Read Fulfulded Gurtaaki 3 Bible Online

Gurtaaki 3 - Fulfulded bible

Gurtaaki 3

¹Muusa ɗonno dura dammooji esum Yetiro, limanjo haa Mediyan. Nyannde feere o soggi dammooji gaɗa ladde, o yotti haa hooseere Allah wi'eteende Horeb.

²Ton Malaa'ikaajo Jawmiraawo waŋgani mo nder jamre yiite haa caka wumre. Muusa laari wumre man ɗon jaɓa yiite, ammaa yiite nyaamaay nde.

³O numi: “Sey mi sela haa mi laara kaayeefiwol ngo'ol, ngam ɗume wumre wulaay.”

⁴Nde Jawmiraawo Allah yi'i Muusa seli haa o laara, o ewni mo caka wumre: “Muusa! Muusa!” O jaabi: “Na'am.”

⁵Allah wi'i mo: “Taa ɓadita haa ɗo! Faɗɗita ngam nokkuure haa a ɗon dari nde seniinde.”

⁶O tokki wi'ugo: “Min woni Allah baaba ma, Allah Ibrahiima e Allah Isiyaaku e Allah Yaakubu.” Muusa suddi yeeso mum, ngam o huli laarugo Allah.

⁷Nden Jawmiraawo wi'i: “Fakat mi yi'i bone ummaatoore am nder lesdi Misra. Mi nani gookaali maɓɓe daliila kuugal naawŋgal ngal ardiiɓe maɓɓe ndooli ɓe huuwugo, mi anndi torraaji maɓɓe.

⁸Mi jippi ngam mi hisna ɓe diga juuɗe Misra'en, mi wurtina ɓe diga lesdi man, mi yahra ɓe haa lesdi mboondi, njaasndi, lesdi keewndi kosam e njumri, haa lesdi ndi Kanaani'en e Heti'en e Amoori'en e Perezzi'en e Hewi'en e Yebusi'en njooɗi.

⁹Jonta gookaali Isra'iila'en njottake yeeso am, mi yi'i boo ɓillaare nde Misra'en ɓillata ɓe.

¹⁰Jonta yah, mi neli ma haa Firawna, ngam a wurtina ummaatoore am Isra'iila diga Misra!”

¹¹Muusa wi'i Allah: “Mi moy haa mi yaha haa Firawna, mi wurtina Isra'iila'en diga Misra?”

¹²Allah wi'i mo: “Mi wondan bee ma. Ndaa nii ngooŋɗinirta min neli ma: To a wurtini ummaatoore nde'e diga Misra, on njaggano yam dow hooseere nde'e.”

¹³Muusa wi'i Allah: “To mi yehi haa Isra'iila'en, mi wi'i ɓe: Allah kaakiraaɓe mooɗon neli yam haa mooɗon, ɓe ƴamatam: Noy innde maako? Ɗume mbi'anmi ɓe?”

¹⁴Allah jaabi Muusa: “Min woni mo ngonmi.” O wi'i: “Ndaa nii mbi'ata yimɓe Isra'iila: Min woni[3] neli yam haa mooɗon.”

¹⁵Fahin Allah wi'i Muusa: “Ndaa nii mbi'ata Isra'iila'en: Jawmiraawo, Allah kaakiraaɓe mooɗon, Allah Ibrahiima e Allah Isiyaaku e Allah Yaakubu neli yam haa mooɗon. Kanjum woni innde am haa foroy, bana non yimɓe ewnorto yam diga yidere haa yidere.

¹⁶Yah, mooɓtu ndotti'en Isra'iila, yeccu ɓe: Jawmiraawo, Allah kaakiraaɓe mooɗon waŋgani yam, o Allah Ibrahiima e Allah Isiyaaku e Allah Yaakubu. O wi'i: Fakat mi hakkilani on, mi anndi ko ɓe mbaɗi on haa Misra.

¹⁷O wi'i: Mi wurtinan on diga toskaare lesdi Misra, mi yahra on haa lesdi Kanaani'en e Heti'en e Amoori'en e Perezzi'en e Hewi'en e Yebusi'en, nder lesdi keewndi kosam e njumri.

¹⁸Isra'iila'en nanete. Nden a yaha haa laamiiɗo Misra, an bee ndotti'en Isra'iila, on mbi'a mo: Jawmiraawo, Allah Ibraniŋke'en fotti bee amin. Ngam man, accu min njaha nder ladde jahaaŋgal nyalɗe tati, haa min lii'ano Jawmiraawo Allah amin kirseteeɗi.

¹⁹Mi anndi laaɓɗum, laamiiɗo Misra yooftataa on, sonaa to goɗɗo cemmbiɗɗo dooli mo.

²⁰Mi fortan juŋngo am, mi waɗan kaayeefiiji am feere feere fuu nder lesdi Misra. Ɓaawo man o yooftan on on ndilla.

²¹Mi waɗan Misra'en ngerdo ummaatoore nde'e. To on ngurtake, on njahataa juuɗe cooke.

²²Debbo Isra'iilaajo fuu ƴaman keeddiɗɗum Misraajo debbo e haa koɗo gonduɗo bee muuɗum, kuuje bana cardi e kaŋŋeeri, non boo limce. Ɓiɓɓe mooɗon worɓe e rewɓe ndoondoto ɗum, bana nii on ɓortirta Misra'en.”