Read Fulfulded Yudit 8 Bible Online

Yudit 8 - Fulfulded bible

Yudit 8

¹Nden Yudit nani habaruuji man fuu. Yudit o ɓii Meraari, Meraari o ɓii Os, Os o ɓii Yusufu, Yusufu o ɓii Ojiyel, Ojiyel o ɓii Helkiya, Helkiya o ɓii Ananiyas, Ananiyas o ɓii Gedeyon, Gedeyon o ɓii Rafayin, Rafayin o ɓii Akitoba, Akitoba o ɓii Heliyas, Heliyas o ɓii Hilkiya, Hilkiya o ɓii Eliyabu, Eliyabu o ɓii Natanayel, Natanayel o ɓii Salamiyel, Salamiyel o ɓii Sarasaday, Sarasaday o ɓii Isra'iila.

²Yudit o debbo Manasse, goɗɗo asŋgol e lenyol gootol bee maako. Manasse maayi wakkati codol sa'iiruuri.

³Nde o ɗonno ayna haɓɓooɓe ƴommbe haa gese, naaŋge nyawni mo o waali. O maayi haa Baytuliya, berniwol maako. Ɓe uwi mo haa yenaande saaro'en maako haa ngesa ngonka hakkunde Dotan e Balamon.

⁴Waɗi duuɓi tati e lebbi nayi ko goriiko maayi. O jooɗino haa saare.

⁵Dow suudu maako, o waɗi bukkaaru. O ɗonno ɓorni limce buhuuje les suddaare maako.

⁶Diga nyannde goriiko maayi, o ɗonno suuma kala nyalaade fuu, sonaa nyalaade aartunde siwtorde e nyalaade siwtorde man e nyalaade lewru hesru e balɗe juulɗe ɗe jama'aare Isra'iila.

⁷O ŋarniiɗo masin, o woodi mayaba. Manasse goriiko accani mo kaŋŋeeri e cardi, maccuɓe e horɓe, tokke dabbaaji e gese, kaŋko dawranta jawle man fuu.

⁸Walaa bi'anɗo mo kalluɗum ngam o kulɗo Allah bee gooŋga.

⁹Yudit nani jokke yimɓe mbaati ngam ndiyam woodaa, o nani yimɓe ngurŋgurti dow ardiiɗo berniwol maɓɓe. O nani boo no Ojiyas jaabori yimɓe e o huni o hokkan berniwol haa juuɗe Assiriya'en ɓaawo balɗe jowi.

¹⁰Yudit neli korɗo muuɗum aynanɗo jawle maako fuu haa saare Ojiyas, o ewno Kabiris e Karmi, ndotti'en dawrananɓe berniwol, ngam ɓe ngara haa maako.

¹¹Nde ɓe ngari, o wi'i ɓe: “Naneeɗam, onon mawɓe Baytuliya. On mbaɗi aybe bee ko mbi'ɗon yimɓe hannde e bee hunayeere nde on kuni bee innde Allah e bee inɗe mooɗon. On iini on ndokkan berniwol haa juuɗe konne'en, to Jawmiraawo waddaay ballal mum ɗo e balɗe jowi.

¹²Ammaa onon, on ɓeye haa on toonyo Allah bana no on toonyiri mo hannde e jaɓtugo babal maako caka yimɓe?

¹³Ooho, on esti Jawmiraawo Baawɗo, ammaa on meeɗataa anndugo anniyaaji maako sam.

¹⁴Nde nii on ngalaa baawɗe faamgo ko ɓernde ɓii-aadamaajo saawi, noy paamroton Allah tagɗo ko ngi'eten fuu? Noy keɓtirton ko o numata malla faamgo anniyaaji maako? Deerɗiraaɓe am, taa on tikkina Jawmiraawo Allah meeɗen!

¹⁵Koo to o wallaay en ɗo bee balɗe jowi, o ɗon bee baawɗe hisnugo en nde o yiɗi fuu malla nattingo en yeeso konne'en men.

¹⁶Taa piye dammaana dow anniyaaji Jawmiraawo Allah men. Allah nanndaay bee ɓii-aadamaajo, en mbaawataa doolugo mo waɗgo ko o anninaay malla doolugo ngam sulhu.

¹⁷Ngam maajum nde en ɗon ndeena kisndam maako, tokkooɗen toraago ballal maako. O jaaboto to o muuyi ɗum.

¹⁸Haa gide aartuɗe en haa wargo hannde, walaa asŋgol nder asli men, lenyol nder le'i men malla boo yimɓe berniiji men malla kaywe men cujidani labbi ɗi yimɓe mbaɗi bee juuɗe muuɗum'en bana ko saali ɓooyma.

¹⁹Ngam maajum kaakiraaɓe men njari bone bee konu, konne'en maɓɓe njaɓti ɓe kuuje, nattini ɓe.

²⁰Enen kam, en anndaa Allah feere sonaa Jawmiraawo. Ngam maajum en ɗon tammo o wudintaa en, enen e jama'aare men.

²¹Ngam to berniwol men do'ake, lesdi Yahudiya fuu do'oto. Ɓe koocan kuuje haykaliiru meeɗen, ɓe coɓnan ndu, Allah yoɓnan en bee ƴamgo en yoŋki men.

²²To yimɓe jama'aare men mbaraama, to ɓe dahaama e ɓe laatinaama maccuɓe, to lesdi men nattinaama, aybe loroto dow meeɗen. En laatoto maccuɓe ummaatooje jananɗe. Jaagorɓe men njawoto en, kuɗan en.

²³Maccuŋgaaku men yurmintaa jaagorɓe men, Jawmiraawo Allah men wartiran ɗum toskaare dow meeɗen.

²⁴Bana nii deerɗam'en, anndine yimɓe men ngeendam maɓɓe ɗon haa juuɗe men boo, jam nokkuure seniinde, haykaliiru e hirsirde men boo ɗon dow ko'e meeɗen.

²⁵Ngam maajum ngetten Jawmiraawo Allah meeɗen mo foondi en bana o foondiri kaakiraaɓe men.

²⁶Ciftore no o waari bee Ibrahiima e bana noy o foondiri Isiyaaku. Ciftore boo ko tawi Yaakubu haa Mesopotamiya yaake o ɗonno dura baali Laban, kaawu maako.

²⁷Allah yarni ɓe bone ngam haa o faama ko woni nder ɓerɗe maɓɓe. O waɗanaay en bana non, o yarnaay en bone. Jawmiraawo ɗon ɓocca ɓadotooɓe mo ngam reentingo ɓe.”

²⁸Ojiyas jaabi mo: “Ko mbolwuɗa ɗo fuu, ɗum gooŋga, walaa gaabotooɗo ma koo seɗɗa.

²⁹Naa hannde tan hikma ma waŋgi. Diga nderkaaku ma, yimɓe fuu anndi hakkiilo ma e saman numooji ɓernde ma.

³⁰Ammaa yimɓe ɗonno maaya ngam ɗomka. Kanjum dooli min wolwugo ko min mbolwi, min kuni hunayeere nde fiistataake.

³¹An a debbo kulɗo Allah, torana min Allah, o toɓnana min iyeende. Cigorɗi ndiyam amin fuu keewa, taa ɗomka torra min fahin.”

³²Yudit wi'i ɓe: “Naneeɗam: Mi waɗanan on huunde nde gide fuu ciftoran ɗum.

³³Jemmaare nde'e, ndare haa dammugal berniwol, acceeɗam mi wurto bee korɗo am. Hiddeko sarti balɗe jowi ɗe on ndarni ngam hokkugo berniwol haa konne'en men njotto, Jawmiraawo wallan Isra'iila bee juŋngo am.

³⁴Taa tefe anndugo ko mi tammi waɗgo, mi wi'ataa on ɗum sonaa to ɗum waɗi.”

³⁵Ojiyas e mawɓe ɗiɗo go mbi'i mo: “Yah jam! Jawmiraawo ɗofte ngam a waato konne'en men!”

³⁶Nden ɓe ngurti bukkaaru Yudit, ɓe ndilli kuuɗe maɓɓe.