Read Fulfulded Asta 5 Bible Online

Asta 5 - Fulfulded bible

Asta 5

¹Ɓaawo nyalɗe tati go Asta ɓorni limce laamu, yehi haa daldal ɓadiiŋgal suudu laamiiɗo, dari yeeso suudu laamiiɗo. Laamiiɗo ɗon jooɗi dow leeso laamu muuɗum nder suudu muuɗum wonndu yeeso nastirde saare.

²Nde o yi'i Asta ɗon dari haa daldal maako, o mo'ani mo. Laamiiɗo lii'ani mo sawru laamu ndu kaŋŋeeri wonndu haa juŋngo mum. Asta ɓaditi, meemi hoore maaru.

³Laamiiɗo ƴami mo: “Ko waɗi, debbo am Asta? Ko ɗaɓɓata? Mi hokkete ɗum, haa dillango reeta laamu am.”

⁴Asta jaabi: “To a yerdake, barkaama, ngara hannde bee Hamman ngam nyaamduuji ɗi mi waɗani ma.”

⁵Laamiiɗo wi'i: “Law, ngadde Hamman ngam waɗugo ko Asta wi'i.” Laamiiɗo e Hamman ngari ngam nyaamduuji ɗi Asta waɗi.

⁶Saa'i ɓe ɗon njara inaboojam, laamiiɗo ƴami Asta: “Ɗume torotoɗa, Asta? A heɓan ɗum. Ko ɗaɓɓata fuu, mi hokkete ɗum, haa dillango reeta laamu am.”

⁷Asta jaabi: “Ko mi toroto, ko mi ɗaɓɓata, ndaa ɗum:

⁸To mi heɓi mo'ere haa maaɗa, barkaama, to ɗum fottani ma a yerdo tornde am, a waɗa ko mi ɗaɓɓata boo, nden kam war jaŋngo bee Hamman ngam nyaamduuji ɗi mi waɗanta on. Jaŋngo njaabotoomi ko ƴamɗa, barkaama.”

⁹Nyannde man Hamman wurti, o ceyiiɗo, ɓernde maako weli. Ammaa nde o yi'i Mardokay ɗon jooɗi haa yolnde laamiiɗo, sali ummaago yeeso maako, dimmbaaki sam, Hamman ɓernani mo masin.

¹⁰Ammaa o naŋgti ɓernuki maako, o hooti. Nden o neli ewnoygo sooba'en maako e debbo maako Zeres.

¹¹O wolwani ɓe haala risku maako ɗuuɗŋgu e ɓiɓɓe maako ɗuuɗɓe no laamiiɗo ɓaŋtiri mo dow saraaki'en e sukaaɓe muuɗum fuu.

¹²Nden o ɓesdi wi'ugo: “Asta, debbo laamiiɗo waɗi nyaamduuji. O ewni yam min feere am mi yahda bee laamiiɗo, walaa goɗɗo feere. Koo jaŋngo maajum boo o ewni yam bee laamiiɗo.

¹³Ammaa ɗum fuu ɗum laatani yam huunde meere, saa'i mi ɗon yi'a Mardokay Yahuuduujo ɗon haa pellel kuugal mum, haa yolnde laamiiɗo.”

¹⁴Debbo maako Zeres e sooba'en maako fuu mbi'i mo: “Umru ɓe ndarna leggal ngal meetir noogas e jowi. Jaŋngo fajiri boo wolidu bee laamiiɗo ngam haa o umra ɓe ɓila Mardokay haa maagal. Ɓaawoɗon yah bee seyo, ɗoftu laamiiɗo haa nyaamduuji go.” Ɗum fottani Hamman, o umri ɓe ndarna leggal man.