Read Fulfulded Gurtaaki 24 Bible Online

Gurtaaki 24 - Fulfulded bible

Gurtaaki 24

¹Jawmiraawo wi'i Muusa: “Wa'a, war haa am dow hooseere, an e Haruna e Nadab e Abihu e worɓe cappanɗe njoweeɗiɗo caka ndotti'en Isra'iila. Cujide diga daayiiɗum.

²Ɓaawoɗon a ɓadito haa am an feere ma, taa woɗɓe ɓadito. Taa ummaatoore boo wa'ido dow hooseere bee maaɗa.”

³Muusa wari, yecci Isra'iila'en ko Jawmiraawo wi'i e kiitaaji maako fuu. Isra'iila'en fuu njaabi hunnduko wooto, mbi'i: “Ko Jawmiraawo wi'i fuu, min mbaɗan ɗum.”

⁴Muusa winndi ko Jawmiraawo wi'i mo fuu. Jaŋngo man o dawi fajiri cub, o mahi hirsirde haa les hooseere, o darni kaa'e ciftinorɗe sappo e ɗiɗi, fodde le'i Isra'iila sappo e ɗiɗi.

⁵Nden o neli Isra'iila'en sukaaɓe ɓe lii'ano Jawmiraawo guleteeɗi, ɓe kirsana mo boo ga'i kalhali, ngam kawtal maɓɓe bee maako.

⁶Muusa hoo'i reeta ƴiiƴam dabbaaji kirsaaɗi go, loowi ɗam nder daarooji, luttuɗam boo o wicci ɗam dow hirsirde.

⁷Ɓaawo man o hoo'i deftere alkawal, o jaŋngi nde yeeso ummaatoore. Isra'iila'en mbi'i: “Ko Jawmiraawo wolwi fuu, min mbaɗan ɗum, min ɗowtanto mo.”

⁸Nden Muusa hoo'i ƴiiƴam nder taasaaje go, wicci ɗam dow Isra'iila'en, o wi'i: “Ƴiiƴam ɗa'am ɗon tabitina alkawal ngal Jawmiraawo haɓɓi bee mooɗon fodde umrooje ɗe'e fuu.”

⁹Ɓaawo man Muusa wa'idi bee Haruna e Nadab e Abihu e ndotti'en Isra'iila cappanɗe njoweeɗiɗo go.

¹⁰Ɓe ngi'i Allah Isra'iila. Les kosɗe maako, woodi huunde bana caɓɓol kuuwraaɗum kaa'e safira, ɗelkanɗum bana asama.

¹¹Allah fortaay juŋngo muuɗum ngam halkugo mawɓe Isra'iila ɓe'e. Ɓe ngi'i mo, ɓe nyaami, ɓe njari.

¹²Jawmiraawo wi'i Muusa: “Wa'a, war haa am dow hooseere, jooɗa ɗon. Mi hokkete alluhaaje kaa'e bee umrooje tawreeta ɗe mbinndumi ngam a ekkitina Isra'iila'en.”

¹³Hiddeko Muusa wa'oda bee jaggiiɗo muuɗum Yosuwa dow hooseere Allah, o wi'i ndotti'en: “Ndeene min haa ɗo, sey to min ngarti. Haruna bee Huuru ngondan bee mooɗon. To goɗɗo woodi haala, o wara yeeso maɓɓe.”

¹⁵Yaake Muusa wa'i dow hooseere, ruulde suddi nde.

¹⁶Tedduŋgal Jawmiraawo jippi dow hooseere Sina, ruulde suddi nde nyalɗe joweego. Nyannde joweeɗiɗawre o ewni Muusa nder ruulde.

¹⁷Isra'iila'en ngi'i tedduŋgal Jawmiraawo bana yiite wulanŋge dow hooseere.

¹⁸Muusa nasti haa caka ruulde, wa'i dow hooseere. O faɓɓi ton nyalawmaaje e jemmaaje cappanɗe nayi.