Read Fulfulded Gurtaaki 33 Bible Online

Gurtaaki 33 - Fulfulded bible

Gurtaaki 33

¹Jawmiraawo wi'i Muusa: “Umma, dillu accu nokkuure nde'e, an e yimɓe ɓe ngurtinɗa lesdi Misra. Yah nder lesdi ndi kunaniimi Ibrahiima e Isiyaaku e Yaakubu, mi bi'ɗo: Mi hokkan ndi danygol ma.

²Mi nelan malaa'ikaajo haa yeeso maaɗa, mi riiwan Kanaani'en e Amoori'en e Heti'en e Perezzi'en e Hewi'en e Yebusi'en.

³Ɗum lesdi keewndi kosam e njumri. Ammaa min mi yahdataa bee mooɗon, ngam taa mi nattina on haa laawol, ngam on yimɓe saata-ko'e'en.”

⁴Nde yimɓe nani koŋngol kalluŋgol ngo'ol, ɓe mboyi, walaa koo gooto ɓorni fawne muuɗum.

⁵Nden Jawmiraawo wi'i Muusa: “Yeccu Isra'iila'en: Onon on yimɓe saata-ko'e'en. To mi yahdi bee mooɗon wakkati bana ma'annde yiitere tan, fakat mi nattinan on. Jonta, ɓorte fawne mooɗon. Nden kam mi anndan ko mbaɗanmi on.”

⁶Isra'iila'en itti fawne muuɗum'en haa hooseere Horeb, ɓe meetaay ɓornaago ɗe.

⁷Muusa hoo'i laymaaru, darni ndu yaasi saŋngeere, daayiiɗum seɗɗa. O inndi ndu laymaaru fottirde. Koo moy ƴamanɗo muuyo Jawmiraawo wurto saŋngeere, yaha haa laymaaru fottirde man.

⁸Koo ndey Muusa wurti, yehi haa laymaaru, yimɓe fuu ummi, koo moy dari haa dammugal laymaaru muuɗum. Ɓe ndaari ɓaawo Muusa haa o nasti laymaaru.

⁹Koo ndey Muusa nasti ndu fuu, ruulde nanndunde bee daŋraŋgal go jippo, daro haa dammugal laymaaru, Jawmiraawo boo wolida bee Muusa.

¹⁰Nde Isra'iila'en fuu ngi'i ruulde ɗon dari haa dammugal maaru, ɓe ummi, ɓe cujidi, koo moy fuu haa dammugal laymaaru muuɗum.

¹¹Jawmiraawo wolidi bee Muusa hunnduko bee hunnduko, bana goɗɗo wolwirta bee soobaajo muuɗum. Nden Muusa lorti haa saŋngeere. Ammaa derkeejo, jaggiiɗo maako Yosuwa ɓii Nuuna jooɗi tum nder laymaaru fottirde.

¹²Muusa wi'i Jawmiraawo: “Ndaa, a umri yam mi ɗowa ummaatoore nde'e. Ammaa a anndinaay yam moy a nelata ngam wallugo yam. A wi'i boo: Mi anndi ma bee innde ma, mi yerdake ma.

¹³Kadi, to a yerdake yam, anndinam laabi ma, haa mi heɓa anndugo ma, an boo a tokko yerdaago yam. Laar ummaatoore nde'e boo, ɗum yimɓe ma!”

¹⁴Jawmiraawo wi'i mo: “Mi yahdan bee ma, mi hokkete siwtaare.”

¹⁵Muusa wi'i: “To a yahdataa bee amin, taa sottin min diga ɗo!

¹⁶Noy goɗɗo anndirta a yerdake min, min e ummaatoore ma fuu? Sonaa to a yahdi bee amin, nden kam min peerdindiran bee ummaatooje duniyaaru fuu.”

¹⁷Jawmiraawo wi'i Muusa: “Mi waɗan bana mbi'ɗa, ngam mi yerdake ma, mi anndi ma booɗɗum.”

¹⁸Muusa wi'i mo: “Yi'nam tedduŋgal ma!”

¹⁹Nden Jawmiraawo wi'i: “Mi saaloto yeeso ma, mi hollete mbooɗeeŋga am fuu, mi wooynan innde am: Jawmiraawo yeeso ma. Mi enɗan mo enɗanmi, mi hinnoto mo kinnotoomi.”

²⁰O ɓesdi wi'ugo: “A waawataa yi'ugo yeeso am, ngam walaa neɗɗo gi'anɗo yeeso am nden o yeeɗa.”

²¹Jawmiraawo wi'i: “Ndaa, woodi nokkuure baŋnge am, dara ton dow tapaare.

²²To mi ɗon waŋgina tedduŋgal am wakkati mi ɗon saalo, mi suuɗete nder luggere tapaare, mi wiirnete bee newre am, sey to mi saalake.

²³Nden mi ittan newre am, a yi'an ɓaawo am, ammaa yeeso am yi'ataake!”