Read Fulfulded Asta 6 Bible Online

Asta 6 - Fulfulded bible

Asta 6

¹Jemmaare nde'e laamiiɗo waawaay ɗaanaago. O umri ɓe ngaddana mo Deftere Siftinorde Habaruuji Nyalaaɗe. Goɗɗo jaŋngani mo nde.

²Ɓe tawi ko winnda dow Mardokay mo waŋgini nufaye Bigetan e Teres, saraaki'en aynooɓe dammugal suudu laamiiɗo, sortaaɓe yiɗnooɓe mbargo laamiiɗo Ahasuwerus.

³Laamiiɗo ƴami: “Tedduŋgal ngale e maŋngu nguye o heɓi ngam maajum?” Sukaaɓe maako njaabi: “Koo ko o heɓi.”

⁴Laamiiɗo ƴami fahin: “Moy woni haa daldal saare?” — Saa'i man Hamman nastino daldal suudu laamiiɗo yaasiwal ngam toraago mo o umra ɓilugo Mardokay haa leggal ngal o taaskitini ngam maako. —

⁵Sukaaɓe laamiiɗo njaabi: “Hamman ɗon dari haa daldal saare.” Laamiiɗo wi'i mo o nasta.

⁶Hamman nasti. Laamiiɗo ƴami mo: “Ɗume haandani goɗɗo mo laamiiɗo yiɗi teddingo?” Hamman numi nder ɓernde muuɗum: “Moye laamiiɗo yiɗi teddingo, sonaa min?”

⁷Ngam maajum o jaabi: “Goɗɗo mo ngiɗɗa teddingo, barkaama —

⁸sey ɓe ngadda alkibbaare nde an a meeɗi ɓornaago e puccu ngu a meeɗi wa'aago bee meetaleewol laamu dow hoore maagu.

⁹Gooto nder saraaki'en ma ɓurɓe maŋngu, tedda-asliijo hoo'a alkibbaare man e puccu man, barkaama, o ɓorna goɗɗo mo ngiɗɗa teddingo, o wa'ina mo dow puccu, o saalina mo haa daldal berniwol, o wooyna yeeso maako: Bana nii laamiiɗo waɗanta goɗɗo mo o yiɗi teddingo ɗum.”

¹⁰Laamiiɗo wi'i Hamman: “Law, hoo'u alkibbaare e puccu bana mbi'ɗa, waɗan ɗum fuu Mardokay Yahuuduujo mo ɗon haa pellel kuugal mum, haa yolnde laamiiɗo. Taa yejjitu koo ɗume nder ko mbi'ɗa fuu.”

¹¹Hamman hoo'i alkibbaare e puccu, ɓorni Mardokay, wa'ini mo dow puccu, saalini mo haa daldal berniwol, wooyni yeeso maako: “Bana nii laamiiɗo waɗanta goɗɗo mo o yiɗi teddingo.”

¹²Nden Mardokay lorti pellel kuugal mum, haa yolnde laamiiɗo. Ammaa Hamman yaawɗi hooti, o cuniiɗo, o wiirni yeeso maako boo.

¹³O yecci debbo maako Zeres e soobiraaɓe maako ko heɓi mo. Dawrooɓe maako e debbo maako Zeres mbi'i mo: “A fuɗɗi leestugo yeeso Mardokay. To o Yahuuduujo fakat, nden kam a waawataa jaalaago mo, ammaa a do'oto yeeso maako.”

¹⁴Saa'i ɓe ɗon mbolida tawon, sortaaɓe laamiiɗo ngari ngam yahrugo Hamman bee jaawal haa nyaamduuji ɗi Asta waɗno.