Read Fulfulded Yudit 6 Bible Online

Yudit 6 - Fulfulded bible

Yudit 6

¹Nde haraka acci caka yimɓe mooɓtiiɓe kommbi hawtirde ardiiɓe sooje'en, Olofernes, mawɗo ardiiɓe sooje'en Assiriya, wolwani Akiyor yeeso yimɓe iwɓe Mo'ab, wi'i:

²“An a moy Akiyor? E onon soorraaɓe haa Isra'iila, on ɓeye haa ngaron mbolwanon yam bana annabi'en? A wi'i min, taa min kippa Isra'iila'en ngam Allah maɓɓe hisnan ɓe. Ammaa woodi Allah luuti Nabukodonosor na? O tammi yerɓugo sooje'en maako semmbiɗɓe dow yimɓe man, o wila ɓe diga duniyaaru. Allah maɓɓe tammaay hisnugo ɓe!

³Minin kam, min huuwanooɓe Nabukodonosor, min coppoto ɓe soppannde woore. Ɓe mbaawataa haɓtaago baawɗe pucci amin.

⁴Min nattinan ɓe. Kooseeje maɓɓe njaran ƴiiƴam maɓɓe e maayɓe maɓɓe kebbinan yayre maɓɓe. Ɓe keɓataa daraago yeeso amin sam. Ɓe nattinte bana no Nabukodonosor, jawmu duniyaaru, umri. Ko o wolwi laatataako meere.

⁵An boo Akiyor, soojeejo haya Ammoniijo, a wolwi hannde bana zammboowo. A meetataa yiidugo bee am, sey to mi timmini waataago dogguɓe diga Misra.

⁶To mi warti, sooje'en am e mawɓe sooje'en am, ɓe njuwete buttuli bee kaafaaje e jaare, ɓe cakkinte caka mbaraaɓe Isra'iila'en.

⁷Yimɓe am njahrete jonta dow kooseeje, ɓe ɗalete haa gure gonɗe dow diirtorɗe.

⁸Haa ton a reenata mbareeki ma bee Isra'iila'en fuu.

⁹To a ɗon tammi fakat ɓe kisan kam, ko waɗi ɓernde ma ta'i? Ammaa min kam, mi bi'ɗo ma, ko mbolwumi boo laatoto.”

¹⁰Olofernes umri maccuɓe huuwanɓe haa laymaaru muuɗum, ɓe naŋnga Akiyor, ɓe njahra ɗum haa Baytuliya, ɓe ndokkoya ɗum haa Isra'iila'en.

¹¹Maccuɓe go naŋngi mo, ngurtini mo yaasi saŋngeere, gal yayre. Nden ɓe naŋngi laawol kooseeje, ɓe njotti haa ceeɓooje ɓulanɗe gonɗe les Baytuliya,

¹²wuro wonŋgo dow hooseere man. Nde aynooɓe wuro ngi'i ɓe, ɓe kooci balmi maɓɓe, ɓe ngurti Baytuliya. Yimɓe man ɗon jogi piyli, ɓe kaɗi Assiriya'en wa'aago dow bee fiɗugo ɓe bee kaa'e.

¹³Assiriya'en lorti haa les hooseere. Ɓe kaɓɓi Akiyor, ɓe ɗali mo ton, nden ɓe lorti kommbi jawmiiɓe.

¹⁴Isra'iila'en njippi, ɓe tawi Akiyor. Ɓe piisti mo, ɓe njahri mo Baytuliya yeeso ardiiɓe wuro maɓɓe.

¹⁵Yaake man, Ojiyas ɓii Mika mo lenyol Simeyon, Kabiris ɓii Otniyel e Karmi ɓii Melkiyel ngonno ardiiɓe.

¹⁶Ardiiɓe go ewni ndotti'en wuro man fuu. Sukaaɓe e rewɓe fuu ngari haa mooɓtorde man. Ɓe ngaddi Akiyor yeeso yimɓe fuu, Ojiyas ƴami mo ko waɗi.

¹⁷Akiyor jaabi bee lornititgo ko o wi'i haa dawrooɓe Olofernes e ardiiɓe Assiriya'en. O lorni boo bolle mawnitiiɗe ɗe Olofernes wolwi dow jama'aare Isra'iila.

¹⁸Nden, yimɓe mooɓtiiɓe ton, tuggi koppi, cujidi yeeso Allah, ɓe ngooki, ɓe mbi'i:

¹⁹“Jawmiraawo, Allah gonɗo haa asama, laar mawnitaare konne'en amin. Yurmin min nder toskaare nde min ngontiri! Minin, min jama'aare ma, laar ɓillaare nde min ngontiri hannde.”

²⁰Ɓaawoɗon, ɓe nde'itini Akiyor, ɓe ngetti mo ɗuuɗɗum.

²¹Nden Ojiyas yahri mo haa saare mum, ewni boo ndotti'en fuu ngara nyaamda bee maako. Jemmaare man fuu, ɓe mbaali toraago walliinde diga Allah mo Isra'iila.