Read Fulfulded Yudit 5 Bible Online

Yudit 5 - Fulfulded bible

Yudit 5

¹Olofernes, mawɗo ardiiɓe sooje'en Assiriya, heɓi habaru no Isra'iila'en ɗonno taaskano haɓre. Ɓe cukki laabi jahranɗi gal kooseeje, ɓe cemmbiɗini babe dow kooseeje e ɓe cukki boo laabi jahranɗi haa harde.

²Nde ɓernde maako metti, Olofernes ewni ardiiɓe Mo'abi'en, mawɓe ardiiɓe sooje'en Ammoni'en e ngomna'en gure gonɗe haa fomoonde Mbeela.

³O wi'i ɓe: “Yimɓe lesdi Kanaana, anndineeɗam: Jama'aare ndeye ɗon nder kooseeje ɗe'e? Haa berniiji ɗiye yimɓe man njooɗi? Sooje'en maɓɓe ɓe ɗuuɗɓe e balmi maɓɓe ɗi cemmbiɗɗi na? Noy semmbe maɓɓe e baawɗe maɓɓe poti? Laamiiɗo moy ardi mooɓe konu maɓɓe?

⁴Ko waɗi sey kamɓe tan caka jama'aaje hiirnaaŋge cali wargo fotta bee am?”

⁵Akiyor, ardiiɗo Ammoni'en, jaabi Olofernes: “Mawɗo ardiiɓe sooje'en am, duŋanam mi wolwa, min saraakiijo maaɗa. Haa mi wi'e gooŋga dow jama'aare wonnde dow kooseeje ɓadiiɗe bee saŋngeere ma. Mi wolwante laaɓɗum tal.

⁶Yimɓe jama'aare nde'e iwi haa Kaldiya'en.

⁷Ɓe calino ɗowtanaago labbi kaakiraaɓe maɓɓe jooɗiiɓe haa Kaldiya. Ɓe cali al'aadaaji kaakiraaɓe maɓɓe ngam rewgo Allah gonɗo haa asama, kaŋko tan ɓe koociri gooŋɗuɗo. Ɓe parti ɓe diga lesdi maɓɓe, lesdi labbi maɓɓe ɓooymaaji. Ɓe njehi ɓe njooɗi haa Mesopotamiya, ɓe paɓɓi ton.

⁹Ɓaawoɗon, Allah maɓɓe umri ɓe ɓe egga wuro man, ɓe ndilla haa lesdi Kanaana. Ɓe njooɗi ton, ɓe mooɓti kaŋŋeeri e cardi, ɓe laati marɓe tokke ɗuuɗɗe.

¹⁰Ɓaawoɗon, weelo waɗi nder lesdi Kanaana fuu. Ɓe ndilli haa Misra, ton ɓe keɓi ko nyaame. Ɓe laati ton boo jama'aare mawnde nde limataake sam.

¹¹Ammaa laamiiɗo Misra wayliti dow maɓɓe, dooli ɓe tappugo birikje. Ɓe toski ɓe, ɓe laatini ɓe maccuɓe.

¹²Ɓe tori Allah maɓɓe mo ukkani lesdi Misra fuu masiibooji ɗi ngalaa kurgun. Nden yimɓe Misra parti ɓe.

¹³Allah yoorni maayo Maaliya yeeso maɓɓe,

¹⁴yahri ɓe haa hooseere Sina e Kaades-Barne'a. Ɓe parti yimɓe wonɓe nder ladde hamaadaare fuu.

¹⁵Nden ɓe njooɗi nder lesdi Amori'en, ɓe laati semmbiɗɓe haa ɓe mbardi yimɓe Hesbon. Ɓaawoɗon, ɓe taƴti maayo Urdun, ɓe njooɗi dow kooseeje ɗe'e,

¹⁶ɓe parti Kanaani'en, Perezzi'en, Yebusi'en, Sikemi'en bee Girgasi'en fuu. Ɓe paɓɓi nder lesdi man.

¹⁷Saa'i ɓe ngaɗaay ko halli yeeso Allah maɓɓe, ɓe ngeeɗi nder risku. Ngam Allah aynanɗo ɓe yiɗaa kalluɗum.

¹⁸Ammaa to ɓe luuti laawol ngol o sappini ɓe, konne'en ɗonno njaalo ɓe. Ɓaawoɗon boo ɓe ndahaama nder lesdi njananndi. Haykaliiru Allah maɓɓe nattinaama e gure maɓɓe ngartani konne'en maɓɓe.

¹⁹Ammaa ɓe ngartani Allah maɓɓe, ɓe lorti diga gure haa ɓe caŋkitaama ton. Ɓe koociti Urusaliima haa haykaliiru maɓɓe wonno, ɓe njooɗoyi nder kooseeje perewɗe.

²⁰Jonta, mawɗo ardiiɓe sooje'en am, to yimɓe man ɗowtanaaki Allah maɓɓe, to en anndi fakat ɓe ngaɗi aybe, nden kam sey en kippo ɓe.

²¹To jama'aare nde'e walaa aybe, nde luutaay umrooje Allah, ɗal yimɓe man, taa toonyu ɓe, ngam Jawmiraawo Allah maɓɓe hisnan ɓe e duniyaaru fuu jalan en.”

²²Nde Akiyor timmini boliiɗe mum, yimɓe mooɓtiiɓe haa laymaaru mawɗo ardiiɓe go, tuurti. Sooje'en Olofernes mawɓe e ardiiɓe lesɗe gonɗe haa fomoonde Mbeela mbi'i ɓe mbara mo.

²³Ɓe mbi'i: “Walaa ko min kulata haa Isra'iila'en. Ɗum jama'aare nde walaa semmbe, nde walaa daliila haɓgo haɓre saatunde.

²⁴Kippooɗen ɓe Olofernes, sooje'en ma ngaɗan ɓe mukkaande woore.”