Read Fulfulded Gurtaaki 17 Bible Online

Gurtaaki 17 - Fulfulded bible

Gurtaaki 17

¹Yimɓe jama'aare Isra'iila fuu ummi ladde Siin, tokki laawol diga saŋngeere nde'e haa saŋngeere ndeya, bana Jawmiraawo umri ɓe. Ɓe caŋngini haa Refidim. Ndiyam walaa ton haa yimɓe njara.

²Ɓe tefi jokkirgol bee Muusa, ɓe mbi'i: “Hokku min ndiyam, min njara!” Muusa ƴami ɓe: “Koni njokkirton bee am? Koni poondoton Jawmiraawo?”

³Yimɓe ɗomɗi ton, ngiɗi ndiyam. Ɓe ngurŋgurti dow Muusa, ɓe mbi'i: “Kadi, ngam ɗume ngurtinɗaa min Misra haa mbara min e ɓikkoy amin e dabbaaji amin bee ɗomka?”

⁴Muusa wookani Jawmiraawo, ƴami mo: “Ɗume mbaɗanmi ngam ummaatoore nde'e? Lutti seɗɗa ɓe piɗammi bee kaa'e!”

⁵Jawmiraawo jaabi Muusa: “Saala yeeso ummaatoore, hoo'u bee maaɗa ndotti'en Isra'iila. Sawru maaɗa ndu piyruɗa maayo Niil bee muuɗum, hoo'u ndu haa juŋngo ma, yah!

⁶Mi daroto yeeso ma ton dow tapaare haa hooseere Horeb. A fiya tapaare nde'e, ndiyam wurtoto e maare haa ummaatoore yara.” Muusa waɗi bana non yeeso ndotti'en Isra'iila.

⁷O inndi nokkuure man Massa e Meriba[13], ngam daliila jokkirgol Isra'iila'en, ngam ɓe njarribi Jawmiraawo, ɓe mbi'i: “Jawmiraawo ɗon wondi bee meeɗen na malla wondaay?”

⁸Amaleki'en ngari haɓugo bee Isra'iila'en haa Refidim.

⁹Muusa wi'i Yosuwa: “Suɓan en worɓe haa ɓe njaha ɓe kaɓa bee Amaleki'en. Jaŋngo mi daroto haa yeereere towndiire bee sawru Allah nder juŋngo am.”

¹⁰Yosuwa yehi haɓi bee Amaleki'en bana Muusa wi'i mo. Muusa e Haruna e Huuru boo mba'i haa yeereere towndiire.

¹¹Saa'i Muusa ɓaŋgti juŋngo mum, Isra'iila'en ɗon njaalo. Ammaa saa'i ngo leesti, Amaleki'en ɗon njaalo.

¹²Nde juuɗe Muusa puɗɗi somugo, Haruna bee Huuru koo'i hayre, ɓe mballini nde kommbi maako, o jooɗi dow maare. Haruna bee Huuru ɓaŋgti juuɗe maako, oo gal wakeere nde'e, oya boo gal wakeere ndeya, bana non juuɗe maako ɗon ɓaŋgti haa naaŋge muti.

¹³Yosuwa heɓi jaalorgal maŋngal dow honooɓe Amalek bee kaafahi.

¹⁴Jawmiraawo wi'i Muusa: “Winndu ɗum fuu nder deftere ngam siftorgo ɗum. Yeccu Yosuwa mi timminan Amaleki'en fuu, walaa mo siftorta ɓe dow lesdi”.

¹⁵Nden Muusa mahi hirsirde, inndi nde Jawmiraawo-woni-tuutawal-am.

¹⁶O wi'i: “Nde nii Amaleki'en ɓaŋgti juuɗe ngam honugo laamu Jawmiraawo, Jawmiraawo honan ɓe diga yidere haa yidere.”