Read Fulfulded Gurtaaki 16 Bible Online

Gurtaaki 16 - Fulfulded bible

Gurtaaki 16

¹Yimɓe jama'aare Isra'iila fuu ummi Elim, njotti ladde Siin hakkunde Elim e Sina, ɗum nyannde sappo e jowaɓre nder lewru ɗiɗaɓru, ɓaawo gurtaaki maɓɓe diga Misra.

²Haa ladde ton, ɓe fuu ɓe ngurŋgurti dow Muusa e Haruna.

³Ɓe mbi'i ɓe: “Ndikka to Jawmiraawo mbari min nder lesdi Misra! Ton min ɗonno njooɗi kommbi payanɗe keewɗe kusel, min nyaami haa min cafti! Ammaa on ngurtini min, on ngaddi min nder ladde nde'e ngam haa jama'aare nde'e fuu maayra weelo!”

⁴Jawmiraawo wi'i Muusa: “Mi toɓnanan on nyaamdu diga asama. Nde weeti fuu yimɓe njahan ɓofta nyaamdu deydey nyalaade man. Bana non poondiranmi on, haa mi laara to on ɗowtanto umroore am malla on ɗowtantaako nde.

⁵Nyannde joweego'oore, to on ɗon ndefa ko on ɓofti, on tawan ɗum cowi ɗiɗi dow ko on ɓoftata nyalaade nyalaade fuu.”

⁶Muusa e Haruna mbi'i Isra'iila'en fuu: “Kiikiiɗe on anndan Jawmiraawo, kaŋko wurtini on lesdi Misra.

⁷Fajiri boo on ngi'an tedduŋgal Jawmiraawo. O nani ngurŋgurtol mooɗon dow maako. Ngam minin min ɓeye, haa on ngurŋgurta dow amin?”

⁸Muusa wi'i: “Ndaa nii anndirton ɗum: Kiikiiɗe Jawmiraawo nyaamnan on kusel, fajiri boo irin tamseeje, haa on kaara. Ngam Jawmiraawo nani no on ngurŋgurtiri dow maako. Ngam minin, min ɓeye? Ngurŋgurtol mon laataaki dow amin, ammaa dow Jawmiraawo.”

⁹Nden Muusa wi'i Haruna: “Wi' yimɓe jama'aare Isra'iila fuu ɓe ngara ɓe ndaro yeeso Jawmiraawo, ngam o nani ngurŋgurtol maɓɓe.”

¹⁰Saa'i Haruna ɗon wolwana yimɓe jama'aare Isra'iila, ɓe ɗonno ngaylito gal ladde. Law, tedduŋgal Jawmiraawo waŋgi nder ruulde.

¹¹Jawmiraawo wi'i Muusa:

¹²“Mi nani ngurŋgurtol Isra'iila'en. Yeccu ɓe ndaa nii mbi'mi: Maŋngariba nyalaade man, on nyaaman kusel, jaŋngo fajiri boo on kaaran tamseeje. Bana nii on anndan min woni Jawmiraawo, Allah mooɗon.”

¹³Nde hiiri, gerle ngari, cuddi saŋngeere. Fajiri boo saawawre suddi lesdi taariindi saŋngeere.

¹⁴Nde saawawre jinni, woodi ko lutti dow lesdi bana koɓe ɗigguɗe masin, bana huunde raneere suddi lesdi.

¹⁵Isra'iila'en ngi'i ɗum, ɓe ƴamƴamtiri: “Ɗum ɗume?” Ngam ɓe anndaa ɗum. Muusa jaabi ɓe: “Ɗum tamseere nde Jawmiraawo hokki on ngam nyaamugo.

¹⁶Ndaa ko Jawmiraawo umri: Koo moy fuu ɓofta deydey ko he'ata ɗum, gooto fuu baakin reeta muudoore, fodde limgal yimɓe wonɓe nder laymaaru muuɗum fuu.”

¹⁷Isra'iila'en mbaɗi bana non. Ɓe ɓofti, woɗɓe ɓofti ɗuuɗɗum, woɗɓe boo ɓofti seɗɗa non.

¹⁸Ammaa nde ɓe poondi ɗum, ɓoftunooɓe ɗuuɗɗum go ɓurnaay, ɓoftuɓe seɗɗa non boo ŋakkinaay, koo moy heɓi deydey haaje mum.

¹⁹Fahin Muusa wi'i ɓe: “Taa koo gooto mooɗon sigo ɗum haa fajiri.”

²⁰Ammaa woɗɓe nananaay Muusa ɓe cigi ɗum haa fajiri. Gilɗi ndimi nder maajum, ɗum nyoli, ɗum hacci. Muusa tikkani ɓe.

²¹Diga saa'i man, fajiri fuu ɓe ɗon ɓofta nyaamdu deydey ngam nyalaade man. Ammaa to naaŋge wuli, luttuɗum ɗon ɓolwa.

²²Nyannde joweego'oore ɓe ɗon ɓofta nyaamdu cowi ɗiɗi, baakin muudoore ngam gooto fuu. Ardiiɓe jama'aare ngari, anndini ɗum Muusa.

²³O wi'i ɓe: “Kanjum woni ko Jawmiraawo umri, jaŋngo woni siwtaare, nyalaade siwtorde senaande ngam Jawmiraawo. Tamse ko ngiɗɗon tamsugo, ndefe ko ngiɗɗon defugo. Ko lutti fuu, cige ɗum haa mooɗon haa jaŋngo fajiri.”

²⁴Ɓe cigi luttuɗum man haa jaŋngo fajiri bana Muusa umruno ɓe, ɗum haccaay, ngilŋgu boo nastaay.

²⁵Jaŋngo man Muusa wi'i ɓe: “Nyaame ɗum hannde, ngam hannde woni siwtorde ngam Jawmiraawo. Hannde on tawataa ɗum haa ladde.

²⁶Ɓofte ɗum nyalɗe joweego, ammaa nyannde joweeɗiɗawre woni siwtorde, nder maare ɗum tawataake.”

²⁷Ngam nyannde joweeɗiɗawre woɗɓe ngurti ndilli ɓoftoygo, ammaa ɓe tawaay koo ɗume.

²⁸Jawmiraawo wi'i Muusa: “Haa ndey on tokkoto salaago ɗowtanaago umrooje am e sarɗiiji am?

²⁹Paame booɗɗum, min Jawmiraawo mi hokki on nyalaade siwtorde, ngam maajum ndokkumi on nyannde joweego'oore nyaamdu cowi ɗiɗi. Nyalaade joweeɗiɗawre, koo moy mooɗon jooɗo haa saare mum, taa goɗɗo wurto nyalaade joweeɗiɗawre sam.”

³⁰Bana non yimɓe ciwtori nyannde joweeɗiɗawre.

³¹Isra'iila'en ewni nyaamdu ndu'u mannu[12]. Ɗum nanndi bee aawdi pamari, ndaneeri, ɗum dakmi bana tamseeje njumri.

³²Muusa wi'i: “Ndaa ko Jawmiraawo umri: Cige mannu reeta muudoore, ngam yimɓe gide mooɗon garanɗe, ngam ɓe ngi'a nyaamdu ndu nyaamnumi on nder ladde, saa'i mi wurtini on lesdi Misra.”

³³Muusa wi'i Haruna: “Hoo'u payangel, loow mannu nder maagel deydey reeta muudoore. Siga ngel yeeso Jawmiraawo ngam gide mooɗon garanɗe.”

³⁴Haruna jo'ini ngel yeeso seedamku alkawal ngam sigaago ngel, bana Jawmiraawo umruno Muusa.

³⁵Isra'iila'en nyaami mannu duuɓi cappanɗe nayi, haa ɓe njotti lesdi haa yimɓe ɗon njooɗi. Ɓe tokki nyaamugo haa nde ɓe njotti keerol lesdi Kanaana.

³⁶Nyaamdu mannu reeta muudoore waɗan baakin kilo ɗiɗi.