Read Fulfulded Yudit 9 Bible Online

Yudit 9 - Fulfulded bible

Yudit 9

¹Asiri wakkati nde ɓe lii'oto dokke uurle nder haykaliiru Urusaliima, Yudit tuggi koppi haa tiinde maako meemi lesdi. O rufi ndoondi dow hoore maako, o itti limce buhuuje ɗe o sakki les suddaare maako, o tori Jawmiraawo bee sawtu, o wi'i:

²“Jawmiraawo, an woni Allah Simeyon, kaaka am. An hokki mo kaafahi ngam torrugo hoɗɓe doolunooɓe deerɗiiko debbo waaldugo bee maɓɓe yaake o paanyo. Ɓe nyaami ɗum neɗɗaaku nde ɓe ceeki ɗum limce, ɓe mbaalori mo bee semmbe. Ɓe mbaɗi ko a haɗno.

³Ngam maajum a acci mawɓe maɓɓe mbare. Ɓe cargaama kamɓe boo: Leeso ngo ɓe nyaami neɗɗaaku ɓiɗɗo debbo dow maago go heewi ƴiiƴam maɓɓe. A faɗɗi maccuɓe e jaagorɓe maɓɓe, laamiiɓe dow koromje maɓɓe.

⁴A acci ɓe naŋnga rewɓe maɓɓe, ɓiɓɓe maɓɓe rewɓe laati horɓe. Ko ɓe mari fuu senndaama haa juuɗe jama'aare nde a yiɗi, waato Isra'iila'en, ɗowtantooɓe ma. Ɓe ngerdaaki semteende nde ukkani lenyol maɓɓe, ɓe tori ballal maaɗa. Allah am, nan debbo jurumɗo oo.

⁵Ko saali ɓooyma, ko ɗon saalo jonta e ko tammi saalaago jaŋngo, an hoddirta ɗum. Jontaajum e garanɗum, an waɗi ɗum. Anniyaaji maaɗa fuu kiɓɓi.

⁶Kuuje laatiiɗe ɗe'e ngari wi'go ma: Ndaa min! Kuuɗe ma fuu ɗe taaskitinaaɗe, a anndi kiitaaji ma diga ɗi ciwaa.

⁷Yaa Jawmiraawo, a laari Assiriya'en ngari bee mooɓe sooje'en maɓɓe fuu. Ɓe mawnitiiɓe daliila pucci maɓɓe, wa'iiɓe pucci maɓɓe e baawɗe sooje'en maɓɓe yahooɓe bee kosɗe boo. Ɓe njo'ini tammunde maɓɓe dow labbe maɓɓe e ndarganaaje maɓɓe, dow lagaaje maɓɓe e piyli maɓɓe. Ɓe ɗon ngejjita, an Jawmiraawo a waawan darnugo konuuji.

⁸Innde ma Jawmiraawo. Sottin fitina maɓɓe bee baawɗe ma. Nattin semmbe maɓɓe bee tikkere ma. Ɓe kaɓɓi soɓnugo nokkuure ma seniinde e laymaaru haa innde ma teddunde woni, yibbingo hirsirde ma bee balmi maɓɓe.

⁹Laar mawnitaare maɓɓe! Ruf tikkere ma dow maɓɓe! Hokkam min debbo jurumɗo semmbe ngam mi waɗa ko mi annini.

¹⁰Huuwtinir bolle am pewooje ngam do'ugo jaagorɗo e maccuɗo, mawɗo sooje'en e sooje'en mum. Nattin mawnitaare maɓɓe bee juŋngo debbo.

¹¹Semmbe ma darataako dow limgal yimɓe. Baawɗe ma tuugataako dow marɓe baawɗe. An woni Allah yaŋkiniiɓe, a wallan famarɓe, a semmbiɗinan tampuɓe, a aynan wudinaaɓe, a hisnan yimɓe ɓe ngalaa tammunde.

¹²Mi ɗon toro ma Allah baaba am, Allah mo Isra'iila, Jawmiraawo asama e lesdi, baɗɗo ndiyamji, laamiiɗo tagefooji fuu, nan tornde am.

¹³Waɗ no bolle am pewooje naawa ɓe, ɗe mbara haɓɓotirɓe nattingo alkawal maaɗa, haykaliiru maaɗa, hooseere Siyona e lesdi jama'aare maaɗa.

¹⁴Waɗ no jama'aare maaɗa e le'i maare fuu paama an woni Allah Baawɗo, an tan woni aynoowo Isra'iila.”