Read Fulfulded Asta 2 Bible Online

Asta 2 - Fulfulded bible

Asta 2

¹Ɓaawo man, nde ɓernde laamiiɗo Ahasuwerus feewti, o siftori ko Wasti waɗi e ko ta'aama dow maako boo.

²Sukaaɓe jagganooɓe laamiiɗo mbi'i mo: “Barkaama, accu ɓe ɗaɓɓitane faanyɓe ŋarniiɓe ɓe meeɗaay gorko.

³Jo'in hakkilooɓe nder lesɗe maaɗa fuu, barkaama, ngam ɓe mooɓta faanyɓe ŋarniiɓe ɓe meeɗaay gorko. Ɓe ngadda ɓe haa laamorde Suuza nder suudu rewɓe halfitinaandu Hegay, cortaaɗo laamiiɗo, saraakiijo aynoowo rewɓe. Kaŋko o hokka ɓe haaje maɓɓe ngam fawnaago.

⁴Paanyo pottananɗo ma, barkaama, laato debbo maaɗa haa pellel Wasti.” Haala man fottani laamiiɗo, o waɗi bana non.

⁵Woodi goɗɗo Yahuuduujo nder laamorde Suuza, innde muuɗum Mardokay ɓii Ya'ir ɓii Sim'i ɓii Kis, mo lenyol Benyamin.

⁶O gooto caka dahaaɓe[2] ɓe Nabukodonosor laamiiɗo Baabila dahino diga Urusaliima hawtaade bee Yekoniya, laamiiɗo Yahuuda.

⁷Hadassa, bi'eteeɗo boo Asta, o atiimeejo o walaa baaba e daada. Nde baaba maako e daada maako maayi, Mardokay hoosi mo bana ɓiŋngel muuɗum, mawnini mo. Asta, o ɓii bappa Mardokay, o paanyo ŋarniiɗo masin, ɗelka-ɓannduujo.

⁸Nde laamiiɗo anndini umroore muuɗum, hakkilooɓe boo mooɓti faanyɓe ɗuuɗɓe haa laamorde Suuza, halfini ɓe haa Hegay, aynoowo rewɓe. Ɓe ngaddi Asta boo nder saare laamiiɗo haa o ayna mo.

⁹Paanyo oo fottani mo, heɓi mo'ere haa maako. O yaawɗi hokkugo mo ko o mari haaje ngam fawnaago e wuurugo. O hokki mo boo horɓe njoweeɗiɗo, suɓaaɓe nder saare laamiiɗo. Nden o yahri mo bee horɓe maako nder taƴtaaji suudu rewɓe ɓurɗi wooɗugo.

¹⁰Ammaa Asta waŋginaay ummaatoore muuɗum e iwde muuɗum, ngam Mardokay umruno mo taa o anndina ɗum.

¹¹Kala nyalaade fuu Mardokay waanci yeeso daldal suudu rewɓe ngam anndugo njamu Asta e ko heɓata mo.

¹²Umroore rewɓe darni paanyo debbo fuu taasko lebbi sappo e ɗiɗi: O wujo nebbam baɗaadi lebbi joweego aartuɗi e lebbi joweego luttuɗi boo o wujo ngujam balsani e kuuje pawnirɗe goɗɗe. Ɓaawo man paanyo fuu yehi bee saa'i mum haa laamiiɗo Ahasuwerus.

¹³Paanyo ummiiɗo diga suudu rewɓe ngam yahugo haa suudu laamiiɗo fuu, heɓi ko o ƴami fuu ngam yahugo bee man.

¹⁴Kiikiiɗe o yehi ton, fajiri boo o lori haa suudu rewɓe ɗiɗawru, halfitinaandu Sa'asgas, cortaaɗo laamiiɗo, aynoowo sulaaɓe. O meetataa yahugo haa laamiiɗo, sonaa to laamiiɗo yeli ɗum, ewnake mo boo bee innde.

¹⁵Nde saa'i waɗi haa Asta ɓii Abihayil, bappa Mardokay, waŋga yeeso laamiiɗo, Asta mo Mardokay mawnini ɗaɓɓaay koo ɗume, o hoo'i ko Hegay, cortaaɗo laamiiɗo, aynoowo rewɓe dawrani mo tan. O heɓi mo'ere haa yi'ɓe mo fuu.

¹⁶Ɓe njahri mo nder suudu laamiiɗo Ahasuwerus nder lewru sappooru wi'eteendu Tebet, nder nduuɓu laamu maako njoweeɗiɗaɓu.

¹⁷Laamiiɗo ɓuri yiɗugo Asta dow rewɓe woɗɓe fuu, o mo'ani mo e o woonani mo ko ɓuri faanyɓe luttuɓe fuu. O meeti mo meetaleewol laamu, o te'i mo haa pellel Wasti.

¹⁸Nden o waɗi nyaamduuji ɗuuɗɗi ngam saraaki'en maako e sukaaɓe maako, haa o teddina Asta. O hoynani lesɗe maako jomorgol, o hokki boo dokke fodde caahaaki laamiiɓe.

¹⁹Mardokay ɗonno huuwa haa laamorde wakkati ɓe mooɓti faanyɓe fahin.

²⁰Asta boo waŋginaay iwde mum e ummaatoore mum tawon, bana Mardokay umruno mo. O tokki ɗowtanaago Mardokay bana yaake o ɗonno les kaliifaaku muuɗum.

²¹Nyannde go'o, nde Mardokay ɗon huuwa haa laamorde, saraaki'en ɗiɗo, Bigetan e Teres, sortaaɓe, aynooɓe dammugal haa suudu laamiiɗo, tikki, mbaɗi dabare ngam mbarugo laamiiɗo Ahasuwerus.

²²Mardokay nani haala man, anndini ka Asta, debbo laamiiɗo, Asta boo yecci ka laamiiɗo bee innde Mardokay.

²³Ɓe linyi haala man, ngooŋɗini ka. Worɓe ɗiɗo go ɓilaama dow leɗɗe. Habaruuji ɗi'i fuu mbinndaama haa Deftere Habaruuji Nyalaaɗe yeeso laamiiɗo.