Read Fulfulded Gurtaaki 12 Bible Online

Gurtaaki 12 - Fulfulded bible

Gurtaaki 12

¹Jawmiraawo wolwani Muusa e Haruna nder lesdi Misra, o wi'i ɓe:

²“Lewru ndu'u laatano on hoore lebbi, ndu laatano on aranndu haa lebbi hitaande.

³Mbolwane jama'aare Isra'iila fuu, mbi'e: Nyannde sappoore lewru ndu'u, koo moy fuu hoo'a jawgel ngam saare mum fuu.

⁴To saare goɗɗo famɗi haa nyaamdugo ngel, sey o hawta bee keeddiɗɗiraawo maako ɓadiiɗo saare maako, fodde limgal yimɓe. Cuɓe jawgel ngel ɓe mbaawan nyaamdugo ngel.

⁵Jawgel ngel cuɓoton laato ngel nduuɓu, ngel walaa batte.

⁶On ciga ngel haa nyannde sappo e nayaɓre lewru ndu'u. Maŋngariba nyalaade man, jama'aare Isra'iila fuu hirsa jawgel ngel koo moy suɓi.

⁷Ɓe koo'a ƴiiƴam maagel, ɓe mbaɗa ɗam haa darduɗe dammugal ɗiɗi fuu, non boo haa tiinde maagal, haa saare nde ɓe nyaamata jawgel man fuu.

⁸Jemmaare man ɓe nyaama kusel jawgel ca'aaŋgel go, non boo tamseeje ɗe ufnaaka. Ɓe nyaamda ɗum bee haakooji kaaɗɗi.

⁹Taa nyaame ngel keccel malla defaaŋgel bee ndiyam, ammaa ca'aaŋgel, hoore maagel e kolce maagel e teteki maagel fuu.

¹⁰Taa luttine koo ɗume haa fajiri, ko lutti haa fajiri, ngule ɗum bee yiite.

¹¹Ndaa nii nyaamroton ngel: Taade limce mooɗon dow haddorde, paɗɗe paɗe haa kosɗe mooɗon e njoge cabbi nder juuɗe mooɗon. Nyaame ngel bee jaawal. Kanjum woni juulde Paska ngam am Jawmiraawo.

¹²Mi saaloto jemmaare man nder Misra. Mi fiyan afɓe fuu nder lesdi, diga yimɓe haa dabbaaji. Mi waɗan kiita dow labbi Misra fuu, min woni Jawmiraawo.

¹³Ƴiiƴam laatano on alaama faddoode haa cuuɗi ɗi ngonoton. Saa'i mi saaloto haa mooɗon mi yi'an ɗam, mi diwan ci'e mooɗon. Bana nii on kisan masiiboowol nattinanŋgol ngo'ol, yaake mi saaloto nder lesdi Misra.

¹⁴Nyalaade man laatano on ngam ciftorki, on ngartira nde juulde ngam Jawmiraawo. Njoge ɗum ngam kanjum woni farilla nduumiika haa gide mooɗon fuu.

¹⁵Nyalɗe joweeɗiɗi, sey tamseeje ɗe ufnaaka tan nyaamoton. Nyannde arannde itte ufnirɗum fuu haa ci'e[9] mooɗon. Ngam koo moy nyaami tamseere bee ufnirɗum diga nyannde arannde haa nyannde joweeɗiɗawre, o gurtinteeɗo diga ummaatoore Isra'iila.

¹⁶Nyannde arannde, mbaɗe mooɓtorde senaande, nyannde joweeɗiɗawre boo, mbaɗe mooɓtorde senaande. Taa kuuwe kuugal koo ngale nder nyalɗe ɗe'e. Sey ko koo moy mooɗon fuu nyaamata, kanjum tan ndefoton.

¹⁷On mbaɗan juulde tamseeje ɗe ufnaaka nde'e, nde siftinora on nyalaade nde ngurtinmi honooɓe mooɗon diga lesdi Misra. Njoge nyalaade maajum bana farilla nduumiika haa gide mooɗon fuu.

¹⁸Diga kiikiiɗe nyannde sappo e nayaɓre lewru aranndeeru, haa yotto kiikiiɗe nyalaade noogas e go'oore, on nyaama tamseeje ɗe ufnaaka.

¹⁹Taa ufnirɗum tawe nder ci'e mooɗon nyalɗe joweeɗiɗi. To koɗo malla Isra'iilaajo nyaami tamseere ufnaande, o gurtinteeɗo diga jama'aare Isra'iila.

²⁰Taa nyaame tamseeje ufnaaɗe, haa njooɗotooɗon fuu nyaame tamseeje ɗe ufnaaka.”

²¹Muusa ewni ndotti'en Isra'iila fuu, o wi'i ɓe: “Njehe, koo'e njawkoy ngam ci'e mooɗon, kirse koy ngam juulde Paska.

²²Koo'e boo tamndannde haako isop, cuuwe ko nder ƴiiƴam jawgel ngonɗam nder daaro. Nguje ɗam haa tiinde dammugal e darduɗe ɗiɗi fuu. Ammaa onon, taa gooto mooɗon wurto suudu muuɗum haa weeta.

²³Jawmiraawo saaloto lesdi ngam fiyugo Misra'en. To o yi'i ƴiiƴam haa tiinde dammugal e haa darduɗe ɗiɗi fuu, o diwan saare man, o accataa kalkoowo nasta nde ngam mbarugo afɓe e afi dabbaaji.

²⁴Sey on njogo ɗum bana farilla dow mooɗon e ɓiɓɓe mooɗon haa foroy.

²⁵To on nasti lesdi ndi Jawmiraawo iinani on, kebbitine juulde nde'e.

²⁶To ɓiɓɓe mooɗon ƴami on ko ɗum yiɗi wi'go,

²⁷mbi'e ɓe: Ɗum kirsanaaɗum Jawmiraawo ngam Paska. Yaake Isra'iila'en ɗonno nder lesdi Misra, Jawmiraawo mbari Misra'en, ammaa o diwi ci'e meeɗen, bana nii o hisni yimɓe ci'e meeɗen.” Yimɓe Isra'iila turi, cujidi.

²⁸Nden ɓe njehi, ɓe mbaɗi bana Jawmiraawo umruno Muusa e Haruna.

²⁹Caka jemma Jawmiraawo mbari afɓe Misra'en fuu, diga afo Firawna, mo tammi ronugo leeso laamu maako, haa afo kaɓɓaaɗo gonɗo nder fursina[10], non boo afi dabbaaji fuu.

³⁰Firawna ummi jemma, kaŋko e saraaki'en maako e Misra'en fuu. Bojji caatuɗi ummi nder Misra, ngam walaa saare nde maayɗo walaa.

³¹Firawna ewni Muusa e Haruna jemma, wi'i ɓe: “Umme, ngurte, acce ummaatoore am, onon e yimɓe Isra'iila fuu! Ndille, njaggane Jawmiraawo, bana mbi'ɗon!

³²Koo'e boo dammooji mooɗon e na'i mooɗon, bana mbi'ɗon! Ndille, tore Allah mooɗon o mbarkiɗina yam!”

³³Misra'en numi ɓe maayan fuu, ngam maajum ɓe njaawi wurtingo Isra'iila'en diga lesdi maɓɓe.

³⁴Ngam daliila man Isra'iila'en adi kuroori maɓɓe jiiɓaandi diga ndi ufnaaka, ɓe mbakki jiiɓruɗe kuroori caawaaɗe nder limce maɓɓe.

³⁵Isra'iila'en mbaɗi bana Muusa wi'no ɓe, ɓe ƴami haa Misra'en ndokka ɓe kuuje cardi e kuuje kaŋŋeeri e limce.

³⁶Jawmiraawo waɗi haa yimɓe maako keɓi mo'ere yeeso Misra'en, haa ɓe ndokki ɓe ko ɓe ƴami. Bana non ɓe ɓortiri Misra'en.

³⁷Ɓaawo man Isra'iila'en ummi Ra'meses, ndilli Sukkot, worɓe ujine teemeɗɗe njoweego (600.000) yahooɓe, rewɓe e ɓikkoy limaaka.

³⁸Yimɓe ɗuuɗɓe feere feere ndillidi bee maɓɓe. Ɓe njahri boo dammooji e na'i, dabbaaji ɗuuɗɗi masin.

³⁹Ɓe tamsi kuroori jiiɓaandi ndi ɓe ngurtidino Misra go, ɓe mbaɗi tamseeje bilaa ufnirɗum nder maaje, ngam ɓe ndiiwi ɓe diga Misra, ɓe mbaawaay reenugo koo seɗɗa e ɓe mbaawaay boo taaskanaago ko'e maɓɓe njooɓaari.

⁴⁰Wakkati ummaatoore Isra'iila njooɗi haa lesdi Misra, waɗi duuɓi teemeɗɗe nayi e cappanɗe tati (430).

⁴¹Nde duuɓi teemeɗɗe nayi e cappanɗe tati man timmi, nder nyalaade nde'e, honooɓe Jawmiraawo, waato ummaatoore Isra'iila'en fuu wurti lesdi Misra.

⁴²Bana Jawmiraawo hakkilaniri jemmaare man ngam wurtingo ummaatoore maako diga lesdi Misra, non boo sey Isra'iila'en fuu kakkilana jemmaare man daliila Jawmiraawo haa gide muuɗum'en fuu.

⁴³Fahin Jawmiraawo wi'i Muusa e Haruna: “Ndaa farilla dow juulde Paska: Taa jananno nyaama nyaamdu maaka.

⁴⁴Ammaa to goɗɗo woodi maccuɗo coodaaɗo bee ceede, sey o juulna mo hiddeko o nyaama nyaamdu maaka.

⁴⁵Koɗo e kuuwoowo ngam ngeenaari nyaamataa nyaamdu maaka.

⁴⁶On nyaama kusel nge'el nder suudu wooru. Taa ngurtine ngel yaasi. Taa ngewe koo gootal nder i'e maagel.

⁴⁷Jama'aare Isra'iila fuu waɗa juulde nde'e.

⁴⁸To koɗo ɗon haa mooɗon yiɗi waɗugo juulde Paska ngam Jawmiraawo, sey yimɓe maako worɓe fuu njuulno. Nden o ɓadito waɗugo juulde, o laato bana ɓii lesdi. Ammaa saadooniijo nyaamataa nyaamdu maaka.

⁴⁹Ɗum umroore woore dow Isra'iila'en e dow koɗo jooɗiiɗo nder lesdi mooɗon.”

⁵⁰Isra'iila'en fuu mbaɗi bana Jawmiraawo umruno Muusa e Haruna.

⁵¹Nyalaade man nden Jawmiraawo wurtini honooɓe mum, waato ummaatoore mum Isra'iila'en lesdi Misra fodde mooɓe muuɗum'en.