Read Fulfulded Gurtaaki 14 Bible Online

Gurtaaki 14 - Fulfulded bible

Gurtaaki 14

¹Jawmiraawo wi'i Muusa:

²“Yeccu Isra'iila'en ɓe loro, ɓe caŋngina yeeso Pii-Hahirot hakkunde Migdol e maayo. Caŋngine ton baŋnge maayo yeeso Ba'al-Cefon.

³Firawna numan: Isra'iila'en majji laawol, ɓe ɗon ngiilo nder lesdi, ɓe mbaawaay wurtaago diga ladde!

⁴Mi saatinan hoore Firawna haa o taasna ɓe. Mi waŋginan tedduŋgal am haa Firawna e haa honooɓe maako fuu. Bana nii Misra'en anndan min woni Jawmiraawo!” Isra'iila'en mbaɗi non.

⁵Nde ɓe anndini laamiiɗo Misra Isra'iila'en ngurtake lesdi Misra, numooji Firawna e numooji saraaki'en maako ngayli dow yimɓe, ɓe mbi'i: “Ɗume mbaɗɗen ɗo? Koni en acci Isra'iila'en ndilli, ɓe acca huuwango en?”

⁶Firawna waɗi pucci haa moota mum, o dillidi bee honooɓe maako.

⁷O hoo'i mootaaji pucci cuɓaaɗi teemeɗɗe joweego e mootaaji pucci Misra fuu e umrooɓe dow maaji fuu.

⁸Jawmiraawo saatini hoore Firawna, laamiiɗo Misra, haa o taasna Isra'iila'en. Kamɓe ɓe ngurti lesdi Misra bana ɓe rimɗinaaɓe timmi.

⁹Honooɓe Misra taasni ɓe, bee pucci e mootaaji pucci Firawna fuu e wa'iiɓe pucci e honooɓe maako. Ɓe njokki Isra'iila'en baŋnge Pii-Hahirot, haa ɓe caŋnginino baŋnge maayo yeeso Ba'al-Cefon.

¹⁰Nde Firawna ɓaditi, Isra'iila'en ngi'i Misra'en ɗon tokki ɓe. Ɓe kultori masin, ɓe ngookani Jawmiraawo.

¹¹Ɓe mbi'i Muusa: “Kadi genaale ngalaa haa Misra na? Koni a waddi min haa min maaya nder ladde? Koni a wurtini min lesdi Misra?

¹²Min mbiiɓe ma yaake en ɗonno haa Misra tawon: Accu min kuuwana Misra'en. Ndikkana min huuwango Misra'en dow maayugo nder ladde!”

¹³Muusa wi'i ɓe: “Taa kule! Ndare booɗɗum, on ngi'an bana noy Jawmiraawo hisnirta on hannde. Ngam Misra'en ɓe ngi'oton hannde, on meetataa yi'ugo ɓe haa abada.

¹⁴Jawmiraawo haɓanan on, onon on cirwo!”

¹⁵Jawmiraawo wi'i Muusa: “Ngam ɗume a ɗon wookanammi? Wi' Isra'iila'en ɓe ummo ɓe ndilla.

¹⁶Ɓaŋgtu sawru ma, fortu ndu dow maayo, a seeka ngo ngam haa Isra'iila'en caalo caka maayo dow joorɗum.

¹⁷Min, mi saatinan ko'e Misra'en haa ɓe tokko on ɓaawo. Nden mi waŋginan tedduŋgal am haa Firawna e haa honooɓe maako fuu, waato haa mootaaji pucci maako e wa'iiɓe pucci maako.

¹⁸To mi waŋgini tedduŋgal am haa Firawna e haa mootaaji pucci mum e wa'iiɓe pucci mum, Misra'en anndan min woni Jawmiraawo.”

¹⁹Malaa'ikaajo Allah ardiiɗo Isra'iila'en yehi dari ɓaawo saŋngeere maɓɓe. Ruulde nanndunde bee daŋraŋgal boo ummi diga yeeso maɓɓe, dari ɓaawo maɓɓe.

²⁰Nde dari hakkunde saŋngeere Misra'en e saŋngeere Isra'iila. Ruulde nde'e ɗon nyiɓɓi wakeere woore, wakeere woɗnde boo ɗon yayna jemma. Jemmaare fuu Misra'en e Isra'iila'en ɓadindiraay.

²¹Muusa forti juŋngo muuɗum dow maayo. Jawmiraawo lortini maayo bee henndu fuunaaŋge saatundu jemmaare nde'e fuu. O wartiri maayo lesdi njoorndi, ndiyamji ta'i.

²²Isra'iila'en eeri caka maayo dow joorɗum. Ndiyamji ndari bana mahol haa nyaamo maɓɓe e nano maɓɓe.

²³Misra'en taasni ɓe, tokki ɓe ɓaawo, pucci Firawna e mootaaji maako e wa'iiɓe pucci maako fuu nasti maayo.

²⁴Hiddeko weeta, Jawmiraawo jimmiti, laari jama'aare Misra'en nder ruulde nanndunde bee daŋraŋgal yaynannde bana yiite. O jiiɓi nde hakkiilo.

²⁵O fali pallooje mootaaji maɓɓe haa ɗe ngirlataa booɗɗum. Misra'en mbi'i: “Ndoggen Isra'iila, ngam Jawmiraawo ɗon haɓa bee meeɗen ngam Isra'iila'en!”

²⁶Jawmiraawo wi'i Muusa: “Fortu juŋngo ma dow maayo, haa ndiyamji ngarta dow Misra'en e dow mootaaji pucci maɓɓe e wa'iiɓe pucci maɓɓe!”

²⁷Muusa forti juŋngo muuɗum dow maayo, haa ɓadake weetugo, maayo hawti, warti bana naane. Misra'en ndoggi, potti bee ndiyam, Jawmiraawo yolli ɓe caka maayo.

²⁸Ndiyamji ngarti, moɗi mootaaji pucci e honooɓe wa'iiɓe ɗi fuu, nastuɓe nder maayo ɓaawo maɓɓe. Walaa koo gooto nder maare daɗi.

²⁹Isra'iila'en kam, eeri caka maayo dow joorɗum, ndiyamji ndari bana mahol haa nyaamo e nano maɓɓe.

³⁰Bana non Jawmiraawo hisniri Isra'iila'en nyalaade man diga baawɗe Misra'en. Isra'iila'en ngi'i ɓalli Misra'en maayɓe dow fomoonde maayo.

³¹Isra'iila'en ngi'i kuugal maŋngal ngal Jawmiraawo huuwi Misra'en. Ngam maajum ɓe kuli Jawmiraawo, ɓe nuɗɗini mo e ɓe kooli jaggiiɗo maako Muusa.