe tokki suumaago balɗe ɗuuɗɗe nder Yahudiya e Urusaliima yeeso haykaliiru Jawmiraawo baawɗo.

¹⁴Yowakim, Limanjo mawɗo, liman'en luttuɓe bee huuwooɓe nder haykaliiru Jawmiraawo, ɓorniiɓe limce buhuuje ɗonno lii'ana Allah nguleteeŋga kala nyalaade fuu, ɓe ɗonno lii'ano mo dokke e sadakaaji jama'aare.

¹⁵Ɓe ɗonno ndufa ndoondi dow meetaleewol maɓɓe, ɓe ɗonno toro Allah bee semmbe maɓɓe fuu ngam o hisna jama'aare Isra'iila.