Read Fulfulded Yudit 7 Bible Online

Yudit 7 - Fulfulded bible

Yudit 7

¹Jaŋngo man, Olofernes umri sooje'en e mooɓe konu luttuɗe fuu, ɗum tiito Baytuliya, ɗum maɓɓa laabi jahranɗi dow kooseeje, ɗum hippo Isra'iila'en.

²Nyannde man, worɓe semmbiɗɓe fuu naŋngi laawol. Mooɓre konu man mooɓti yahooɓe bee kosɗe ujine teemerre e cappanɗe njoweeɗiɗo, wa'iiɓe pucci boo ujine sappo e ɗiɗo, doŋgle e roondiiɓe doŋgle limataake.

³Ɓe taaski haɓre haa harde kommbi Baytuliya les seeɓoore ndiyam. Ɓe keewi lesdi man fuu, diga Dotan haa Belbayim wakeere woore e wakeere woɗnde boo diga Kiyamon haa Yisreyel.

⁴Nde Isra'iila'en ndaari mooɓre ɗuuɗnde nde'e, ɓe kultori, ɓe mbi'mbi'tiri: “Yimɓe man mbilan ko woni haa lesdi ndi'i fuu. Kooseeje, luggol e kooseehon fuu keewan bee ɗuuɗeeŋga maɓɓe.”

⁵Koo moy hooci balmi mum. Ɓe kuɓɓi yiite dow cuuɗi aynorɗi towɗi, ɓe ayni ɗi jemmaare man fuu.

⁶Jaŋngo man, Olofernes wurtini wa'ooɓe pucci mum, ɓe tiitotiri bee Isra'iila'en haa Baytuliya.

⁷O hori laabi jahranɗi haa wuro man. O heɓti haa ceeɓooje ndiyam ngoni, o naŋngi babal man. O jo'ini aynooɓe ton, o lorti saŋngeere maako.

⁸Nden ardiiɓe Edoomi'en fuu, mawɓe sooje'en Mo'abi'en e mawɓe sooje'en iftuɓe fomoonde Mbeela, ngari haa maako, mbi'i mo:

⁹“Jawmu amin, to a nani sawari amin, sooje'en ma koo gooto halkataa.

¹⁰Isra'iila'en koolaaki balmi muuɗum'en, ammaa ɓe kooli babe maɓɓe towɗe dow kooseeje haa ɓe ngoni. Wa'aago dow geereeje kooseeje ɗe'e hoyaay.

¹¹Barkaama, taa tiitotir bee maɓɓe, nden kam koo gooto caka sooje'en ma halkataa.

¹²Jooɗa haa saŋngeere ma, siwtin sooje'en ma haa ɗo. Ɗal sooje'en seɗɗa, haɗ yimɓe yahgo haa ceeɓooje ɓulanɗe les hooseere man.

¹³Ngam haa ton yimɓe Baytuliya man ngarata nyeɗa ndiyam. Ɗomka torran ɓe, ɓe caftan ɓe ndokka wuro maɓɓe. Minin kam, min mba'oto bee mooɓe konu amin dow geereeje kooseeje ɓadiiɗe ngam aynugo e ngam haɗgo koo moy maɓɓe wurtaago wuro man.

¹⁴Yimɓe wuro man fuu, weelo mbardan ɓe: Worɓe, rewɓe e ɓikkoy maɓɓe. Hiddeko en kippo ɓe, maayɓe maɓɓe keewan laabi wuro.

¹⁵A torran ɓe torra caatuka ngam ɓe tuurtani ma, ɓe cali wargo sulhotirgo bee ma.”

¹⁶Olofernes yerdi sawari man, non boo ardiiɓe sooje'en maako fuu, o umri ɓe kuuwa bana nii.

¹⁷Sooje'en Ammoni'en e Assiriya'en ujine njowo, ngari ndari haa yayre, njaɓti ɓulli e ceeɓooje ndiyam Isra'iila'en.

¹⁸Edoomi'en e Ammoni'en njehi kamɓe boo, njooɗi haa kooseeje, tiitiiɗe Dotan. Nden ɓe neli sooje'en woɗɓe gal fombina e fuunaaŋge, tiiti Egerebel, kommbi Kus haa fomoonde maayo Mokumur. Luttuɓe sooje'en Assiriya'en boo njooɗi haa yayre nde'e fuu. Bukkaaji e doŋgle maɓɓe ngaɗi saŋngeere mawnde nde weerni yimɓe ɗuuɗɓe.

¹⁹Isra'iila'en tori Jawmiraawo Allah maɓɓe walliinde, ngam ɓe kultori. Konne'en maɓɓe ɗonno taari ɓe, ɓe ɗalanaay ɓe koo laawol haa ɓe ndoggira.

²⁰Mooɓre konu Assiriya, balmi mum e pucci mum fuu, ɗonno taari ɓe ko waɗata balɗe cappanɗe tati e nayi. Ndiyam yimɓe Baytuliya fuu timmidi.

²¹Okolooje maɓɓe kersi, ndiyam hetaama, walaa mo yarata haa ɗomɗita nyalaade woore.

²²Ɓikkoy tampidi, rewɓe e derke'en ɗomɗuɓe ɗonno ndo'o haa laawol e haa dammuɗe wuro, ɓe ngalaa semmbe koo seɗɗa.

²³Yimɓe wuro man fuu, sukaaɓe, rewɓe e ɓikkoy mooɓti haa Ojiyas e ardiiɓe wuro. Ɓe ngooki, ɓe mbi'i:

²⁴“Allah laato kiitoowo hakkunde mon bee amin! On torri min jamum nde on cali sulhotirgo bee Assiriya'en.

²⁵Jonta, walaa gal tammoriiɗen walliinde. Allah acci min haa juuɗe konne'en meeɗen, en fuu en maayran ɗomka yeeso maɓɓe.

²⁶Ewne yimɓe Olofernes e sooje'en maako, ndokkite mo wuro man ngam o ɓofta ko woni nder maago.

²⁷Ndikka min laato naŋngaaɓe maɓɓe, min laato maccuɓe maɓɓe haa min ngeeɗa. Min ngi'ataa maayde ɓikkoy amin e rewɓe amin bee gite amin.

²⁸Min ɗon toro on, barka asama e lesdi, barka innde Allah amin, Jawmiraawo kaakiraaɓe amin, kiitoowo min deydey aybeeji amin e aybeeji kaakiraaɓe amin, useni kisne min masiibooji ɗi'i hannde.”

²⁹Mooɓtiiɓe ton fuu mboyi, ɓe fuu ɓe ɗonno toro Allah Jawmiraawo bee bojji.

³⁰Nden Ojiyas wolwi, wi'i: “Sey munyal deerɗiraaɓe! Munyen deydey balɗe jowi tawon, Jawmiraawo yi'an jurumɗum men, o ɗalataa en bana nii non.

³¹To balɗe jowi man caalake, o waddaay walliinde maako, mi waɗan ko mbi'ɗon.”

³²Nden o wi'i ɓe, ɓe kuuca: Worɓe puɗɗiti aynugo bana naane dow mahi e haa cuuɗi aynorɗi towɗi, rewɓe e ɓikkoy boo kuuci calaaje muuɗum'en. Jokke yimɓe man fuu mbaati.