Read Fulfulded Gurtaaki 10 Bible Online

Gurtaaki 10 - Fulfulded bible

Gurtaaki 10

¹Jawmiraawo wi'i Muusa: “Yah haa Firawna, ngam mi saatini hoore maako e ko'e saraaki'en maako, haa mi waɗa alaamaaji am ɗi'i caka maɓɓe,

²ngam haa a yecca ɓikkoy ma e taaniraaɓe ma no mi torriri Misra'en, haala alaamaaji am ɗi mbaɗmi caka maɓɓe. Nden on anndan min woni Jawmiraawo.”

³Muusa e Haruna njehi haa Firawna, mbi'i mo: “Ndaa nii Jawmiraawo, Allah Ibraniŋke'en wi'i: Haa ndeye a tokkoto salaago leesnugo hoore ma yeeso am? Accu ummaatoore am yaha haa nde jaggano yam!

⁴To a salake yooftugo ummaatoore am, jaŋngo mi waddan baɓɓatti nder maral lesdi ma.

⁵Ɗi cuddan lesdi fuu haa goɗɗo waawataa yi'ugo ndi. Ɗi nyaaman ko luttino diga mallimallooje. Ɗi nyaaman leɗɗe puɗɗe nder ladde mooɗon fuu.

⁶Ɗi kebbinan cuuɗi ma e cuuɗi saraaki'en ma e cuuɗi Misra'en fuu. Ɗum laatoto masiiboowol ngol meeɗaay laataago diga zamanu kaakiraaɓe mooɗon ɗonno haa lesdi ndi'i haa wargo hannde.” Nden Muusa wurti saare Firawna, o dilli.

⁷Saraaki'en Firawna mbi'i mo: “Oo ɗo, ndeye o accata waddango en sarru? Accu Isra'iila'en ɓe'e njaha ngam ɓe njaggano Jawmiraawo Allah maɓɓe! Haa jonta a anndaa Misra ɗon halka na?”

⁸Ɓe ewniti Muusa e Haruna yeeso Firawna. O wi'i ɓe: “Ndille, on njaggano Allah Jawmiraawo mooɗon. Ammaa ɓeye njahata?”

⁹Muusa jaabi: “Min ndillidan bee derke'en e ndotti'en amin fuu e ɓiɓɓe amin worɓe e rewɓe, non boo dammooji amin e na'i amin, ngam min mbaɗanan Jawmiraawo amin juulde.”

¹⁰Firawna wi'i ɓe: “Jawmiraawo wondan bee mooɗon saa'i to mi yoofti on bee rewɓe mon e ɓikkoy mon fuu na? Fakat, on nufi kalluɗum!

¹¹Ko on nufi ɗo waɗataako. Sey worɓe tan njahata njaggano Jawmiraawo. Kanjum tan on mbaawata ƴamugo yam!” Nden ɓe ndiiwi ɓe diga yeeso Firawna.

¹²Nden Jawmiraawo wi'i Muusa: “Fortu juŋngo ma dow lesdi Misra ngam baɓɓatti ngara nyaama fuɗŋgooji gese ɗi mallimallooje luttinno fuu.”

¹³Muusa forti sawru muuɗum dow lesdi Misra. Jawmiraawo yahri henndu fuunaaŋgeeru dow lesdi nyalawmaare nde'e e jemmaare fuu. Nde weeti, henndu man waddi baɓɓatti.

¹⁴Baɓɓatti ngari dow lesdi Misra, ɗi njooɗi koo toy fuu nder maral Misra'en, ɗi ɗuuɗi masin. Irin maaji meeɗaay wargo e ɗi meetataa boo.

¹⁵Ɗi cuddi lesdi haa ndi ɓalwi. Ɗi nyaami fuɗŋgooji lesdi e ɓiɓɓe leɗɗe e ɗum ko mallimallooje luttinno fuu. Haako hecco luttaay haa leɗɗe e fuɗŋgooji gese koo toy nder lesdi Misra.

¹⁶Bee jaawal, Firawna ewni Muusa e Haruna, o wi'i ɓe: “Mi waɗi hakke dow Jawmiraawo, Allah mooɗon e dow mooɗon fuu!

¹⁷Njaafaneeɗam aybe am nde fahin! Tore Jawmiraawo, Allah mooɗon, o ittanammi masiiboowol mbaroowol ngo'ol.”

¹⁸Muusa wurti saare Firawna, o tori Jawmiraawo.

¹⁹Jawmiraawo wifni henndu hiirnaaŋgeeru saatundu masin. Ndu yahri baɓɓatti, ndu sakkini ɗi nder maayo Maaliya. Walaa koo mbaɓɓattu ngootu lutti nder maral lesdi Misra fuu.

²⁰Ammaa Jawmiraawo saatini hoore Firawna fahin, o accaay Isra'iila'en ndilla.

²¹Jawmiraawo wi'i Muusa: “Ɓaŋgtu juŋngo ma heedi asama. Nyiɓre laato nder lesdi Misra, ɗum nyiɓɓa haa goɗɗo waawataa yi'ugo newre muuɗum.”

²²Muusa ɓaŋgti juŋngo muuɗum heedi asama, nyiɓre nyiɓɓunde laati nder lesdi Misra fuu nyalɗe tati.

²³Ɓe mbaawaay yi'yi'tirgo, walaa gurtiiɗo suudu mum nyalɗe tati. Ammaa Isra'iila'en fuu ngoodi jayŋgol nder joole muuɗum'en.

²⁴Firawna ewni Muusa, o wi'i mo: “Ndille, njaggane Jawmiraawo mooɗon, on mbaawan yahdugo bee rewɓe e ɓikkoy mooɗon! Sey dammooji e na'i mon lutta haa ɗo.”

²⁵Muusa wi'i: “Naa non! An man hokku min dabbaaji kirseteeɗi e guleteeɗi ngam Jawmiraawo Allah amin.

²⁶Fahin boo, min ndillidan bee tokke dabbaaji amin. Walaa ndabbaawa ngoota luttata haa ɗo. Ngam haa maaji min koo'ata ngam lii'anaago Jawmiraawo Allah amin. Min anndaa ɗiye min lii'anto Jawmiraawo, sey to min njottake ton.”

²⁷Ammaa Jawmiraawo saatini hoore Firawna fahin, o yiɗaa accugo ɓe haa ɓe ndilla.

²⁸Firawna wi'i Muusa: “Wurta diga ɗo! Reenta, taa a meeta laarugo yeeso am fahin! To a meeti loraago haa am, a maayan!”

²⁹Muusa jaabi: “Bana mbi'ɗa, mi meetataa wargo yeeso ma!”