Read Fulfulded Asta 8 Bible Online

Asta 8 - Fulfulded bible

Asta 8

¹Nyannde man laamiiɗo Ahasuwerus hokki debbo mum Asta mardi Hamman, konneejo Yahuudu'en fuu. Asta waŋginani mo no Mardokay banndiri bee muuɗum. Ngam man laamiiɗo ewni Mardokay wara yeeso muuɗum.

²O hokki mo halagaare lammba nde o hoositi haa Hamman. Asta boo halfitini mo mardi Hamman.

³Fahin Asta wolwani laamiiɗo. O do'i les kosɗe maako, o woyi, o tori mo o daayna halleende Hamman Agagiijo e nufaye mum dow Yahuudu'en.

⁴Laamiiɗo lii'ani Asta sawru kaŋŋeeri laamu. Asta ummi, dari yeeso maako.

⁵Nden o wi'i: “To a yerdake, barkaama, to mi heɓi mo'ere haa maaɗa, to haala ka fottani ma, to mi heɓi yerduye ma boo, ɓe mbinnda bataakeeji ngam waylititgo ɗi Hamman ɓii Hammedata Agagiijo nufi, winndi ngam halkugo Yahuudu'en wonɓe nder lesɗe maaɗa fuu, barkaama.

⁶Noy munyranmi sarru ngu tammi ukkanaago ummaatoore am? Noy munyranmi halkere banndiraaɓe am?”

⁷Laamiiɗo Ahasuwerus wi'i debbo mum Asta e Mardokay Yahuuduujo: “Mi hokki Asta mardi Hamman. Ɓe ɓili Hamman dow leggal, ngam o ɗaɓɓi mbarugo Yahuudu'en.

⁸Jonta mbinndane Yahuudu'en ko fottani on onon boo. Mbinnde ɗum bee innde am, mbaɗe lammba bee halagaare am boo. Ngam to umroore wurtake bee innde laamiiɗo, to nde waɗanaama lammba muuɗum boo, nde waylataako sam.”

⁹Nyannde man waato nyannde noogas e tataɓre nder lewru tataɓru wi'eteendu Siwaanu, ɓe ewni winndooɓe laamiiɗo. Kamɓe ɓe mbinndi ko Mardokay umri ɓe fuu, yahugo haa Yahuudu'en e ngomna'en e wakiili'en e mawɓe lesɗe fuu, diga Indiya haa yotti Etiyopiya[4], lesɗe teemerre e noogas e joweeɗiɗi — haa lesdi koo ndiye fuu bee binndol mum e ummaatoore koo ndeye bee wolde mum, haa Yahuudu'en boo bee binndol e wolde muuɗum'en.

¹⁰Ɓe mbinndi bataakeeji bee innde laamiiɗo Ahasuwerus, ɓe ngaɗani ɗi lammba bee halagaare laamiiɗo. Nden ɓe neldi ɗi bee yaawɗotooɓe wa'iiɓe pucci cuɓaaɗi ɗi saare laamiiɗo.

¹¹Bee bataakeeji ɗi'i laamiiɗo duŋani Yahuudu'en nder gure fuu ɓe mooɓo, ɓe kisna yoŋkiiji maɓɓe. To jama'aare konu iwnde haa ummaatoore koo ndeye e lesdi koo ndiye honi ɓe, ɓe mbara, ɓe kalka, ɓe nattina konne'en ɓe'e hawtaade bee rewɓe e ɓikkoy, ɓe njaɓta kuuje maɓɓe boo.

¹²Ɗum fuu ɗum laato nder lesɗe laamiiɗo koo toy, nder nyalaade woore, waato nyannde sappo e tataɓre nder lewru sappo e ɗiɗawru wi'eteendu Adar.

¹³Misaalu bataakewol man laati umroore nder lesdi koo ndiye ngam anndingo ummaatooje fuu. Yahuudu'en boo taasko nyalaade maajum ngam waataago konne'en muuɗum'en.

¹⁴Yaawɗotooɓe wa'iiɓe pucci saare laamiiɗo go ndilli bee jaawal fodde umroore laamiiɗo. Umroore nde'e wooynaama nder laamorde Suuza boo.

¹⁵Mardokay wurti diga laamiiɗo o ɓorniiɗo limce laamu carwinaaɗe e daneeje e alkibbaare raneere ɗiggunde e woɗeere, o ɗon hippi boo woronnde kaŋŋeeri mawnde. Jooɗiiɓe haa Suuza fuu kooli bee seyo.

¹⁶Hayru e seyo e welwelo e tedduŋgal laatani Yahuudu'en.

¹⁷Haa berniwol e haa lesdi haa umroore laamiiɗo yotti fuu, seyo e welwelo laatani Yahuudu'en, ɓe mbaɗi nyaamduuji e juulde. Ummaatooje ɗuuɗɗe nder lesɗe njaɓi diina Yahuudu'en, ngam kulol Yahuudu'en ukkani ɗe.